Жағдайды жақсарту - жауапкершіліктен

Екібастұз қаласындағы өндіріс орындары еліміздің индустриялық, экономикалық дамуын ілгерілетіп қана қоймай, тұрғындардың әлеуметтік жағдайын жақсартуға ден қойып келеді. Қызметкерлерге қолайлы мүмкіндіктер қарастыру мақсатында кәсіпорындардың жанынан саябақтар, спорт кешендері, тіпті емханалар мен кинотеатрлар салынды.

Облыс әкімі Әбілқайыр Сқақов Екібастұз қаласына арнайы барып, мұндағы бірнеше өндіріс орнының жұмыс барысымен танысты. Алдымен аймақ басшысы Бозшакөл кен-байыту комбинатына барды. Мұндағы мыс өндірісі елдегі басқа кәсіпорындармен салыстырғанда 15 есеге көп. Комбинатта заманауи жабдықтарды қолдану мен тау-кен техникасының қуатты паркін құру нәтижесінде осындай жоғары көрсеткішке қол жетіп отыр. Бұл ретте өндіріс орнының басшылығы әлеуметтік жауапкершілік мәселесін де тыс қалдырған емес. Айталық, 1200 шаршы метр аумақта кеншілерге арналған вахталық қалашық орналасқан. Бұл жерде қызметкер-лердің демалысы мен уақытты тиімді өткізуіне барлық жағдай жасалған. Аутсорсинг келісімшарты негізінде салынған заманауи емханада қажетті ем-дом көрсетіледі. Коронавирустық инфекцияға қарсы вакцинаны да дәл осы мекемеде алуға болады. Бүгінде комбинат қызметкерлерінің 99,9 пайызы екпе алды. Тағы 499 адам қайта вакциналаудан өтті. Сонымен қатар, «Бозшакөл Арена» спорт кешенінде баскетбол, волейбол және футбол алаңдары, тренажер және бокс залдары бар. Жұмысшылар қолы қалт еткен кезде осы алаңдарда шынығып, өзара бәсекеге түседі. Енді бірі кинотеатрға барып, үш залда ұсынылатын фильм-дерді тамашалайды. Осы орайда облыс әкімі Әбілқайыр Сқақов кәсіпорынның әлеуметтік жауапкершілігі өңірдегі өзге өндіріс орындарына үлгі болуы тиіс екенін атап өтті.

- Бозшакөл комбинатының өз қызметкерлері үшін осындай жақсы жағдайлар жасауы қуантады. Жұмысшылардың қажет болған жағдайда сапалы медициналық көмек алу мүмкіндігі қарастырылуы да маңызды. Ендігі ретте бұл бағыттағы іргелі істер аймақтағы басқа еңбек ұжымдары мен басшылықтарына өнеге болуы керек, - деді Ә.Сқақов. Сондай-ақ, аймақ басшысы комбинаттың аумағындағы скверді кеңейтіп, оны жасыл белдеуге айналдыруды ұсынды. Содан соң Әбілқайыр Сқақов кәсіпорын қызметкерлерімен кездесіп, көпшілікпен бірге өзекті мәселелерді ортаға салды. Бұл ретте жұмысшылар Павлодар – Нұр-Сұлтан тас жолы бойындағы жол айырығын жөндеу, азық-түлік бағасын реттеу, мектептердің жанына бейнекамералар орнату мәсе-лелерін қозғады. Әбілқайыр Сқақов атап өткендей, жолдың сапасына қатысты сын-ескертпе көп. Бұл жайт жүргізушілер мен жолаушыларды үнемі толғандырады. Осы орайда «ҚазАвтоЖол» ұлттық компаниясы өкілдері бұл жол учаскесі биылғы жаздың соңына дейін жөнделеді деп сендірді. Ал аймақ басшысы әлеу-меттік маңызы бар азық-түлік бағасын тұрақтандыру және облыс тұрғындарын барлық қажеттіліктермен қамтамасыз ету мақсатында атқарылып жатқан шараларға тоқталды.

- Облыста 300-ге жуық әлеуметтік дүкен бар. Аталмыш сауда орындарында негізгі өнімдерді нарықтағы бағадан арзанға алуға болады. Біздің міндет - делдалдар тізбегін алып тастау және тұрақтандыру қорынан тауарларды тікелей жеткізуді ұйымдастыру. Сондай-ақ, агроөнеркәсіп саласын терең өңдеуге бағыттау керек. Бұл шаралар жаңа жұмыс орындарын ашып, азық-түлік қауіпсіздігін қамтамасыз етуге ықпал етеді, - деп атап өтті облыс әкімі. Ә.Сқақов №1 ГРЭС-ке де барды. Кәсіпорынның бас директоры Еділ Көпеновтің айтуынша, жаңа электр сүзгілерін орнату арқылы №1 энергия блогын қалпына келтіру жобасы іске асырылуда. Бұл станцияның қуатын 4000 Мвт-қа дейін арттыруға мүмкіндік береді. Оған қоса, құрылыс жұмыстары кезінде 500-ге жуық, ал жоба іске қосылған соң 54 жұмыс орны ашылады. Бұл кәсіпорын да қызмет-керлердің әл-ауқатына айрықша мән береді. Айталық, мұндағы жұмысшылардың орташа айлық жалақысы 327 мың теңгені құрайды. Энергетиктер аймақ басшысымен кездесу барысында коммуналдық шаруашылық, абаттандыру, үй жануарларын ұстау, қоғамдық көлік, бұқаралық спортты дамыту, білім беру және басқа да мәселелерге қатысты сауалдарын жолдап, тұшымды жауап алды. Өз кезегінде Әбілқайыр Сқақов осы станциядағы еңбек тәжірибесін еске алып, естеліктермен бөлісті. Аймақ басшысы 1990-ыншы жылдардың басында еңбек жолын осында үшінші разрядты жол монтері болып бастаған еді.

- Сол тұста жерлестеріміздің үйлерін электр энергиясымен қамтамасыз етудегі үлкен іске қатысымыз бар деген сезім ерекше күш-қуат беретін. Ондаған жылдардан соң №1 электр станциясындағы жұмыс бұрынғыдай қызу. Станция жұмыскерлері облысымыз бен елімізге жарықты үздіксіз беріп отыр. Қадірлі жерлестер, адал еңбектеріңіз үшін алғысым шексіз. Өмірлік төзімділікке үйреткен және осындай тамаша адамдармен таныстырғаны үшін электр станциясына көп рақмет, - деді облыс әкімі. Әбілқайыр Бақтыбайұлы Екібастұз қаласына жұмыс сапарының соңында шаһар басшысы Ардақ Қаңтарбаевқа әрбір шағын ауданда қала тұрғындарын тарту орталықтарын құру бойынша шаралар қабылдауды тапсырып, саябақтар мен балалар алаңдары барлық тұрғынға қолжетімді болуы тиіс екенін атап өтті.

Облыс әкімінің баспасөз қызметі.

Суретті түсірген - Валерий Бугаев.