Жұмыстар неге кешікті?

Биыл облыс орталығында қаланы абаттандыруға қатысты ауқымды жобалар қолға алынғанымен, олардың барысы мен жұмыстың сапасы сын көтермейді. Аймақ басшысы Әбілқайыр Сқақов демалыс күні бірқатар нысанды аралап, олқылықтарды уақыт оздырмай жоюға қатысты нақты тапсырмалар берді.

Айталық, Қайырбаев және Мәшһүр Жүсіп көшелері қиылысындағы «Достық» саябағын абаттандыру қараша айының соңында, ал мұндағы күрделі жөндеу екі ай бұрын аяқталуы тиіс еді. Алайда жұмыстар әлі жүріп жатыр. Павлодар қаласының әкімі Асайын Байхановтың айтуынша, мұнда жарық желілерін тартып, шамдарды орналастыру ғана қалды. Екінші Павлодар шағын ауданындағы абаттандырудың барысы да көңіл көншітпейді. Мұндағы бос аумаққа балалардың ойын, спорт және футбол алаңдары орналастырылып, орындықтар қойылды. Енді осы айдың ортасына дейін тартанды жамылғы төселуі тиіс.   

- Құрылыс алаңында небары 5-6 адам жұмыс істеп жатыр. Мұндай қарқынмен жоспарлағаныңыздай айдың соңына дейін жұмысты бітірулеріңіз екіталай. Ал тұрғындар болса, сапалы істің атқарылуын күтіп отыр. Абаттандыру жұмыстары сәуірдің соңына қарай басталып, жаздың соңына дейін демалыс орындарын пайдалануға берілуі керек, – деді облыс әкімі. Бұл ретте шағын аудан тұрғындары да арыз-шағымдарын білдірді. Олар жаңа балалар алаңы табиғи ағын судың өтуіне кедергі келтіруі мүмкін деп алаңдап отыр. Тұрғындарды мұқият тыңдаған Әбілқайыр Сқақов қала әкіміне нөсер жүйелерін орналастыру мәселесін қарастыруды тапсырды. Сондай-ақ, аймақ басшысы мемлекеттік сатып алуларды ертерек бастап, сапаға баса назар аудару керек екенін еске салды. Зеленстрой шағын ауданында да бірқатар жұмыс жүзеге асуда. Мәселен, мұнда жұртшылық көптен күткен орта-лықтандырылған кәріз жүйесінің құры-лысы басталды. Бүгінде жоспарланған 9,6 шақырымның 6,5-інде жұмыс аяқталды. Қалған жұмыс келесі жылы жалғасады. Жалпы, аталмыш жүйе 12 көше мен 630 үйді қамтымақ. Жұмыстар толығымен атқарылған соң үйлер кезең-кезеңімен іске қосылып, жүйені сынау арқылы анықталған олқылықтар болса уақытылы жойылады. Аймақ басшысы Усолка шағын ауданындағы жағалауды абаттандыру барысын да сынға алды. Қазір мұнда жаяу жүргіншілер аймағы ретке келтіріліп жатыр. Жоспар бойынша, шамдары бар арка қою көзделіп отыр. Әбілқайыр Сқақов жергілікті тұрғындар бұл демалыс орнының ашылуын асыға күтіп отырғанын алға тартып, жұмысшылар санын көбейтуді тапсырды. Сонымен қатар, Әбілқайыр Бақтыбайұлы бұл күні әлеуметтік желіден түскен шағымдардың негізінде жоспардан тыс бірнеше нысанға арнайы барды. Солардың бірі - Павлов, 102/3 мекенжайында қолданысқа берілген балалардың ойын алаңы. Тұрғындар көптен күткен бұл алаң сапасыз болып шығып, көпшіліктің үміті ақталмай қалды.

- Балалар сырғанақтан сырғып түсе алмайды. Әткеншек ескі сияқты, себебі шиқылдап, мазаны алады. Сайып келгенде, осындай олқылықтардың салдарынан балаларымыз асыр салып ойнай алмайды, - деп қынжылды тұрғындардың бірі. Облыс әкімі мердігерді жауапкершілікке тартып, келесі құрылыс маусымына дейін барлық кемшілікті түзетуді тапсырды. Ә.Сқақов Мәшһүр Жүсіп-Лермонтов көшелері қиылысындағы су құбырының жөндеу жұмыстарын да жоспардан тыс бақылады. Жоба аяқталуға жақын. Келесі міндет – үйлерді жаңа желілерге қосу. Облыс әкімі бұл жұмыстарды желтоқ-санның алғашқы онкүндігіне дейін аяқтауды тапсырды. Сонымен қатар, аймақ басшысы аутистикалық спектрдегі қабынулары бар балаларға арналған орталық ашылатын ғимаратты күрделі жөндеу барысымен танысты. Жамбыл көшесі, 6 мекенжайындағы бұрынғы әкімшілік ғимаратта 110 балаға көмек беруге бағдарланған жаңа орталық пайдалануға берілмек. Мұнда ойын бөлмесі, тігін, құмыра өндірісі және ағаш шеберханалары, сенсорлық бөлме қарастырылады. Қазіргі кезде әрлеу жұмыстары жүргізілуде. Әбілқайыр Бақтыбайұлы облыстық жұмыспен қамтуды үйлестіру және әлеуметтік бағдарламалар басқармасы басшысы Альмира Дисюповаға жұмыстың барысын жіті бақылауға алуды тапсырды.

- Негізгі жөндеу жұмыстарын қараша айының соңына дейін аяқтау керек. Содан соң ғана жиһаз, құрал-жабдықтарды әкелу қажет. Жұмысты жеделдетіп, сапасын жіті бақылауда ұстау керек. Желтоқсанда орталық балаларды қабылдай бастауы тиіс, - деді Ә.Сқақов. Осылайша, облыс орталығындағы бірқатар нысанды аралап, тұрғындардың талап-тілегіне құлақ түрген аймақ басшысы жауапты сала басшыларына босаңсуға болмайтынын ескертті. Керісінше, жұмыс қарқынын үдетіп, жұртшылыққа қолайлы жағдай жасау мақсатында нәтижелі еңбек ету керек.

Облыс әкімінің баспасөз қызметі.

Суреттерді түсірген - Валерий Бугаев.