Әуеден де, жерден де өңдеуде

СОҢҒЫ ЖАРИЯЛАНЫМДАР

17.05.2022

Әуеден де, жерден де өңдеуде

Облыста жылдан-жылға шыбын-шіркейді азайтуға бағытталған санитарлық шаралар күшейіп келеді. Биыл шыбын-шіркейлерді екі есе қарқынды күшпен улау жұмыстары жоспарлануда. Сондай-ақ, дезинсекциялық іс-шаралар өткен жылмен салыстырғанда ертерек басталды. Қансорғыштармен күресудің келесі кезеңі - өзендерді өңдеу. Бұл жұмыстар шамамен 18 мамырда Ертістің негізгі арнасы бойынша басталмақ. Осы орайда бұл бағытта қандай жұмыстар атқарылып жатқандығы туралы Жер қойнауын пайдалану, қоршаған орта және су ресурстары басқармасының бөлім басшысы Мақпал Лепесовамен әңгімелестік.

- Биыл қансорғыштарға қарсы күрес жұмыстары қалай жүзеге асуда?

- Ағымдағы жылы шыбын-шіркейлерге қарсы күрес жұмыс-тары күшейе түспек. Өткен жылмен салыстырғанда зиянкес-терге қарсы ауқымды күрес 13 күн бұрын басталған болатын. Шығыс Қазақстан облысының су қоймасынан табиғатты қорғау мақсатында су жіберу параметрлері бекітілді. Суды ағызудың жалпы көлемі 4,64 км³, ұзақтығы - 24 тәулік. Яғни, судың өту мерзімі 15 сәуірде басталып, 8 мамырда аяқталады. Сондай-ақ, 1 130,6 км аумақты қамтитын Павлодар, Ақсу қалалары мен Ақтоғай, Железин, Ертіс, Тереңкөл, Аққулы, Май, Павлодар секілді өзен жағасында орналасқан аудандарда баржадан биологиялық препаратты ағызу жолымен Ертіс өзенін екі-төрт рет өңдеу жобаға енгізілді. Айта кетерлігі, өткен жылдардан өзгеше биыл аса нүктелі және тиімді авиа өңдеу үшін габаритті моторлы ұшу аппараттарын қолдану жоспарланып отыр.

- Авиаөңдеу қалай өтеді?

- Ғылыми топтың ұсынысы негізінде 15 мамырда «QSM Engineering» ЖШС Павлодар қаласындағы Усолка шағын ауданы мен Павлодар ауылының жайылма аумағында авиаөңдеу жүргізді. Сонымен бірге, «Тек.А.Тек.kz» ЖШС мердігерлік ұйымы Ертіс өзенінде шіркейлердің дернәсілдеріне фенологиялық бақылау жүргізді. Авиа-борттардың екі жерде – Ленин кенті мен Кенжекөл ауылында орналасуы қысқа мерзім ішінде өңделетін алаңдарды барынша қамтуға және қанатты жәндіктердің санын азайтуға көмектесті. Өңдеу екі АН-2 борттарымен жүргізіледі, олар бұрынғыдай Ленин кентінде, сондай-ақ, қосымша Кенжекөл ауылында екі нүктеде орналастырылған. Авиажұмыстардың жалпы ауданы 27 мың гектарды немесе 21 авиа алаңды құрайды. Бірінші кезекте біз жыл сайын шыбын-шіркейдің жаппай ұшуы орын алатын Павлодарское ауылы мен Жаңаауыл кентінің жанындағы (№1,2,3) авиаалаңдарды өңдедік. Жайылмада авиаөңдеу 2 мамырда басталды. Оның жалпы ауданы – 27 мың гектар, бұл – 21 әуе алаңы. Бүгінгі таңда 73 ұшу орындалды. 18 мамырда Ертістің негізгі арнасы бойынша өндеу жұмыстары басталады.

- Химиялық препаратпен қоса биыл қансорғыштарға қарсы күресте биологиялық қоспа да қолданылуда. Нәтиже жайлы айтуға әлі ерте ме?

- Қазірдің өзінде қансорғыштар өткен жылмен салыстырғанда әлдеқайда аз екенін байқауға болады. Биылдан бастап ғылыми топтың ұсынысы бойынша авиа-өңдеу үшін биологиялық препарат суспензиясының концентрациясы ерте дайындалып, мөлшері көбей-тілді. Бұл жұмыстар тікелей Новосібір қаласындағы «Сиббио-фарм» дайындаушы-зауыт техно-логының қатысуымен жүргізілді. Өткен жылмен салыстырғанда ерітіндінің концентрациясы 10-нан 30 пайызға дейін үш есеге көбейтілген. Бұл қысқа мерзімде өңде-летін аумақты барынша қамтуға және қанатты жәндіктердің санын азайтуға мүмкіндік береді. Сонымен қатар, дезинсекциялық іс-шараларға түзетулер енгізілді. Биологиялық өнімнің концентрациясын арттырып, ұшу уақыты қысқарды. Бір рет ұшқанда өңделетін аумақтың көлемі 120 гектардан 384 гектарға дейін өсті. Дегенмен ағаштар өсетін жерлерді ұшақпен өңдеу мүмкін емес. Мұндай учаскелер аспалы бүріккіштердің көмегімен жаяу өңделеді. Ғылыми топ әрбір өңдеуден соң 24, 48 және 72 сағаттан кейін тиімділікті анықтау бойынша фенологиялық бақылау жүргізеді. Бүгінгі таңда масалардың дернәсіл формасының тиімділігі 90%-дан асады. Қансорғыштарға қарсы шаралардың әрбір кезеңі мен нәтижелерін @gnus.tabigat_pv аккаунтынан көруге болады. Сонымен қатар, қоғамдық бақылау тобы жұмыс істейді.

- Әңгімеңізге рахмет.

Алтынбек ЕЛЕМЕСҰЛЫ.

Количество показов: 616

Возврат к списку