Тәтті мамандық

СОҢҒЫ ЖАРИЯЛАНЫМДАР

21.05.2022

Тәтті мамандық

Әр бала кішкентай кезінен мамандық таңдауы керек. Мен кондитер кәсібіне қатты қызығып, ғылыми жоба жаздым. Бұл жобаны жүзеге асыруға анам көмектесті. Біз екеуіміз әр түрлі ас мәзірлерін зерттедік. Үш жылдан астам уақыт бойы сүйікті отбасымызды керемет тәттілермен қуанттық. Егер сіз өзіңіздің сүйікті мамандығыңызды бала кезінен ғылыми тұрғыдан зерттесеңіз, онда сіз болашақта нағыз кәсіби маман бола аласыз.

Енді мен сіздерге не істегенім туралы айтайын. Менің жобам «Тәтті мамандық» деп аталады. Мен бұл тақырыпты өзім таңдадым, өйткені тәттілер адамдардың көңіл-күйін көтереді. «Тәттіні жеген кезде, серотонин қуаныш пен ләззат гормонын шығарады, сондықтан көңіл–күй көтеріледі» деген ақпаратты оқыдым. Кондитер мамандығы - заманауи және өте сұранысқа ие. Мен өз алдыма міндеттер қойдым. Ғаламтордан кондитер мамандығы туралы ақпарат таптым, мамандықтың ерекшеліктерін білдім. Қаламызда осы мамандықты қайдан үйренуге болатыны жайлы хабар жинадым, кондитер мамандығы туралы жеке презентация жасадым. Мен интернеттегі ақпаратты көп зерттедім. Кондитерлік өнімдер, десерттер және басқа да тағамдар жасайтын кәсіби аспаз екенін түсіндім. Бұл мамандықтың өкілдерін ірі қонақүйлерде, мейрамханаларда және наубайханаларда кездестіруге болады. Көбінесе кондитер деп бизнесі кондитерлік өнімдерді сатумен байланысты адам аталады. Басты ерекшелігі, бұл жұмыстың көп бөлігі қолмен орындалады. Сондықтан кондитер болуы тиіс адамның саусақ моторикасы дамуы тиіс. Сонымен қатар, кондитер болғысы келетін адам талғамын, қиялын және шығармашылығын дамытса, керемет тағамдар шығады. Сонда ғана ол аспаздықтың нағыз шедеврлерін жасай алады. Кондитерлік сала Еуропада 15-16-ғасырларда дамыды. Осы кезеңде итальяндықтар тәттілер өндірудің ең жақсы шеберлері болып саналды. Тіпті, Италияда отбасылық рецептер ата-анадан балаларға берілетін кондитерлердің әулеті болған. Тәтті бәліштер мен тоқаштар қонақтарды қуантып қана қоймай, мерекелік үстелдің сәніне айналады. Кондитерлер өндірісте өзін көрсете отырып, цех бастығы бола алады немесе өз бизнесіңізбен айналыса аласыз. Көптеген кондитерлер шағын бизнес ашып, содан соң өндіріске дейін өседі. Ал кондитер мамандығын 9-сыныпты бітіргеннен кейін колледжден алуға болады. Көбінесе мемлекеттік білім мекемелерінде оқу тегін. Жақында үлкен практикалық жұмыс істедім. «Крендель» кондитерлік дүкеніне мамандық туралы білу үшін бардым. Аспаздар «Тәтті мамандық» тақырыбында ғылыми жұмыс жазып жатқанымды естігенде, олар мені цехқа шақырды. Мұнда түрлі пештерді көрдім. Тоқаш, пицца, тәтті бәліштің қалай жасалатынын бақыладым. Маған кондитер туралы жұмыс жазғаным үшін «Мақтау хат» берілді. Сондай-ақ, «Тоқаш» жасау бойынша шеберлік сағатына сертификат ұтып алдым. Қорытынды бойынша жұмысым үздік атанды. Тұңғыш Президент күніне арналған «Менің Отаным - Қазақстан» атты 21 өңірлік ғылыми–практикалық конференциясының жеңімпазы атандым. 154 оқушы арасында «Өз өлкеңді таны» секциясында бірінші орынға ие болдым. Құрметті балалар! Бала кезден бастап бір кәсіпті үйреніңіз, бұл өте керемет және қызықты. Сүйікті ісіңізді жақсы мамандар арасынан таба аласыз. Іске сәт!

Ягала ГЛЕБ, №30 орта мектептің 2 «В»-сынып оқушысы, Павлодар қаласы.

Количество показов: 515

Возврат к списку