Төлемақыны кімдер алады?

Электронды үкімет порталында Семей полигонындағы ядролық сынақтардың салдарынан зардап шеккен азаматтар үшін жаңа функция іске қосылды. Алдағы уақытта аталған аймақтарда тұрған жандар еgov.kz арқылы онлайн режимде мемлекеттен төлем алуға өтінім бере алады. Жаңа қызмет жыл басынан қолжетімді.

Ұлттық ақпараттық технологиялар АҚ басқарма төрағасы Ростислав Коняшкиннің мәлімдеуінше, бұл қызмет бұрын халыққа қызмет көрсету орталықтарында қағаз түрінде ғана көрсетілген екен.

- Азаматтарға ыңғайлы болуы үшін мемлекеттік органдармен бірлесіп, қызметті онлайн форматқа көшірдік. Әсіресе, Семей өңірінің тұрғындары үшін өте маңызды әрі қажетті қызмет түрі болып табылады. «ҰАТ» АҚ ұжымының атқарған жұмысының нәтижесінде онлайн мемлекеттік қызметтердің тізімі күннен-күнге өсіп келеді, - дейді Р.Коняшкин. Қызмет іске қосылғаннан бастап 311 азамат онлайн режимде өтемақы алумен қатар куәлікке өтініш берген. Павлодар облысында Май, Баянауыл, Аққулы аудандары полигон аймағына енетіні мәлім. Бірақ, аталған төлемді барлығы бірдей ала алмайды. Облыстық жұмыспен қамтуды үйлестіру және әлеуметтік бағдарламалар басқарма-сының басшысы Альмира Дисюпованың айтуынша, төтенше радиациялық және ең жоғары радиациялық қатер аумақтарына Май ауданына қарасты Ақжар және Май ауылдық округтері кіреді.

- Аталған қос елді мекеннің тұрғын-дары және 1998 жылғы 1 қаңтарға дейін зейнеткерлікке шыққан азаматтар үстемеақы алуға құқығы бар. Төтенше радиациялық қауіпті аймақ бойынша – 2,09 АЕК, ең жоғары радиациялық қауіпті аймақ бойынша 1,83 АЕК көлемінде ала алады, - дейді Альмира Аманқызы. Ал ең жоғары, жоғары, ең төмен, төмен радиациялық қатер, оған қоса жеңілдікті әлеуметтік-экономикалық мәртебесі бар аумақта тұратын азаматтарға аймақтар бойынша қосымша еңбекақы немесе жыл сайынғы ақылы қосымша демалыс қарастырылған. Жаңа қызметті пайдалану үшін алдымен еgov.kz порталында авторизациядан өту керек. Кейін басты беттегі «Әлеуметтік қамтамасыз ету» бөлімін таңдап, «Отбасыларға көмек» батырмасын басыңыз. Одан соң «Семей ядролық сынақ полигонындағы ядролық сынақтардың салдарынан зардап шеккен азаматтарды тіркеу, біржолғы өтемақы төлеу, куәлік беру» санатына өтіңіз. «Онлайн сұратым»-ға басып, қажетті қызмет түрін таңдайсыз. Егер ядролық сынақ салдарынан зардап шеккендерге жеңілдіктер мен өтемақылар алу құқығын растайтын куәлігіңіз болмаса, онда «Куәлік алу және телнұсқасын алу» қызметіне жүгінесіз. Сәйкесінше, бұл қызметті алу үшін жеке куәлік, 1949-1965, 1966-1990 аралығында полигон аумағында тұру фактісі мен кезеңді растайтын құжаттарды, әлеуметтік қорғау турасындағы бұрынғы куәлік (болған жағдайда) қажет болады. Ал растайтын құжаттар сақтал-маған жағдайда ядролық сынақтардың әсеріне ұшыраған аумақтарда тұрудың заңды фактілерін және кезеңін белгілеу туралы соттың шешімі ұсынылады. Ал тиісті құжаттарыңыз электронды үкімет порталында жүктелген болса, бірден онлайн режимде өтемақы алуға өтінішті жолдай аласыз. Ол үшін «Онлайн сұратым» батырмасынан соң, азаматтарға біржолғы мемлекеттік ақшалай өтемақы тағайындауға өтіп, ұялы телефон нөмі-ріңізді енгізіп, полигон аумағында тұру фактісі мен кезеңді растайтын куәліктің нөмірін жазып, жеке шотты растайсыз. Нәтижесінде, ЭЦҚ арқылы қол қоясыз. Мемлекеттік қызметті көрсету нәтижесі 20 жұмыс күні ішінде жасалады және пайдаланушының «Жеке кабинетінде» хабарлама ретінде сақталады. Хабарламаны алғаннан кейін өтініш беруші тұрғылықты жері бойынша жұмыспен қамту және әлеуметтік бағдарламалар бөлімінен жеке куәлікті, жеке куәліктің телнұсқасын ала алады. Атап өтер болсақ, облыс бойынша соңғы 3 жылда ядролық сынақтардан келтірілген залал үшін біржолғы ақшалай өтемақыны 607 адам алды. Оның ішінде 2020 жылы 342 адам, 2021 жылы 199 адам, 2022 жылдың алғашқы тоқсанында 66 адам бар. Еске салайық, біржолғы мемлекеттік ақшалай өтемақы өңірлер, республикалық маңызы бар және мемлекет астанасы бойынша өтемақы төлеу кестесіне сәйкес жүзеге асырылады.

Махаббат ТӨЛЕБАЙ

Количество показов: 868

Возврат к списку