Талқылау емес, бағыт беру керек

СОҢҒЫ ЖАРИЯЛАНЫМДАР

14.06.2022

Талқылау емес, бағыт беру керек

Еcіңізде ме, «Менің атым Қожа» фильмінде тентек Қожаны ұдайы мектеп жиналысына салушы еді ғой. Тәртібі мен оқу үлгерімі нашар деп. Біздегі мектептердегі ата-аналар жиналысы әлі күнге дейін сондай тұрғыда өтіп келеді. Біреудің баласының оқу үлгерімі туралы мұғалім барлық ата-аналар алдында ашық талқылап, оған «кінәлі» ата-анасы көптің көзінше «жерге кіретін тесік таппайтын». Бұл ескірген жүйені өзгерту туралы Білім және ғылым министрі таяуда айтты.

Ендігі жерде балалардың оқу үлгерімін жиналыста талқыға салудың керегі жоқ. ҚР Білім және ғылым министрі Асхат Аймағамбетов мектептегі ата-аналар жиналысын өткізуді заманға сай түрлендіру туралы айтты

«Мектепте ата-аналар жиналысын өткізу мәселесі бұған дейін де бірнеше рет көтерілді. Алдыңғы жылы ата-аналар жиналысын өткізудің жаңа формасына көшу керек деген тапсырма берілді. Баяғыдағыдай ата-аналарды жинап алып, балаларының оқу үлгерімі, қылықтарын талқыға салудың керегі жоқ. Басқа ата-ананың көзінше біреудің баласын талқыға салмаңыздар», - деді Асхат Аймағамбетов аталған ведомствода өткен аппараттық жиналыста.

Министрдің айтуынша, педагог әр ата-анаға баласының тәрбиесі мен біліміне қатысты толық ақпаратты беруі тиіс.

«Әрине, біреулердің көзінше баласын талқылағаннан кейін ата-аналар мектеп жиналысына келгісі келмейді. Сондықтан жиналыс өткізудің жаңа форматына көшу керек. Мұғалім ата-анаға баласының қандай пәндерді ұнататынын немесе қандай пәндерден қосымша сабақ керектігін айтып жеткізу керек. Жалпы, ата-анамен жұмыс істеу, маңызды жайт, сондықтан ерекше мән беру керектігін тағы еске саламын», - дейді ол.

Жалпы, министрдің айтып отырғаны бір ғана мәселе ғой. Әйтпесе, жеке тәртібінің көптің көзінше талқылануы - ата-анасын былай қойғанда, оқушы үшін зор моральдік соққы. Кімнің баласы туралы не айтылғанын ертеңінде екінші оқушы естіп келіп, тентекті тұтас сыныптың көзінше келемеждеуі қазіргі балалардың ар-ожданына тиетіні айдан анық. Оның соңы қорланған оқушының небір әрекетке баруына себеп болуы неғайбыл. Терезеден секіріп кетіп, жазым болған оқиға да елді елең еткізгені күні кеше ғана. Ендеше, жаңашылдықтың расында енгізілетін уақыты болған сыңайлы. Ал бұзық бала туралы ата-анасымен жеке кабинетте қалып сөйлесуіне де болады ғой.

Өз тілшіміз.

Количество показов: 585

Возврат к списку