Жаңа әкімдердің жүгі қандай?

Өткен аптада облыс көлемінде бірқатар ауыс-түйіс болды. Айталық, алдағы уақытта Успен ауданын Нұрболат Мақашев басқарады. Ал бұған дейін осы ауданға жетекшілік еткен Николай Дычко Павлодар ауданының тізгінін қолға алды. Екеуі де біздің өңірдің тумасы болмаса да, аймақтың маңызды салаларында елеулі еңбек етіп үлгерді.

Екі ауданның жаңа әкімін аудан активіне таяуда ғана өзі облыс әкімінің орынбасары болып тағайындалған Серік Батырғожинов таныстырды. Алдымен Серік Барлыбайұлы Успен ауданының орталығындағы жиынға қатысты. Ауданды басқаруға келген Нұрболат Мақашевтің алдында бірқатар нақты мақсат-міндет тұрғанын атап өтіп, жаңа қызметте табыс тіледі. 40 жастағы Нұрболат Абылайханұлы – аудан-қала әкімдерінің арасындағы жас басшылардың бірі. Шығыс Қазақстан облысында дүниеге келген ол Шәкәрім атындағы Семей мемлекеттік универ-ситетінде инженер-сарапшы, «Тұран-Астана» университетінде құқықтану мамандығы бойынша білім алды. Ал 2016 жылы «Болашақ» бағдарламасы аясында «Шпайер» неміс әкімшілік басқару университетінің магистратурасын бітіріп, мемлекеттік басқару магистрі дәрежесін алды. Мемлекеттік қызметтегі еңбек жолын 2007 жылы Білім және ғылым министрлігінде бастады. 2008-2018 жылдары Ауыл шаруашылығы министрлігінде түрлі лауазымдарда қызмет етті. Қайта өңдеу және агроазық-түлік нарықтары департаментінің сарапшысынан стратегиялық жоспарлау және талдау департаменті директорының орынбасарына дейінгі қызмет сатыларынан өтті. Ал 2018 жылы жұмыс бабымен Павлодар облысына ауысып, жергілікті ауыл шаруашылығы басқар-масы басшысының орынбасары, кейін басшысы болып тағайындалды. 2019-2021 жылдары Тереңкөл ауданы әкімінің орынбасары болды. 2021 жылдың наурыз айында қайтадан облыстық ауыл шаруашылығы басқармасының жетекшілігіне оралды. Бұл уақыт аралығында өңірдің агроөнеркәсіптік саласында бірқатар жаңашылдық орын алды. Айталық, бұрындары мал азығына берілетін субсидияларды бірлі-жарым ірі шаруашылықтар өзара бөлісіп келсе, соңғы жылдары мыңнан астам шағын қожалық та мемлекеттік демеуқаржыға иек артты. Өткен жылы бұл мақсатқа барлығы 1,7 млрд теңге бөлінді. Павлодарлық шаруалар астық пен картоптың рекордтық көлемін жинап, 1 млн тоннадан астам астық және 777 мың тонна картоп алды. Мұндай жоғары жетістіктер басшының біліктілігін көрсетсе керек. Дегенмен, жетілдіретін тұстар да жетерлік. Мәселен, төрт түлікпен күнелтіп отырған ауылдағы ағайын жайылым жерлердің тапшылығы туралы үнемі айтады. Бұл мәселе Успен ауданында да өткір тұр. Бұл туралы біздің басылым бірнеше рет жазып, жергілікті биліктің назарын аудартқан болатын. Нұрболат Мақашев өзі жетекшілік ететін ауданда осы мәселеге де ден қояды деген үміттеміз. Жалпы, Успен ауданында шешімін күткен мәселе көп. Мәселен, тұрғын үймен қамту мәселесі өзекті. Таяуда аймақ басшысы Асайын Байханов ауданға жұмыс сапарымен барған кезде медицина саласының жас мамандары осы жайтты тілге тиек еткен еді. Сонымен қатар, бірқатар ауылдағы жолдың сапасы сын көтермейді. Әсіресе, Вознесенка, Тимирязево, Дмитриевка, Ковалевка ауылдарының ішіндегі жолға қатысты тұрғындар тарапынан шағым көп. Осы және өзге де мәселелердің шешім табуына жауапты болған аудан әкімі Николай Дычко енді Павлодар ауданына басшылық етеді. Облыс әкімінің орынбасары Серік Батырғожинов бұған дейін ауданға басшылық еткен Ержан Иманслямға осы лауазымдағы жұмысы үшін алғыс айта отырып, жаңа басшыны таныстырды. Николай Дычко 1965 жылы Көкшетау облысында дүниеге келген. Екі жоғары білімі бар. 1994 жылы Ресейдегі Мәскеу мемлекеттік ашық университетін тау-кен өнеркәсібі және геологиялық барлау салаларындағы экономика және басқару, 2000 жылы Қ.Сәтбаев атындағы Екібастұз инженерлік-техникалық институтын электрмен жабдықтау және электр-лендіру мамандығы бойынша бітірген. Еңбек жолын 1984 жылы «Екі- бастұзкөмір» кәсіпорнында экскаватор машинисінің көмекшісі болып бастады. Бұдан кейін «Северный» кенішінің электр механигі, энергия механикалық қызметінің бас энергетигі, «Богатырь Аксес Көмір» ЖШС филиалының энергетикалық қызметінің бас энергетигі, «Монтаждау-реттеу басқармасы» ЖШС директоры болды. 2006-2018 жылдар аралығында Екібастұз қаласы әкімінің орынбасары, облыстық индустриялық-инновациялық даму басқармасының басшысы, облыс әкімінің орынбасары, Ақсу қаласы әкімі, «Нұр Отан» партиясы облыстық филиалы төрағасының орынбасары қызметтерін атқарды.   Николай Васильевичті Павлодар ауданында да көп жұмыс күтіп тұр. Облыс пен еліміздің өзге өңірлерін көкөніспен қамтитын агроөнеркәсіптік бағыттағы ауданда қоймалар салып, осы салаға көптеп инвестиция тарту мәселесі бұған дейін бірнеше рет айтылды. Одан бөлек, ауылдағы ағайынның қолайлы жағдайда өмір сүруіне баса назар аудару қажет. Успенде жайылым тапшы болса, мұнда шабындық жер аз. Оған қоса, облыс орталығының іргесінде тұрған бірқатар елді мекенде әлі күнге дейін сапалы ұялы байланыс пен интернет қызметі жоқ. Ауданның жаңа басшысына осы және өзге де проблемалардың түйінін тарқату қажет.

Қ.ТІЛЕКТЕСҚЫЗЫ.

Суреттерді түсірген - Валерий Бугаев.