Шетелдік нарыққа жол

Америкалық «Champion Foods» компаниясы павлодарлық картопты өңдеуге және экспорттауға мүдделі. Азық-түлік трейдері алыс шетел нарықтарына логистикалық бағдарлар орнатып, сауда маркетингін жолға қоюға әзірліктерін танытып отыр.

Облыс әкімі Әбілқайыр Сқақов АҚШ-тың «Champion Foods» компаниясының вице-президенті Джонатан Бурингпен кездесіп, инвестормен жергілікті картопты шетелге шығару мәселесін талқылады.

- Еліміздегі картоптың үштен бірі Павлодар облысында өсіріледі. Біздің картобымыз - Қазақстанда ғана емес, одан тыс жерлерде де танымал бренд. Өңірде жыл сайын 600 мың тоннаға жуық азық-түлік картобы жиналады. Бұл өңір қажеттілігінен жеті есе артық. Біз картопты сапалы сақтау үшін барлық жағдайды жасаймыз. Барлық картоп қоймаларының қуаты төрт жүз мың тоннадан асады. Облыста 4 тұқым өсіру шаруашылығының болуы жоғары сапаны қамтамасыз етеді. Басты басымдықтардың бірі - өндірілетін өнімді қайта өңдеу, - деді облыс әкімі. «Kazakh Invest» ұлттық компаниясының АҚШ-тағы өкілі Ғалымжан Матаев «Champion Foods» компаниясының Луизиана, Техас қалаларында, АҚШ-тың портты қалаларында, сондай-ақ Қытайда, Үндістанда және Парсы шығанағы елдерінде азық-түліктердің алдыңғы қатарлы жеткізушісі болып табы-латынын хабарлады.

- Қазіргі уақытта компанияның тапсырыс қоржыны 2 миллиард доллардан асады. Атаулы компаниямен байланыс орнатудың негізгі мақсаты - Қазақстаннан ауыл шаруашылығы өнімдері мен картобын қайта өңдеуді және жүйелі экспорттауды ұйымдастыру, - деді ол. Джонатан Бурингтің айтуынша, қазір әлемдік азық-түлік нарығының қарқынды дамуы жүріп жатыр.

- Павлодарлық картоптың климаттық жағдайлары мен сапалық параметрлері біздің кейбір штаттардағымен ұқсас-тығын байқап отырмыз. Біз Павлодар облысы өнімдерінің шет елдерге сатылуын және маркетингін жолға қоюға дайынбыз, - компания өкілі. Әбілқайыр Сқақов өңірдің үлкен өзен бойында орналасуының ерекшелігін атап өтті. Ертістің облыс аумағындағы ұзындығы 720 километрді құрайды. Бұл артықшылық суармалы егіншілікті, оның ішінде картоп шаруашылығын дамытудың жаңа мүмкіндіктерін ашады. Аймақтың суармалы егіншілік саласындағы әлеуеті 350-400 мың гектарға жетеді. Қазірдің өзінде облыста еліміздегі ең үлкен 10 мың гектарға жуық суармалы алқап бар. Аймақ басшысы компанияның вице-президентіне жергілікті билік ауыл шаруашылығы өнімдерін терең өңдеу және экспорт желісін кеңейту бойынша бірлескен жобаларға жан-жақты қолдау көрсетуге дайын екендігін жеткізді.

Облыс әкімінің баспасөз қызметі.

Количество показов: 884

Возврат к списку