Жаңатілекте мешіт ашылды

Жаңатілек ауылының жұртшылығы ат тұяғын дүбірлетіп, үлкен той жасады. Қуаныштың себепшісі - елді мекенде ашылған мешіт. Ауылда жергілікті азаматтардың, кеудесінде иман нұры шуақтаған жамағаттың бастамасымен Алланың үйі бой көтеріп, үлкен-кішіні имандылыққа ұйытты.

Мешіт – мұсылман қауымның Жаратушы иемізге кіршіксіз құлшылық жасап, шынайы тәубеге келетін, жабырқаған жанына жұбаныш табатын, арман-тілегін Аллаға ақтарып, дұға тілейтін мінәжат үйі. Мешіт – діни дүниетанымын арттырып, рухани білімін дамытып, тәлім аламын дегендер үшін тәрбие ордасы. Алдағы уақытта жаңатілектік ағайынды Шәмен ата мешітінен естілетін азан оятып, жүректегі иманды берік ете түспек. Шәмен атаның өмірдерегіне тоқталсақ, шын есімі – Ғабдіжәлел Қасым Ишанұлы. Ол - Құрманбай абыздың немересі. Асылдың тұяғына әулиелік 49 жасында қонған екен. Түрлі дертке шалдыққан жандарды құлан-таза айықтырған әулиенің шарапатын көрген жұрт қадір тұтады. Соның жарқын көрінісі – ауыл ішінде күмбезі анадайдан көрінетін зәулім мешіт. Мешіт 1985 жылғы ауыл азаматтарының берік иманы, жоғары ұйымшылдығының арқасында бой көтерді. Көкірек көзі ашық азаматтар ауылдастарын жұмылдырып, игілікті істі бастап, бас-аяғы сегіз айдың ішінде мешіт тұрғызды. Шуақты күнде мешіттің есігі айқара ашылып, лентасын аудан әкімі Серік Батырғожинов, Павлодар облысының өкіл имамы Жолдас қажы Қоспақұлы және Баянауыл ауданының бас имамы Саян Қожин қиды.

- Бүгін Жаңатілек ауылында ақ түйенің қарны жарылған күн. Бұл ауыл жастарының дінге деген махаббатын көрсетеді. Мешіт құтты болсын! Бұл жерден Мәшһүр Жүсіп сияқты әулие ғалымдар, Шоң бидей дана билер шығуын тілейміз, - деп Жолдас Қоспақұлы ізгі лебізін жеткізіп, мешітке атсалысқан әрбір азаматқа шынайы ықыласын білдірді. Елді мекен азаматтары ауыл имамы Зинат Тұманбаевқа дүйім жұртты, тегіс ауылды иманға шақырып, тура жолға салғанына алғысын жаудырды. Мейірім мен сүйіспеншілікке толы мешіттің кілті табыс-талып, есігі ашылған соң ағайын құлшылық етуге асығып, ішіне енді. Құран бағыштап, иманға ұйыған жұртшылық кейін алаңға асықты. Онда концерттік бағдарлама өтіп, алаш баласын жырмен сүйсінткен айтыс, бұла күш сыналған қазақ күресі, қошқар көтеру сынды сайыстар өтті. Одан бөлек, үлкен тойда тұлпарлардың дүбірі естілген тай жарысы, құнан жарыс, тоқ бәйге, аламан бәйге өтіп, алаңдағылардың делебесі қозды. Қазақтың төл өнері айтыс та елеусіз қалған жоқ. Төрт ақын сахна төріне көтеріліп, Құлманбет айтысы өтті. Қарағанды қаласынан Мақсат Аханов, Абай облысынан Айшолпан Тілеубай, ақтөбелік Данияр Алдаберген және Баянауылдан Тілек Сейітов сырлы сөз айта білді. Дүбірлі думанға жиналған жұртшылыққа ақшаңқан киіз үйлер құрылып, ас берілді. Сәулет өнерінің сұлулығы мен Құдайға деген риясыз құлшылықты ауыл мешітінен анық аңғаруға болады.

Әлия ЖҰМАТҚЫЗЫ, Жаңатілек ауылы, Баянауыл ауданы.

Количество показов: 1352

Возврат к списку