Заманға сай жаңа зауыт

Облыс орталығындағы арнайы экономикалық аймақта мұнай-химия өнімдерін өндіретін толық циклды зауыт іске қосылды. Кәсіпорын жыл сайын 30 мың тонна реагенттер мен қоспалар жасап шығаруды жоспарлап отыр. Жаңа өндіріс экологиялық талаптар мен технологиялық регламентке сай, қоршаған ортаға еш зияны жоқ.

Бұрнағы күні аймақ басшысы Әбілқайыр Сқақов Павлодар қаласының арнайы экономикалық аймағына барып, кәріздік тазарту жүйесінің құрылыс барысымен танысты. Сондай-ақ жаңа зауыттың ашылуына қатысты. «Қазмұнайхим» ЖШС-не тиесілі жаңа зауыт - Қазақстанда мұнай-химия өнімдерін толық циклмен өндіретін алғашқы кәсіпорын. Оның қуаттылығы жылына 30 мың тонна реагент пен мұнай-химия қоспаларын шығаруға мүмкіндік береді. Осылайша, аталмыш зауыт еліміздің мұнай өндіруші және мұнай өңдеуші кәсіпорындарын өз өнімімен толық қамтамасыз етпек. Сондай-ақ, кәсіпорын ТМД, Еуропалық Одақ, Таяу Шығыс және АҚШ елдерімен байланыс орнатуды көздейді. Зауыт құрылысы басталғанға дейін мамандар кәсіпорынның қоршаған ортаға әсерін бағалау бойынша қоғамдық тыңдаулар өткізді. Осыдан кейін жұмыс жобасына мемлекеттік экологиялық сараптаманың оң қорытындысы алынды. Экологиялық кодексті сақтау шеңберінде кәсіпорын өндірістік экологиялық бақылауды орындайтын болады. Объект аумағында жерасты суларының жай-күйіне мониторинг жүргізіліп, төрт бақылау ұңғымасы бұрғыланады. Кәсіпорын орналасқан ауданда радиа-циялық ластанудың табиғи және техногендік көздері жоқ. Сондай-ақ, зауытта «Alta Rain 1» типті құрамында мұнайы бар сарқынды суларды тазарту құрылыстарының жиынтық блок-модульді станциясы орнатылды. Облыс әкімі отандық кәсіпкерлер жүзеге асырған аталмыш жобаның маңыздылығын атап өтіп, іске қосылған жаңа зауыттың қызметкерлеріне жемісті еңбек тіледі.

- Павлодар облысында жүзеге асырылып жатқан технологиялық үдеріс заманауи әлемдік экономика жағдайында жылдам шешім қабылдап, әрі нарықтың сұранысына жауап береді. Кәсіпорын мемлекет, бизнес және ғылымның өзара әрекеттестігін іс жүзінде көрсетіп отыр. Бұл осындай жобалардың жиынтығын жүзеге асыру арқылы терең зерттеулер жүргізуге болатынын көрсетеді, - деді Әбілқайыр Сқақов. Сондай-ақ, облыс әкімі бұл отандық кәсіпкерлермен мұнай-химия саласында толық іске асырылып жатқан алғашқы жоба екенін жеткізді.

- Бұл жобаның ғылыми ойдың көмегімен іске асырылып жатқандығы қуантады. Өңірімізде реагенттер мен қоспаларды өндірудің толық циклын қамтамасыз ететін технологиялық жоба кезең-кезеңмен жүзеге асуда. Сондай-ақ, бұл бизнес және ғылыми-ауқымды инвестициялық жобаларды табысты іске асырудың үлгісі болып табылады, - деді әкім. Зауыт үш кезең бойынша жүзеге асырылмақ. Инвестициялардың жалпы көлемі 2,5 млрд теңгені құрады. Қазіргі кездің өзінде зауытта 30 тұрақты жұмыс орны ашылды. Зауыт директоры Ален Кенжебаевтың айтуынша, ағымдағы жылдың төртінші тоқсанында кәсіпорында жоғары температуралы синтез қондырғы-сының құрылысы жоспарлануда.

- Мұнай-химия өндірісін таңдағанымыз кездейсоқ емес. Себебі, Павлодар облысы бұл бағытта елімізде көш бастап келе жатқан аймақтардың бірі болып есептеледі. Жауапты бас- қармамен, әкімдікпен алғашқы кездесуде біз басқа жерге бармай-ақ, осында жұмыс істей алатынымызды айқын түсіндік. Облыс әкімдігіне жасаған көмегімен жедел жұмысы үшін алғыс айтқым келеді, - деді Ален Кенжебаев. Сонымен қатар, кәсіпорын директоры Торайғыров университетімен келісімшартқа отырып, білім беру мекемесінің жетекші ғалымдарымен бірлесе жұмыс істеуді мақсат тұтып отыр. Себебі, бүгінгі таңда кәсіпорында жұмысшылардың денін жастар құрайды. Мұнда жас мамандарды оқыту ісіне ерекше көңіл бөлінбек. Торайғыров университетінің ректоры Еркін Садықовтың сөзінше, университет ғалымдары кәсіпорын мамандары мен жастарды әлемдік технологияларды меңгеруге үйретеді.

- «Қазмұнайхим» ЖШС инженерлік қолдауды жүзеге асырып, сервистік қызметтер көрсетеді және мұнай өндіру мен мұнай өңдеу кешендерінің кәсіпорындары үшін жабдықтар жеткізумен айналысатын болады. Жаңа кәсіпорын мұнай-химия кластері белсенді дамып келе жатқан біздің өңірдің өндірістік базасын күшейтуде. Сонымен қатар, зауыт университеттің сенімді серіктесіне айналады. Жоба аясында ғылыми білім беру бағытында сенімді жұмыс істелмек. Біздің ЖОО қажетті ғылыми зерттеулер мен қажетті мамандарды даярлауда «Қазмұнайхимді» қолдауға дайын. «ToU» химия саласындағы сарапшыларымен танымал. Сондықтан жаңа кәсіпорын мен университет бір-біріне пайдалы болады, - деді университет ректоры. Бұдан бөлек, облыс әкімі қаладағы арнайы экономикалық аймақта орналасқан шығарындыларды азайту және сарқынды суларды тазарту үшін салынып жатқан кәріздік тазарту нысанының (КТН) құрылысын тексерді. Бүгінгі күні мұнда негізгі корпус ғимараты салынып, биологиялық резервуар жабдықтарын орнату бойынша жұмыстар аяқталуға жақын. Сондай-ақ, шығарындыларды және шайынды суларды азайту үшін тазалау қондырғыларын құру жұмыстары жүріп жатыр. Аймақ басшысы аталмыш жобаны жүзеге асыру барысымен танысып, мердігер компанияларға құрылыстың сапасына мән беруін тапсырды. Онымен қоса, Әбілқайыр Сқақов арнайы экономикалық аймақтың инфрақұрылымын дамыту және оған ары қарай қызмет көрсету бойынша бірқатар тапсырмалар берді. Жалпы, «Павлодар» АЭА аумағында барлығы 18 кәсіпорын жұмыс істейді.

А.ЕЛЕМЕСҰЛЫ.

Суреттерді түсірген - Валерий Бугаев.