Жеткіншекті көше тәрбиелемеуі керек

Қазіргі таңда баланың қызығушылығына септігін тигізіп, икеміне қарай жаңа қырынан танылуына, өмірлік жолын анықтауда аула клубтарының маңызы зор. Аула клубы дегеніміз - жастар мен жасөспірім, сондай-ақ, балаларға арналған, мектептен тыс уақытта әртүрлі үйірмеге баулитын орталық. Бұл ұйым түрі балалардың болашақта жан-жақты, білімді, мәдениетті болып қалыптасуына өз ықпалын тигізеді. Клубта балалар қоғамдық шараларға өз үлестерін қосады.

Аула клубының мақсаты – оқушылардың мектептен тыс өмірін тиімді пайдаланып, өздері оқып жүрген пәндерін терең-детіп оқыту, жалпы, баланы жан-жақты дамытып, бейімін жетілдіру. Мәселен, облысымыздағы «Жігер» атты балалар-жасөспірімдерге арналған клубының аула клубында жеткіншектерді жан-жақты білімді, бәсекелестікке қабілетті етіп дамыту, қызықты көпшілік-мәдени, қоғамдық шараларға тарту арқылы белсенділігін арттыру жұмыстары қолға алынған.

Облыс орталығындағы «Жігер» аула клубында бүгінде 500-ге жуық балғын шығармашылықтарын шыңдауда. Бұл танымдық орталық шеңберінде тіл-танымдық, көркем-эстетикалық, ғылыми-техникалық, туристік өлкетану, спорттық-денешынықтыру және сауықтыру бағыттары бойынша бірқатар үйірмелер жұмыс жасайды. Алдағы уақытта үйірмелер саны сұранысқа басқа бағыттармен толығады деп жоспарлануда. Айта кетейік, жас жеткіншектер қолөнер, вокал, домбыра, ағылшын тілі сынды үйірмелерден басқа, шахмат, грек-рим күресі, волейбол, шахмат, таэквондо сынды көптеген спорт түрлерін үйренеді. Мұнда күнделікті қызу пікірталастар, диалогтық алаңдар ұйымдастырылады. Қазіргі таңда үйірмеге қатысатын оқушылар саны күннен- күнге артып келедi. Әрбір күн өзгеріске толы. Қазіргі жауапты кезеңде заман көшінен қалып қоймай, уақыт талабына сай болу, ертеңгі болашағымыз – жас ұрпақты саналы, білімді азамат етіп тәрбиелеу ұстаздарға зор міндет пен жауапкершілік жүктейді. Балалар мен жасөспірімдердің уақытын мазмұнды өткізу осы жердегі тәрбиешілер пен педагогтардың білім сапасы мен шығармашылық деңгейіне байланысты. Білімді үйрену және оны оқушыларға үйрету – ұстаздықты мұрат еткен әрбір адамның қасиетті борышы, абзал парызы. Ұстаз еңбегі – шығармашылық еңбек. Сондықтан да аула клубындағы ұстаздар әр сабаққа жауапкершілікпен қарайды. Үнемі ізденіп, балаларды өнерге баули отырып, білімін шыңдау үшін қызықты сабақтар мен тәрбие сағаттары өтіп тұрады. Павлодар облыстық білім беру басқармасының мәліметіне сүйенсек, қала аумағында 16 аула клубы бар. Олардың барлығы «Жігер» клубы жанынан ашылып, жыл бойына оқушылардың үйірмелерге қатысуына мүмкіндік береді.

– Балалар мен жасөспірімдердің бос уақытын тиімді пайдалануда аула клубтарының маңызы ерекше. Осы мақсатта клубтарда үйірмелер мен спорттық секцияларына жылына 3 мыңға жуық оқушы жазылып, уақытын ұтымды пайдаланады. Осы орайда келешекте бұл мекемелердің саны артады деген жоспар бар. Қазір осы бағыт бойынша жұмыстар жүруде, – дейді орталықтың директоры Гүлнәр Үйсінбаева. Сала маманының «Балалар уақытын тиімді пайдаланады» деген сөзінің жаны бар. Себебі, балалардың күнін бос өткізбеуіне, спорттық, шығармашылық қабілетін арттыруда пайдасы тиетін бірден-бір орын. Оқушылар сарайына қарасты «Бірлік» аула клубы шағын болғанымен, мұндағы бүлдіршіндердің белсенділігі жоғары. «Бірлік» аула клубы бөлімінің меңгерушісі Дана Қайыржанова бөлім көпқабатты тұрғын үйде тұратын балалардың сүйікті орны дегенді алға тартты.

– «Жігер» балалар және жасөспірімдер клубына қарасты бөлім 2007 жылы ашылды. Мұнда каратэ, бокс, қолөнер, бейнелеу өнері, қазақ тілі үйірмесі және вокал топтары жұмыс істейді. Оқушылардың қызығушылығын оятып, уақытын пайдалы дүниелерге жұмсауда ата-аналардың өтініштері ескерілуде. Өйткені оқушылардың дүниетанымы кең. Оларды қандай да бір жаңалыққа қызықтыру оңай емес. Қазіргі уақытта «Бірлікте» 200-ге жуық бала өз уақытын өткізеді. Тіл курстарына қатысып, табиғатқа жанашырлық танытып, түрлі секцияларда спорт түрлерімен айналысады, - дейді Д.Қайыржанова. Ермырза Ескендір - қаладағы №1 мектептің оқушысы. Алты жасында «Бірлік» аула клубының табалдырығын аттаған Ермырза бұл жерге келуден жалыққан жоқпын дейді.

– Каратэ үйірмесіне қатыстым. Біраз жаттығулар жасауды үйрендім. Болашақта каратист болғым келеді. Аула клубына келу қызық. Балалармен ойын ойнап жарысамыз. Түрлі жарыстарды апайларымыз қызықты етіп ұйымдастырады, – дейді ол.

«Әр күн көңілді, әрбір сәт - қуаныш»

Балалар көркемсурет мектебіне қарасты «Шұғыла», «Арт Шайн» аула клубтарында әр күн осы ұранмен басталады.

– Жаздың екінші айында «Шұғыла» сауықтыру алаңы ұйымдастырылып, ашылды. Мұнда балалар тек демалып қана қоймай, денсаулығын нығайтып, білімін арттыруды жоспарладық. Сол үшін күн сайын қызықты ойындар, іс-шаралар ұйымдастырамыз. «Аспаздар сайысы», «Денсаулық күні», «Күлкі күні», «Ертегілер елінде», «Білімпаздар күні» сияқты бағдарламалармен қамтылып отырады, – деді аталған аула клубтарының меңгерушісі Ақбота Мараймова. Қала тұрғыны Айнұр Ашмұханбетованың қызы Іңкәрдің аула клубына келгеніне көп уақыт болмаған. Дегенмен, жуырда «Аспаздар сайысы» атты байқауға қатысып, екінші орынды жеңіп алыпты.

– Қызымның жарты күні осында өтеді. Ұстаздары қызықты шаралар ұйымдасты-ратынын айтып, үйге көңілді оралады. Сондықтан күнде осы жерге келуге асығып тұрады. Бастысы, балаларымыз компьютер мен ұялы телефонға байланып отырмай, уақыттарын достарымен қызықты өткізеді, – деген ойымен бөлісті Іңкәрдің анасы. Қала тұрғыны, екі қыздың анасы Венера Нұрғалиқызы балаларға арналған үйірме-лердің үйге жақын болғанын қалайды.

– Тұрғын үйдің алдында ойын алаңдары бар. Бала үйренетін, өзгелермен көбірек араласатын, танымын кеңейтетін үйірмелер үйдің маңында болса жақсы ғой. Әзірге бізде мұндай мүмкіндік жоқ, – дегенді алға тартты ата-ана. Сонымен қатар, аталған клубқа балалармен жоғары деңгейде жұмыс жүргізетін, педагогикалық білімі бар қызметкерлер ғана тартылған. Аула клубына бірінші кезекте аз қамтылған, көпбалалы отбасылардың балалары қабылданады. Барлық үйірмелерге қатысу тегін. Үйірмеге келетін балалар 4 пен 16 жастағы аралықты қамтиды. Сондықтан мұнда оқушылар жылдан-жылға көбейіп келеді. Бір қуантарлығы, кейбір үйірмелердің оқу үлгерімін нығайтуға да қосатын үлесі мол. Сондай-ақ, өткізілетін іс-шаралардың қызықты жаңалыққа толы болуына барынша назар аударылады. Өйткені, аталған аула клубының басты көздеген мақсаты – балалардың шығармашылық қабілетін арттыру. Ұйымшыл ұжымның жетекшісі Гүлдариға Бақытжанованың айтуынша, жаңадан құрылған бұл клубты қазір қала әкімдігі қаржыландырады. Орталықта 30-дан аса үйірме ашылған. Бүгінде балалардың түрлі үйірмелерге қатысып, ұнаған спорт түрле-рімен айналысуына барлық жағдай жасалған.

- Аула клубының тәрбиеленушілері қалалық және облыстық, республикалық, халықаралық фестивальдер мен байқауларға, көрмелерге белсенді қатысып, жүлделі орындарға ие болуда. Ауламыздағы балалардың бос уақытын тиімді пайдалану мақсатында қызықты іс-шараларды өткізіп, жұмысты одан әрі жандандыру жұмыстары жалғасуда. Қазіргі таңда «Ақ желкен» аула клубында күн сайын бала саны артып келеді, – дейді директор.

Түйін:

Баланың қызығушылығына, икемiне қарай жаңа қыры ашылып, өмiрлiк жолын анықтауға да аула клубтары септiгiн тигiзедi. Бұл орта - көшенiң қалтарысында не иесiз қуыстарда емес, аула клубтарында өркен жайғаны құптарлық. Мұндай ортада өскен баланың тәрбиесi мен болашағы бұлыңғыр болмасы анық.

Айдана БОРАНБАЕВА.