Жұмыла білген жұрт жығылмайды

2022 жылдың қаңтары ел тарихында мәңгілік қалары сөзсіз. 30 жылдық тәуелсіздік тарихында біз алғаш рет аса күрделі және қатерлі кезеңге тап болдық. Елдің береке-бірлігіне сызат түсіріп, іргесін сөкпек болғандардың кесірінен талай қазақстандық жапа шекті. Ғимараттар қызыл жалынға оранып, дүние-мүлік қирады. Уақыт өте келе олардың барлығы қалпына келер. Тек отандастардың жүрегіне осы оқиғадан соң түскен сызат өше қоймас...

Мемлекет басшысы Қасым-Жомарт Тоқаев Мәжіліс отырысында сөйлеген сөзі барысында еліміз душар болған ауыр қасіреттің себептерін саралап, оның салдарына нақты баға беру – алдымызда тұрған маңызды міндет екенін атап көрсетті. Сонымен қатар, Қазақстанды одан әрі дамытудың жоба-жоспарын айқындап, әлеуметтік-экономикалық ахуалды арттырудың нақты тетіктерін атады. Бұл ретте қорғаныс, полиция салаларымен қатар, мемлекеттік қызмет, ауыл шаруашылығы, білім, денсаулық, цифрландыру сынды бағыттарда ауқымды жұмыс жүргізу керектігі айтылды. «Nur Otan» партиясы Төрағасының бірінші орынбасары Бауыржан Байбектің төрағалығымен өткен жиын барысында да Президент Қасым-Жомарт Тоқаев белгілеген міндеттерді іске асыру жолдары сараланды. Бауыржан Қыдырғалиұлы «Nur Otan» партиясы әлеуметтік-экономикалық саладағы нақты міндет-терді орындауға өзінің бүкіл ресурстарын іске қосатынын мәлімдеді. Бұл ретте нұротандықтардың ел басына күн туған кезде жұртпен бірге күш біріктіріп, қиын кезеңнен шығуға белсене атсалысқанын атап өткен жөн. Павлодар облысының аумағында партияластар, барлық деңгейдегі мәслихат депутаттары мен белсенді азаматтар қоғамдық тәртіпті сақтап, халық тыныштығын қорғап жүрген сақшыларға көмек көрсетіп, оларды жылы киіммен, ыстық тамақпен қамтуға атсалысты. Партияның бастауыш ұйымдар да қолдан келер көмекті аяп қалмады. Алматы қаласындағы оқиғалардан зардап шеккен азаматтарға көмек көрсету мақсатында 100-ден астам адам ерікті түрде қан тапсырды. Мұның барлығы «Nur Otan» партиясы мемлекеттіліктің, елдіктің негізгі тірегінің бірі екенін көрсетсе керек. Біз үшін қоғамдық тұрақтылықты сақтау аса маңызды. Сондықтан Президент Қасым-Жомарт Кемелұлы Тоқаев белгілеген мақсат-міндеттердің сапалы орындалуына бір кісідей жұмылуымыз керек. Ол үшін партияда қажетті тетіктің бәрі бар. «Nur Otan» партиясы – Мемлекет басшысы жариялаған реформаларды толық және сапалы жүзеге асыруға әлеуеті жететін бірден-бір қоғамдық-саяси күш. Енді алда өтетін съезд барысында сол реформаларды іске асыруда партияның қосар үлесі сараланбақ. Бұл ретте біздің облыстағы партияластар белсенділік танытып, ортақ мақсатқа бірге жетеді деген сенім мол.

Ернұр ӘЙТКЕНОВ, облыстық мәслихат хатшысы.

Количество показов: 716

Возврат к списку