Талаптының табысы артады

Биыл әлеуметтік маңызы бар тауарлардың бағасын тұрақты ұстап тұру мақсатында облыс орталығында фермерлік базар салынбақ. Сол арқылы өндірушілер мен тұтынушылар арасындағы делдалдық әрекеттерді жойып, өзімізде өндірілетін өнімдердің бағасын арзандату көзделіп отыр.

Аймақ басшысы Әбілқайыр Сқақовтың төрағалығымен өткен жиын барысында Президент Қасым-Жомарт Тоқаевтың Парламент Мәжілісі отырысы барысында берген тапсырмаларын іске асыру жолдары талқыланды. Облыстық экономика және бюджеттік жоспарлау басқармасының басшысы Ирина Назарчуктың айтуынша, өңірде инфляцияны тежеу үшін бірінші кезекте керек тауарларды қолжетімді ету бойынша ауқымды жұмыстар жүргізіледі. Соның бірі - сауда сөрелеріндегі азық-түлік бағасын бақылауды күшейту.

- Бұл ретте әлеуметтік маңызы бар өнімдердің өндірісі артады. Биыл қолданысқа берілетін фермерлік базар да тауарларды делдалдарсыз сатуға мүмкіндік береді. Соның нәтижесінде өнімдерге аз ғана үстемеақы қосылады. Жалпы, «Кәсіпкерлікті дамыту» ұлттық жобасы аясында осы жылы 6,2 миллиард теңге болатын 356 жобаны қолдау көзделіп отыр, - деді И.Назарчук. Оған қоса, 2022 жылы Павлодар облысына 792 миллиард теңге инвес-тиция тарту арқылы 60 жобаны іске қосып, 1000 жаңа жұмыс орнын ашу жоспарлануда. Кеңес отырысында жергілікті жер қойнауын пайдаланушылар өңірдің әлеуметтік-экономикалық дамуына бөлуі тиіс қаражаттың нақты көлемін белгілеу керек деген ұсыныс айтылды. Бүгінгі таңда мұндай төлемдердің көлемі кәсіпкерлермен тікелей келіссөздер жүргізу арқылы ғана анықталады. Ал нақты сома белгіленер болса, бюджетаралық қатынастарды реформалау ісі оң жолға қойылады. Сонымен қатар, жиын барысында тұрғындарды әлеуметтік қолдау, жастарды жұмысқа орналастыру, кәсіп ашуға гранттар беру мәселелері де қозғалды. Облыстық жұмыспен қамтуды үйлестіру және әлеуметтік бағдарламалар басқармасының басшысы Альмира Дисюпованың сөзінше, жұмысқа орналастыру кезінде «NEET» санатына жататын, яғни ешқайда оқымайтын әрі еш жерде жұмыс істемейтін жастарға басымдық берілетін болады.

- Жалақыны субсидиялауды 30 айлық есептік көрсеткішке дейін арттыра отырып, «Жастар тәжірибесі» жобасын іске асыру мерзімі 12 айға дейін ұзартылады. Сол сияқты «Бірінші жұмыс орны» жобасы 12 айдан 18 айға дейін жалғасады. Сонымен қатар, Мемлекет басшысы Қасым-Жомарт Тоқаев жеке ісін бастауға берілетін қайтарымсыз мемлекеттік грант көлемін 200-ден 400 айлық есептік көрсеткішке дейін көбейтуді тапсырды. Бұл қолдау шарасымен біздің өңірде 1,2 мыңнан астам адам қамтылады, - деді А.Дисюпова. Бұл ретте аймақ басшысы Әбілқайыр Сқақов жастар мектеп, колледж немесе жоғары оқу орнын бітірген соң бес жыл бойы мемлекеттік органдардың назарында болуы тиіс екенін атап өтті. Сонда ғана билік жастарға білім алуға, жұмысқа орналасуға және одан әрі дамуға нақты көмек көрсете алады. Қорытындылай келе, аймақ басшысы бір апта ішінде облыс әкімдігінің 2022 жылға арналған іс-шаралар бағдарла-масын дайындауды тапсырды. Бұл бағдарлама өңірдің барлық жергілікті атқарушы органдарының жұмысына негіз болуы керек. Сондай-ақ, кеңес кезінде эпидемио-логиялық жағдай талқыланды. Облыстық денсаулық сақтау басқармасының мәліметінше, бүгінде өңірде инфекциялық төсек-орын жүктемесі 37 пайызды, реанимациялық төсек-орын жүктемесі 17 пайызды құрап отыр. Әйтсе де, елімізде «Омикрон» штамының анықта-луына байланысты коронавирустың таралуы бойынша болжамдар қайта қаралды. Ең пессимистік сценарийге сәйкес, елдегі COVID-19 жаңа жағдайларының саны күніне 40 мыңға жетуі мүмкін. Бұл жергілікті денсаулық сақтау жүйесінде қазірдің өзінде инфекциялық аурулардың алдын алумен айналысу керек дегенді білдіреді.

- Қалалар мен аудандардың әкімдері, дәрігерлер егу науқанына бар күшін салуы керек. Бас қалада коронавирусты жұқтырған тұрғындар саны бірден бірнеше есеге өсті. Бұл толқын жақын арада бізге де жетеді. Сондықтан Павлодар облысының тұрғындарын белсенді вакцинациялау және қайта вакцинациялау қажет. Өткен жылы вакцинацияның шарықтау шегі маусым-шілде айларында болса, демек қазір ревакцинациядан өтетін кез келді, - деді Ә.Сқақов. Айта кетейік, соңғы тәулікте өңірде 2,8 мыңнан астам адам ревакцинациядан өтті. Тұрғындарды қауіпті індеттен қорғау үшін күніне 4,5–5 мың адам екпе алуы керек.

Облыс әкімінің баспасөз қызметі.

Суретті түсірген - Валерий Бугаев.