Жаңғырту жұмыстары жүргізілуде

СОҢҒЫ ЖАРИЯЛАНЫМДАР

11.06.2022

Жаңғырту жұмыстары жүргізілуде

Облыс орталығындағы бірнеше мектепте күрделі жөндеу жұмыстары қызу жүріп жатыр. Бірнеше жыл бойы жөндеу көрмеген оқу орындары жаңарып, заман талаптарына сай болмақ. Сонымен қатар, Теміржолшылар кентінде білім беру ғимаратының негізі қаланды.

Кеше облыс әкімі Әбілқайыр Сқақов қала мектептеріндегі кешенді жөндеу жұмыстарының барысын тексерді. Аймақ басшысы мердігерлердің жұмысын қабылдауда талаптарды қатаңдату қажеттігін атап өтті. Биыл №25 және 42 мектептердің арасындағы бос алаңда екі кіші және бір толық өлшемді үш футбол алаңы, жүгіру жолағы, баскетбол алаңы және теннис корты пайда болады. Одан бөлек воркаут-алаң, демалыс аймағы, балалар ойын алаңдары салынуда. Мұнда сабақ өтпейтін уақытта Усолка шағын ауданының барлық тұрғындары уақыттарын тиімді өткізе алады. Ауқымды жоба 20 мыңға жуық адамның салауатты өмір салтымен айналысуына мүмкіндік береді. Мектептегі спорттық инфрақұрылымды дамытудың тағы бір жобасы №19 мектепте қолға алынды. Мұнда ескі футбол алаңының жабындысы алынып, қоршауға қажетті іргетастардың орны дайындалып жатыр. Спорт алаңының аумағында екі жаңа футбол, баскетбол және волейбол алаңдары, алғашқы әскери дайындықтың жаттығу орны, воркаут, тренажер бұрышы және балалар алаңы пайда болады. Бауыржан Момышұлы атындағы орта мектепте де ауқымды жұмыстар жүріп жатыр. Бүгінде 1200 оқушыға арналған білім ордасында екі мыңнан астам бала оқиды. Мердігер компания мектеп ғимаратының шатырынан бастап инженерлік желілерге дейін жаңартуы тиіс. Облыс әкімі Ә.Сқақов электр желілерін жаңарту, өрт қауіпсіздігі жүйесін реттеу ісін әрлеу жұмыста-рынан бөлек қабылдауды тапсырды.

- Қауіпсіздікті қамтамасыз ету мақсатында электр, сантехникалық бөлік, коммуникация сияқты көрінбейтін жұмыстардың нәтижелерін жеке қабылдау қажет, - деді облыс әкімі. №9 мектеп-гимназиясында 700 оқушыға арналған қосымша ғимарат салынуда. Жоспар бойынша мұнда төрт қабатты нысан бой көтереді. Онда бастауыш мектептің асханасы, мәжіліс және спорт залдары, хореография студиясы, музыка және бейнелеу өнері кабинеттері орналасады. Өңір басшысы екі ғимаратты бірыңғай сәулет ансамбліне айналдыруды ұсынды.

- Мұның барлығы біртұтас болуы үшін қайта жаңарту мен қосымша ғимарат салу жұмыстарын үйлестіру керек. Мердігерлер жөндеу жұмыстарына барынша жауапкершілікпен қарайды деп ойлаймын. Себебі бұл нысанның әлеуметтік маңызы зор, - деп атап өтті Ә.Сқақов. Сондай-ақ, аймақ басшысы 210 орындық мектептің құрылысы жүріп жатқан Теміржолшылар кентінде болды. Бұрын кенттегі балалар қаладағы басқа мектептерге барып-келіп оқитын еді. Ал енді алдағы оқу жылында кенттегі жаңа мектепке баратын болады. Бұл оқу орнында мата, керамика және металл өңдеу шеберханалары, АӘД кабинеттері, робототехника және аспаздық үйірмелері ашылады. Әбілқайыр Сқақов жұмыстарды сапалы жүргізіп, жоспарланған мерзімде аяқтауды тапсырды.

Облыс әкімінің баспасөз қызметі.

Суреттерді түсірген - Валерий Бугаев.

Количество показов: 677

Возврат к списку