Толайым табыстар жылы

Жылдың төрт мезгілінде тыным таппай тер төгетін ауыл шаруашылығы қызметкерлерінің еңбегі өлшеусіз. Ел қамбасының астыққа, халықтың ақ дастарханының асқа толуы осы жанкешті еңбек өкілдерінің арқасы.

Кеше Естай атындағы мәдениет сарайында ауыл шаруа-шылығы, тамақ және қайта өңдеу өнеркәсібі қызметкерлерінің кәсіби мерекесіне арналған салтанатты жиын өтті. Облыс әкімі Әбілқайыр Сқақов сала қызметкерлерін кәсіби мерекемен құттықтап, қол жеткен толайым табыстарға тоқталды.

- Биыл алғаш рет павлодарлық аграршылар рекордтық мөлшерде бір миллион тоннадан астам астық жинады. Жергілікті тауар өндірушілердің өнімдері жоғары сапаға ие. Мал шаруашылығында оң динамика байқалады. Биыл өңірде ірі қара мал басының шетелдік селекциясының 3600-ге артуы - сапаның да жақсарғанының белгісі. Ауыл шаруашылығы техникасы да айтарлықтай жаңарып келеді. Құрметті жерлестер, сіздердің еңбектеріңізді жоғары бағалаймыз және жан-жақты қолдау көрсетуге әрқашан дайынбыз деп сендіргім келеді. Сіздерге шын жүректен зор денсаулық, отбасыларыңызға амандық, жаңа жетістіктер және қажырлы еңбектеріңізге табыс тілеймін, – деді Ә.Сқақов. Кәсіби мерекеге орай Май ауданы ауыл шаруашылығы саласының ардагері Мақсұтхан Есмиқанов, Успен ауданы әкімінің орынбасары Қабиболла Абушахманов, Ақтоғай ауданы «Қайрат» ШҚ-ның басшысы Рымбек Мұқанов, Тереңкөл ауданы «Вильгельм» ШҚ-ның басшысы Александр Вильгельм «Облыс алдында сіңірген еңбегі үшін» төсбелгісімен марапатталды. Сондай-ақ Екібастұз қаласы «Табыс» ШҚ-ның басшысы Манат Алғамбаров, Тереңкөл ауданы «Құндыз» ШҚ басшысы Игорь Щербак, Ертіс ауданы «Санжар» ШҚ-ның басшысы Ерболат Сейдахмет, Ақтоғай ауданы «Весна» ШҚ-ның басшысы Анатолий Филипишин ҚР Ауыл шаруашылығы министрлігінің «Еңбек ардагері» медалімен марапатталды. Ауыл шаруашылығы саласының тағы бір топ өкілі облыс әкімінің Құрмет грамоталары мен Алғыс хаттарына ие болды. Марапатталушылар қатарында ҚР Ауыл шаруашылығы қызметкер-лерінің салалық кәсіподағының I, III дәрежелі «Еңбек даңқы» алтын және қола белгілеріне ие болған «Победа» ЖШС-нің директоры Владимир Поляков пен «Галицкое» ЖШС-нің механизаторы Александр Гофман да бар. Агроөнеркәсіп кешенінің дамуына елеулі үлес қосқаны және жоғары көрсеткіш-терге жеткені үшін Успен ауданы - I, Железин ауданы - II, Шарбақты ауданы III дәрежелі дипломдармен марапатталды. Кәсіби мерекеге орай ұйымдастырылған облыстың агроөнер-кәсіптік кешенінің жетістіктері көрмесінде өңірдің 84 ауыл шаруашылығы құрылымының өнім-дері ұсынылды. Сондай-ақ Инвес-торлар үйінде ауыл шаруашылығы құрылымдарының өкілдеріне арналған «ҚР Ауыл шаруашылығы өнімдерін өңдеуді дамытудағы мемлекеттік қолдау шаралары» атты оқыту тренингі өткізілді. Салтанатты кеш Иса Байзақов атындағы облыстық филармониясының мерекелік концертіне ұласты. Кеш қонағы - танымал әнші, ҚР еңбек сіңірген қайраткері Меруерт Түсіпбаева әсем әннен шашу шашты.

Т.ӘБІЛДА.