Шын мықтылар ауылдан шығады

Халықтың денсаулығы - елдің дамуы үшін стратегиялық маңызы бар мәселе. Тәуелсіздік алған жылдардан бері қарай елімізде бұқаралық спортты дамыту бойынша орасан зор жұмыстар атқарылды. Бірақ шынын айту керек, бұл бағыттағы шаруаларды әлі де жетілдіре түскен абзал.

Жақында Мемлекет басшысы Парламент Мәжілісінің жалпы отырысында жасаған мәлімдемесінде алдағы уақытта ауылдық жерлерде спорттық нысандар салынатынын жеткізді. Бұл – тек салауатты өмір салтын жандандыруға ғана емес, жастардың жаман әдеттерден аулақ болуына әсер етпек. Түптеп келгенде, заң бұзудың алдын алмақ. Бұған дейін Жалпыұлттық іс-шаралар жоспары шеңберінде бұқаралық спортты дамытудың 2020-2025 жылдарға арналған кешенді жоспарының жобалары әзірленген еді. Онда спорттық нысандарды салумен қатар, балалар мен жасөспірімдердің дене шынықтыру клубтары және дәрігерлік-дене шынықтыру диспансерлерінің желісін кеңейту, дене шынықтыру және спорт бойынша сыныптан тыс сабақтарды жүргізгені үшін мұғалімдерге қосымша ақы енгізу, білім берудің барлық деңгейлерінде дене тәрбиесі сабақтарында ұлттық спорт түрлері бойынша міндетті компонентті енгізу, халықпен жұмыс істеу үшін спорт нұсқаушыларын штаттық бірліктермен қамтамасыз ету сияқты мәселелер қарастырылған. ҚР Мәдениет және спорт министрлігінің мәліметінше, бүгінде 1970 мектепте спорт залдары жоқ. Мектептердің 37 пайызы спорт құрал-жабдықтарына деген қажеттілікті сезінеді. Ал ауылдағы спорттық-сауықтыру кешендерінің желісі ауыл тұрғындарының тек 30 пайызын ғана қанағаттандырады екен. Қазіргі таңда елімізде 477 балалар мен жасөспірімдер спорт мектебі бар. Бұл спорт мектептерінде 357 мыңнан аса бала тегін спортпен айналысады. Бұған қоса жергілікті жерлерде 579 балалар-жасөспірімдер клубы және 107 дене тәрбиесі клубтары жұмыс істейді. Аталған спорт клубтарында 180,7 мың бала спортпен қамтылған. Бұл бағыттағы жұмыстар Павлодар облысында жүйелі атқарылуда. Содан болар, аймағымыз тұрақты түрде спортпен айналысатын адамдардың саны бойынша республика көлемінде 4-ші орында тұр. Сандарды сөйлетсек, бүгінде 230 мыңнан аса павлодарлық бұқаралық спортпен шұғылданады. Облыс спортына жауапты басшылар алдағы уақытта спортпен белсенді түрде айналысатын үздік үш аймақтың қатарына енуді жоспарлап отыр. Межеге жету үшін инфрақұрылым мәселесі мықтап қолға алынып, жаңа нысандардың салынуы маңызды. Бокстан АИБА-ның халықаралық төрешісі, жерлесіміз Елеусіз Дүйсеков ауылдағы балалар спортының дамуы кенже қалып қойғанын айтады.

- Материалдық-техникалық базаның әлсіздігі ауылдық, аудандық жерлерде бұқаралық спорттың дамуына негізгі тежеу болып отыр. Өңірлердегі спорт объектілерінің саны әлі де болса көбейтуді қажет етеді. Спорттық кешендердің барлығы дерлік облыс орталықтарында, қалаларда орын тепкен. Шалғайдағы аудан-ауылдардағы жұртшылық теннис корттары, баскетбол алаңдары мен спорттық аула клубтарынан мүлдем мақұрым. Кейбір қалалардың өзінде стритбол, шағын футбол, пинпонг сияқты бұқаралық спорт ойындары, ары кеткенде мереке күндері ғана өткізіледі. Тұрғындар алдағы уақытта билік басындағылар спортқа сөзбен емес, іспен серпін береді деп үміттеніп отыр, - дейді Е.Дүйсеков. Осы ретте, Әлем чемпионатының күміс жүлдегері Серік Теміржанов спортқа деген алғашқы қадамын ауылдан бастағанын атап өткен жөн.

- Облыс орталығына көшпестен бұрын Ертіс ауданы Панфилов ауылында тұрдық. Ағам ауылдық мектептің спорт залына барып, бокспен айналысып жүрді. Әу баста баса мән бермеппін. Кейін жарыстарға қатыса бастады. Жүлделі орындарға ие болды. Алғыс хат, медальдарды көріп, менің де қызығушылығым оянды. Ағам сияқты жаттығуларға үзбей қатыса бастадым. Уақыт өте тәжірибе толысты. Ауылдағы алғашқы бапкерім Жұмагелді Мәжіновтің еңбегін атап өткен жөн, - дейді С.Теміржанов. Бұқаралық спортты дамытудың бірден бір жолы – мектеп, колледж және жоғары оқу ордаларының спорт залдарында жаттығуға мүмкіндік жасау. Яғни, салауатты өмір салтын ұстанған адам міндетті түрде ірі спорттық нысандарды жағалап қажет емес. Мектептер мен колледждегі, сонымен қатар жоғары оқу орындарындағы спорт залдарды сабақтан тыс уақытта көпшіліктің пайдалануына рұқсат. Қала берді, дене шынықты-румен айналысу үшін аулаларды, саябақтарды жабдықтау – маңызды. Соңғы жылдары саябақтарда, қала көшелерінде бірқатар Street Workout, стритбол алаңдары көптеп салынғанын атап өткен жөн. Осылайша, Мемлекет басшысының тапсырмасына сәйкес, балалар және жасөспірімдер спортын дамытудың кешенді жоспары сәтті жүзеге асатын болса, зор нәтижелерге қол жеткізілетініне сенім мол. Былтыр елімізде балалардың шығармашылық үйірмелер мен спорт секцияларына баруын жан басына қаржыландыру қағидасы қабылданғаны белгілі. Бұған дейін тегін үйірмелер балалар жасөспірімдер мектептерінде, аула клубтарында ұйымдастырылып келгені рас. Жаңа бағдарламаға сәйкес, аймағымызда 4-17 жас аралығындағы балаларды тегін спорт үйірмесімен қамту жұмыстары жүйелі жалғасуда. Спорт түрлеріне келсек, аймағымызда 17 спорт түрі бойынша 87 секция, 239 топ жұмыс істеуде. Айтпақшы, ауылдағы дене шынықтыру пәні мұғалімдері немесе спорттық білімі, дәрежесі бар азаматтар үйірмелер аша алады. Ең әуелі жеке кәсіпкерлік ретінде тіркелуі тиіс. Кейін мектептің спорт залын спорт құралдарымен қоса жалға алуы керек. Өзінің қалауы бойынша кез келген спорт бағытында, яғни 72 спорт түрінен балаларды жаттықтыруға мүмкіндік бар. Жаңашылдық - ауылдағы балаларды спортқа баулумен қатар, дене шынықтыру пәні мұғалімдерін ынталандыруға тамаша мүмкіндік. Яғни, қосымша табыс көзі. Сәйкесінше, Мемлекет басшысы жиі тілге тиек ететін бұқаралық және балалар спортын дамыту жұмыстары оң жолға қойылмақ.

Оралхан ҚОЖАНОВ.