Жаңа техниканың тілін меңгеруде

Кәсіби мамандар санын арттыру мақсатында әзірленген «Жас маман» жобасының мүмкіндігі зор. Аталмыш жоба қатарына әр өңірде сұранысқа ие 100 кәсіп бойынша 180 колледж енген. Бұл тізімде облысымыздағы 10 білім мекемесі бар. Заманауи талаптарға сай материалдық-техникасы базасы жаңарған оқу ордасының бірі – Павлодар техникалық сервис колледжі.

Облыстық білім басқармасы техникалық және кәсіптік білім беру бөлімінің басшысы Мақсат Нығмановтың айтуынша, «Жас маман» жобасы өңірімізде соңғы 2 жыл ішінде жүзеге асуда.

- Былтыр «Жас маман» жобасының алғашқы нәтижелері өте жақсы болды. Республикалық «Worldskills» чемпионатындағы топтық бәсекеде өңіріміздің студенттері 5-орынға табан тіреді. Сондай-ақ, «WorldSkills Asia-2021» халықаралық байқауында жерлесіміз Дина Афанасьева қола жүлдені иеленді. Мұның өзі - білім саласындағы кәсіби білікті мамандардың даярланып келе жатқандығының айқын дәлелі, - дейді М.Нығманов. Алдағы уақытта ІТ-hub деңгейінде өңірдегі білім ордаларында ІТ-зертхана, lab3D Print, Smart System, дизайн студия және график-дизайн lab құзырет-тілік орталықтарын ашу жоспарланып отырғандығын айтты. Ал Павлодар техникалық сервис колледжінде кәсіби құзыреттілік орталығы, «Worldskills» чемпионатын өткізуге арналған орталықтар ашылған. Сондай-ақ, облыстық автомектептер одағы кәсіби бірлестігінің толық мүшесі ретінде В, С, Д, Е санатындағы жүргізушілерді даярлауға және қайта даярлауға арналған бас лицензияға ие білім ордасы. Қазіргі уақытта колледждің материалдық-техникалық базасында арнайы пәндер бойынша 20 кабинет, 4 зертхана, 5 оқу-өндірістік шеберхана мен оқу-өндірістік кешен бар. Павлодар техникалық сервис колледжінің басшысы Әнуарбек Ахметшаиховтың айтуынша, «Жас маман» жобасы оқу орнында кадрлар даярлаудың тиімді жүйесін құруға ықпал етті.

- Жобаның шеңберінде колледж ғимараты 60 бірлік жоғары технологиялық техникамен жабдықталды. «Автомобиль диагностикасы», «Автомобильдерді жөндеу», «Автомобильдерге техникалық бақылау», «Шанақ цехы», «Оқу-өндірістік кешен» зертханалары, «Шетелдік өндіріс автомобильдерінің электр жабдықтары» оқу кабинеттері, интерактивті тренажерлер және цифрлық жаңа станок жабдықтары кәсіби әрі халықаралық білім алуға мүмкіндік беріп отыр, - дейді Ә.Ахметшаихов. Өзара тиімді ынтымақтастық студенттердің өндірістік тәжіри-беден, оның ішінде ақы төленетін практикадан өтуіне жағдай жасайды. Студенттердің, сондай-ақ оқытушылар мен өндірістік оқыту шеберлерінің тағылымдамадан өтуі үшін колледж өңірдегі «Қазақстан алюминийі», «Электромонтаждау бұйымдары зауыты», «Қамқор-Вагон», «Павлодар металл конструкциялары зауыты» және өзге де кәсіпорындармен шарт жасасқан.

- «Жас маман» құзыреттілік орталығы дуалды оқыту нәтиже-сінде жоғары курс студенттеріне тәжірибеден өтіп, оқуды аяқтаған соң кәсіпорындарға орналасуға мүмкіндік береді. Қазіргі таңда 320 студент, яғни білім алушылардың 75,4 пайызы осы жүйе бойынша оқиды. Бұл - аймағымызға қажетті мамандар мен оқуды аяқтаған түлектерді жұмыспен қамтудың оңтайлы шешімі, - дейді колледж басшысы. «Техник-механик» біліктілігі мамандығы бойынша білім алып жатқан 1-курс студенті Нұрхат Нұрғабиден білім ордасындағы ұстаздардың шеберлігін ерекше атап өтті.

- Бала күнімнен автомобиль көлігін жөндеу ісіне қызығып өстім. 9-сыныпты тәмамдаған соң Павлодар техникалық сервис колледжін таңдадым. Колледж базасында құрылған орталықтар, заманауи үлгіге сай жабдықталған кабинеттер, оқу-өндірістік шеберханалар біз үшін үлкен мүмкіндіктер есігін айқара ашты. Себебі, мұнда тек оқып қоймай, тәжірибе жинап, еңбегіміздің нәтижесінде қаражат тауып жатырмыз. Алғашында көліктің қозғалтқышын жинауға топ болып 2-3 сағат уақыт жұмсайтын едік. Оқытушылар мен жоғары топтағы ағаларымыздың көмегімен бір сағатта құрастыруды үйреніп жатырмыз, - дейді ол.

Махаббат ТӨЛЕБАЙ.

Количество показов: 754

Возврат к списку