Өзгерістер жаңаруға бастайды

Мемлекет басшысы Қасым-Жомарт Тоқаев «Amanat» партиясының кезектен тыс XXIII съезіне қатысты. Президент жиын делегаттарына мемлекет пен қоғамды түбегейлі жаңарту үдерісі басталғанын айтты. «Аmаnаt» осы жүйелі өзгерістерге белсене атсалысып келе жатқанын атап өтті.

Сонымен қатар партияның қолға алынған реформаларға жан-жақты қолдау көрсетіп, «халық үніне құлақ асатын мемлекет» тұжырымдамасын тиімді жүзеге асыруға қосып жатқан үлесіне тоқталды.

– «Аmаnаt» әлеуметтік әділдік қағидатын орнықтыруға әрдайым баса мән береді. Мемлекеттілікті нығайту және ел бірлігін бекемдеу – ұйымның айрықша миссиясының бірі. Өткен съезде партияға ребрендинг жасау қолға алынды. Сондай-ақ, оны институционалдық тұрғыдан жаңарту жұмысы басталды. Партия бұл міндеттерді орындауға дереу кірісіп кетті. Нақты нәтиже бар, өзгерістерді қазірдің өзінде көріп отырмыз. Осы қарқынды бәсеңдетпей, жұмысты одан әрі жалғастыру керек, – деді Мемлекет басшысы. Президент наурыз айының ортасында Қазақстан халқына арнаған Жолдауында саяси реформалардың ауқымды бағдарламасын ұсынғанын еске салды. Сонымен қатар бірден Конституцияға енгізілетін өзгерістер мен толықтырулардың жобасын дайындау жөнінде ауқымды жұмыс басталғанын, онсыз жоспарланған саяси реформаларды тиімді жүзеге асыру мүмкін емес екенін атап өтті.

– Конституциялық реформаның мақсаты – елімізді саяси тұрғыдан одан әрі жан-жақты жаңғыртудың берік іргетасын қалау. Өткен аптада Конституциялық кеңеске түзетулер жобасы жолданды. Оның қа- былдануы мемлекеттік институттарды құрудың және қызметінің мүлде жаңа үлгісін – Жаңа Қазақстанды құруға мүмкіндік береді. Азаматтар тарапынан: «Жаңа Қазақстан дегеніміз не?», - деген сауал жиі қойылып жүр. Менің ойымша, бұл сұраққа қысқа да нұсқа жауап беруге болады. Жаңа Қазақстан дегеніміз – шын мәнінде Әділетті Қазақстан. Азаматтарға әлеуметтік әділдік жетіспейтінін мойын-дайықшы. Қарапайым халықтың мүддесі үнемі елене бермейді, кейде, тіпті әділетсіздік мемлекеттік аппарат өкіл- дері тарапынан да жасалып жатады. Азаматтардың мемлекеттік мекемелерге сенімсіздігі осыдан туындайды. Сондықтан «Amanat» партиясының алдында осы олқылықтардың орнын толтыру міндеті тұр. Азаматтық қоғам мен билік арасындағы дәнекер болу үшін сіздер халық өкілдерімен етене жұмыс істеулеріңіз керек, – деді Қасым-Жомарт Тоқаев. Сонымен қатар Конституцияға енгізілген өзгерістер мен толықтырулар елдің бүкіл саяси архитектурасын кешенді түрде қайта қарауға, билік тармақтары арасындағы тежеу мен тепе-теңдіктің неғұрлым теңгерімді жүйесін құруға бағытталғанын айтты. Президенттің пікірінше, біз супер-президенттік басқару түрінен түбегейлі бас тартамыз, Парламент пен мәслихаттардың өкілеттігін күшейтеміз. Партиялық-саяси жүйені жаңғырту – басым бағыттың бірі. Мемлекет басшысы партиялар мен сайлау туралы заңнамаларды либерализациялау қоғамның рөлін күшейтеді. Бұл – биліктің барлық деңгейінде қабылданатын шешімдеріне қатысты. Президенттің пайымынша, азаматтардың дауысы үшін бәсеке күшейіп, саяси үдерістердің қарқыны мен мазмұны өзгереді.

– Жалпы алғанда, партиялық алаңда сең қозғалғанын көріп отырмыз. «Adal» партиясының «Аmanat» партия-сымен бірігу жөніндегі бастамасы – басталған өзгерістердің жарқын көрінісі. «Adal» партиясының жетекшілері мен мүшелеріне осы маңызды шешімдері үшін ризашылығымды білдіремін. Жаңа Қазақстанды құрамыз десек, елге жанашыр қоғамдық-саяси күштердің бәрі жұмылуы керек. Бұл ретте, партиялардың өзара тіл табысып, саяси жүйені дамытуы аса маңызды. Сондықтан, «Adal» партиясының бастамасын қолдап, онымен біріккен жөн деп санаймын. «Adal» – өз жақтастары бар, қалыптасқан партия. Саяси бәсеке артып келе жатқан қазіргі кезеңде мұның айрықша мәні зор, – деді Қасым-Жомарт Тоқаев. Жиында Мемлекет басшысы жауапты әрі аса маңызды кезеңге қадам басқанымызға тоқталды. Президенттің айтуынша, конституциялық реформа – Тәуелсіздік тарихындағы жаңа белес. Мұның бәрі уақыт талабынан және қоғам сұранысынан туындап отыр.

– Мен бұған дейін партия төрағасы лауазымынан босап, ұйым қатарынан шығатынымды айттым. Осы ұйғарымды жүзеге асыратын кез келді. Бүгіннен бастап «Amanat» партиясының төрағасы ретінде өкілеттігімді тоқтатып, партиядан шығу туралы шешім қабылдадым. Бұл қадамның символдық мәні бар. Осы орайда, Президент сайлауында маған сенім артып, қолдағандарыңыз үшін баршаңызға алғысымды айтамын. Сондай-ақ, жауапты сәтте партия тізгінін сеніп тапсырғандарыңыз үшін ризашылығымды білдіремін. Біз бірлесіп, көп жұмыс атқардық. Дегенмен, уақыт бір орында тұрмайды. Қазір талай нәрсе өзгеруде. Алдымызда ауқымды міндеттер бар. Бүгінде еліміздегі барлық саланы түбегейлі монополиядан арылту аса маңызды. Осы үдерістен саяси жүйе де сырт қалмауы керек. Мемлекет басшысы ешбір партияға басымдық бермегені жөн, яғни саяси тұрғыдан бейтарап болуы қажет. Бұл – менің айқын ұстанымым, – деді Қасым-Жомарт Тоқаев. Президенттің пікірінше, мұндай қағида сайлауға қатысатын барлық күштерге тең мүмкіндік туғызады. Саяси жүйеде әділдіктің орнауына жол ашады. Партия атқарушы билікке тәуелді болмаса, оған халықтың сенімі нығайып, беделі артады.

– Қазір ұйым Мәжілісте және мәслихаттарда едәуір басымдыққа ие болып отыр. Сондықтан Үкімет пен әкімдіктердің жұмысына қатаң бақылау жасай алады. Президент партия қатарынан шыққанымен, ұйымның стратегиялық бағдары өзгермейді деп ойлаймын. «Аmаnаt» еліміздің саяси өмірінде ерекше орны бар ұйым ретінде қала беретіні анық. Саясаттағы сабақтастық сақталып, партия ел игілігі үшін жасап жатқан жұмыстарын жалғастыра береді, – деді Мемлекет басшысы. Қасым-Жомарт Тоқаев партияның төрағасы лауазымына Парламент Мәжілісінің төрағасы Ерлан Қошановты ұсынып, оған ұйымдастыру қабілеті жоғары, тәжірибелі әрі білікті азамат деп баға берді. Съезд делегаттары Президенттің ұсынысын қолдап, Ерлан Қошановтың кандидатурасына бірауыздан дауыс берді. Мемлекет басшысы бүгінгі өзгерістер «Аmаnаt» партиясының заман талабына сай жаңара түсуіне жол ашатынына сенім білдірді.

akorda.kz

Байланыс нығаяды

«Amanat» партиясының кезектен тыс XXIII съезіне қатысқан павлодарлық делегаттар Мемлекет басшысының бастамаларына қатысты өз пікірлерін білдіруде. Солардың бірнешеуін жариялап отырмыз.

- Елімізде маңызды саяси оқиға орын алды. «AMANAT» партиясына «АDAL» партиясы қосылды. Бұл - әлемдік партия жүйесінде кездесетін стандартты құбылыс. Сондай-ақ, Президент партиядан шыққанымен, «AMANAT»-тың стратегиялық бағдары өзгермейді. «AMANAT» – еліміздегі ең басты саяси күш, партияның Мәжіліс пен мәслихаттардағы үстемдігі айқын. Партияның ресурсы «адалдықтардың» халыққа ұсынған идеяларын толық көлемде іске асыруын қамтамасыз ете алады. Себебі әр өңірде, аудандарда партияның филиалдары бар. «ADAL» партиясы 2020 жылы ребрендингтен кейін өз жұмысын қайта құруды қолға алып, айтарлықтай позицияларын нығайтты. Олар өз кезегінде, партияны жаңғырту мен трансформациялау жұмыстарында сапалы үлестерін қоса алады.

Илья ТЕРЕНЧЕНКО,
«AMANAT» партиясы облыстық
филиалының атқарушы хатшысы.

- Мемлекет басшы-сының жүргізіп отырған сарабдал саясаты қазақстандықтардың тұрмысын жақсартуға бағытталған. Оның суперпрезиденттік басқару түрінен түбегейлі бас тартуы осыған дәлел. «Жаңа Қазақстанды құру үшін батыл өзгерістер жасауымыз керек» деді Президент. Біз Жаңа Қазақстан құрылысына белсене қатысып, елдегі өзгерістерге қолдау жасағымыз келеді. Осыған орай, «Адал» партиясының мүшелері бірауыздан «Аманат» партиясына қосылу туралы шешім қабылдады. Әлемде қанша дағдарыстар, күйзелістер болып жатқанмен Қазақстан өзінің әлеуметтік саясатынан айныған жоқ. Ендігі кезекте екі партияның мүшелері де білек сыбана жұмысқа кірісуі керек. «Бірлік бар жерде тірлік бар» дегендей, барлық жетістік өзімізге, еңбегімізге байланысты.

Ақмарал СейІтқұлова,
«ADAL» партиясы облыстық
филиалы төрағасының орынбасары.

- Мемлекет басшысы атап өткендей, Жаңа Қазақстанның құрылуы ең алдымен, әділетті мемлекет құру деген сөз. Ол барлық жерде заңнамалық деңгейде болуы керек. Мемлекеттік органдардың тиісті жұмыс істемеуіне әсер ететін жағдайлар да бар. Бұл туралы біз әрдайым айтамыз және бұл бағытта одан әрі жұмыс жүргізілетін болады. Жастар мәселесін де шешу керек. Қаңтар айындағы оқиғалар жастардың бірқатар проблемалары бар екенін көрсетті, соның ішінде жұмыспен қамту, жұмысқа орналастыру мәселелері бар. Жаңадан қосылып отырған «Адал» партиясы жаңа адами ресурстар әкеліп, проблемаларды шешуде жаңа көзқарастар беретіні анық. Өткен съезде Мемлекет басшысы «Тазалық» жаңа партиялық жобасын ұсынды. Мұндай шаралар бұрын да жасалған, бірақ қазір бұл процесс жаңартылған. Ағаш отырғызғанда оған күтім жасау керек екенін түсіндіреміз. Шараға балаларды, жастарды тартамыз. Яғни саяси жоспардағы іс-шаралар енді танымдық сипатқа ие болады.

Ирина ЧИДУНЧИ,
«AMANAT» партиясының мүшесі.