Суға түсу ережелерін сақтау керек

СОҢҒЫ ЖАРИЯЛАНЫМДАР

09.06.2022

Суға түсу ережелерін сақтау керек

Биыл өңірде суға түсу маусымы ерте басталды. Төтенше жағдайлар департаменті мен судан құтқару қызметі қазір күшейтілген кесте бойынша жұмыс істеуде. Жыл сайын төтеншеліктер тұрғындарға қауіпсіздік шарасын қатаң сақтауды ескертеді. Алайда былтыр жағажайда демалушылар арасында суға кетіп, абайсызда ажал құшқандар да болды. Мұның бәрі немқұрайдылық пен жауапсыздықтың салдарынан болатыны белгілі. Суға түсу маусымы кезінде оқыс оқиғалардың қалай алдын алуға болады? Осы орайда, Павлодар облысы ТЖД Азаматтық қорғаныс басқармасының аға офицері Теміржан Танжановпен әңгімелестік.

бас тақырып.jpg

- Шомылу маусымы кезінде қайғылы жағдайлардың алдын қалай алуға болады?

- Адамдардың су айдындарында қаза болуына жол бермеу бойынша профилактикалық жұмысты күшейту үшін күн сайын су айдындары мен апатты жағажайлардағы адамдар жаппай демалатын орындарда рейдтік іс-шаралар өткізіледі. Жүзу құралдарымен жиі-жиі патрульдеу жүргізіледі. Құтқарушылар жыл сайын тұрғындар арасында қауіпсіздік ережесін түсіндіріп, жағажайларды аралап, жадынамалар таратады. Бұқаралық ақпарат құралдары арқылы да сақтық шараларын ескертіп келеміз. Қазіргі кезде департамент мамандары тұрғындарды су қоймаларының арнайы жабдықталмаған жерінде суға түсуден сақтандырып отыр. Бұл да болса апаттың алдын алуға үлкен жәрдемін тигізеді.

- Рейдтік іс-шара кезінде көбіне қандай фактілер кездеседі?

- Үлкендердің қарауынсыз, жалғыз жүрген балаларды жиі кездестіреміз. Ата-анасын шақыртып, түсіндіру жұмыстарын жүргіземіз. Кейде ата-аналар жанындағы балаларына ие бола алмай қалатын жағдайлар да болады. Жағажайда демалып, ұл-қызының суда шомылып жүргенін немесе ойнап кеткенін білмей қалады. Бұл салғырттық та қайғылы оқиғаларға әкелуі мүмкін. Көп жағдайда ата-аналар жағажайда ішімдік ішіп, балаларын бақылай алмай қалып жатады. Бұл әрекеттері үшін жергілікті полиция қызметінің мамандары хаттама толтырып, әкімшілік жауапкершілікке тартады.

- Суға түсу маусымы кезінде нені ескеру керек?

- Балаларға үлкендердің қара-уынсыз суға түсуге рұқсат бермеңіз. Сондай-ақ, жасөспірімдерді суға тек арнайы күртеше мен қолға киетін құтқару құралдарымен жіберген дұрыс. Балалардың су астында бір-бірін тұншықтырып ойнауына рұқсат етпеңіз. Мұндай ойын қайғылы жағдайға әкеледі. Шомылуға рұқсат белгілері жоқ жерде сүңгуге болмайды. Суда шомылған балаға суық тиіп қалмағанын қадағалау қажет. Тоңып қалса, аяғының сіңірі тартылып қалуы мүмкін. Аяқ-қолы тартылған жағдайда сасқалақтамай, су бетінде қалып, құтқарушыларды көмекке шақыру қажет. Сол себепті, құтқару бекеті орналасқан орындарда ғана суға түскен абзал.

- Жасөспірімдердің суға кетуіне олардың малти алмауы негізгі себеп болып жатады. Бұл мәселе қалай шешімін таппақ?

- Биыл «Балалар жылы» аясында Павлодар облысы төтенше жағдайлар департаментімен елдегі тұңғыш «Бақытты балалық шақ» қауіпсіздік мектебі ашылды. Балаларды қорғау күні қарсаңында өз жұмысын бастаған аталмыш мектептің негізгі міндеті - балалар мен ересектерді апта сайын суда жүзуге тегін оқыту, суға батып бара жатқан адамға көмек көрсету бойынша шеберліктерін көрсету, халықты өрт сөндіруші және құтқарушы мамандығымен таныстыру болып табылады. Мектеп оқушылары бірінші күні құтқарушылар мен сүңгуірлердің кәсіби жабдықтары мен киім-кешектерімен танысты. Балаларға облыстың су айдындарындағы қайғылы оқиғалардың мысалдарын айтып, «Апаттар медицинасы орталығының» қызметкерлері мен «Қызыл Жарты Ай» еріктілері суға батып бара жатқан адамды құтқару бойынша мастер-кластар өткізді. Алдағы уақытта «Бақытты балалық шақ» қауіпсіздік мектебі 2022 жылғы шомылу маусымы бойы Павлодар қаласында сағат 10.00-ден 12.00-ге дейін орталық жағалаудағы «Ertis Promenade» сахнасында ашық аспан астында жұмыс істейтін болады.

- Әңгімеңізге рахмет.

Сұхбаттасқан - Алтынбек ЕЛЕМЕСҰЛЫ.

Количество показов: 700

Возврат к списку