Жанармай бағасы - бақылауда

Ел аумағында террорлық қауіптің шекті «қызыл» деңгейі енгізілуіне және төтенше жағдай режимі орнауына байланысты ҚР бәсекелестікті қорғау және дамыту агенттігі әлеуметтік маңызы бар азық-түлік, өзге де тауарлардың бағасын күнделікті бақылауына алды. Біздің аймақтағы ахуалды аталған агенттіктің облыс бойынша департаменті мамандары жіті назарда ұстауда. Соңғы жағдайларға байланысты қандай өзгерістер бар? Сауалдарға департамент басшысы Бейбіт Молдабеков жауап берді.

- Бейбіт Қабдешұлы, баға жайлы сөз қозғалса, сіз басқарып отырған департаментті айналып өте алмаспыз. «Даудың басы – Дайрабайдың көк сиыры» демекші, елдегі жағымсыз жағдай әу баста газдың бағасына байланысты орын алған еді. Сонымен, аймағымызда газ қанша теңгеден сатылуы тиіс?

- ҚР Бәсекелестікті қорғау және дамыту агенттігінің 2022 жылғы 5 қаңтардағы №1 бұйрығымен аймағымызда сұйытылған мұнай газын өткізуге уақытша мемлекеттік баға реттеу енгізілді. Оған сәйкес, қосымша құн салығын қоса есептегенде 1 литр газ үшін шекті бөлшек баға – 70 теңге. 200 шақы-
рымнан алшақ аудандарда 75 теңгеден босатылады. Осы бұйрықпен электрондық сауда алаңы арқылы сұйытылған мұнай газын өткізуге шекті баға анықталды, оған сәйкес бір тонна үшін баға 52 728 тенгеге тең.

- Бензин және дизель отынының бағасы да арзандатылды ма?

- Иә, ел аумағындағы жанар-жағармай құю стансаларындағы бензиннің және дизель отынының да 180 күнге шекті бағасы бекітілді. Сондай-ақ сұйытылған мұнай газының электронды сауда алаңдары арқылы сатуға көшу бір жылға шегерілді. Бүгінде АИ-80 бензині 89 теңгеден (1 л), АИ-92 және АИ-93 бензині 182 теңгеден, АИ-95 бензині 215 теңгеден аспауы тиіс. Аймағымызда жазғы және маусымаралық дизельді отынның бағасы 230 теңгені құрап отыр.

- Соңғы айларда жанар-жағармай құю стансалары иелерінің сөз байласып, бағаны негізсіз өсіру фактілері тіркелді ме?

- Әзірге ондай оқиғалар орын алған жоқ.

- Білуімізше, әлеуметтік маңызы бар азық-түлік өнімдерінің бағасы да – басты назарда. Бұл жөнінде не айтасыз?

- ҚР бәсекелестікті қорғау саласындағы заңнама бұзушылық белгілерін анықтау және монопо-лияға қарсы ден қою шараларын қабылдау мақсатында департамент мамандары күн сайын әлеуметтік маңызы бар азық-түлік өнімдерінің бағасына мониторинг жүргізеді. Бағаны негізсіз көтеру фактілерін жедел түрде анықтау мен жол бермеу үшін жедел желі жұмыс істейді. Ондай жағдайға тап болған тұтынушылар 32-58-69, 8-701-566-07-93 байланыс телефонына хабарласа алады. 9 қаңтардан бастап осы уақытқа дейін жедел желіге 42 тұрғын хабарласты. Басым бөлігі азық-түлік бағасына қатысты. Түскен шағымдарды жедел түрде жергілікті әкімдікке жібереміз.

- Кәсіпкерлерге қандай жағдайда айыппұл салынады?

- Әлеуметтік маңызы бар азық-түлік тауарларын өндіретін және өткізетін нарық субъектілері бағаны негізсіз көтеру не ұстап тұру үшін картельдік келісімге келіп, өндірісті негізсіз тоқтатса, монополиялық жағдайын пайдаланып негізсіз тауар тапшылығын туындатса, ҚР әкімшілік құқық бұзу туралы кродексінің 159-бабы бойынша монополиялық әрекетінен түскен табысынан кіші және орта бизнес кәсіпкерлері 3 пайыз, ірі бизнес өкілдері 5 пайыз айыппұл арқалайды.

- Әңгімеңізге рақмет!

Сұхбаттасқан – Оралхан ҚОЖАНОВ.

Количество показов: 771

Возврат к списку