Жырлары - елге мұра, ұрпаққа аманат

СОҢҒЫ ЖАРИЯЛАНЫМДАР

Алтын аға
10:30 04.08.2022 618

Балабақшалар қалай бақыланады?
10:28 04.08.2022 631

Әнші арманы
09:57 02.08.2022 640

«Мектепке жол» акциясы басталды
09:54 02.08.2022 821

Жол жабылмайды
09:52 02.08.2022 624

Мәшһүр Жүсіп және Бекасыл хазірет
09:49 02.08.2022 653

Пәтер кезегін себепсіз жылжытқан
09:47 02.08.2022 634

Денсаулық пойызы келді
09:45 02.08.2022 653

23.07.2022

Жырлары - елге мұра, ұрпаққа аманат

Ақын, драматург, халықаралық Дж.Неру атындағы сыйлықтың иегері жерлесіміз Аманжол Шамкеновтің дүниеге келгеніне биыл - 95 жыл. Осыған орай облыстық Бұқар жырау атындағы әдебиет және өнер музейінде ақынның шығармашылығына арналған әдеби-сазды кеш ұйымдастырылды.

Кешке ақынның балалары, туған-туыстары, достары, және өңіріміздің белгілі ақын-жазушылары қатысты.

- Бабаларының өткен жолымен жүріп, даналық сөздерімен сусындап, қазақ әдебиетінде өзіндік із қалдырған ақынның бірі – Аманжол Шамкенов. Аманжол ағамен етене жақын араласпасам да, оның шығармашылығымен жақсы таныспын. Бірнеше рет ол кісіге өлеңдерімді арнадым. Ақын дүниеден өткеннен кейін балалары және өңіріміздің ақын-жазушылары болып, Павлодар қаласының бір көшесіне Аманжол ақынның есімін беру мәселесін көтердік. Алайда ол кезде ойымыз жүзеге аспады. Биыл ғана сәтін салып, Аманжол Шамкеновтің есімі көшелердің бірін иеленді, - дейді ақын, ардагер журналист Шолпан Байғалы. Музейдің директоры Ербол Қайыровтың сөзінше, биыл ақынның мерейтойына орай барлық облыстық мектептерде «Аманжол оқулары» өтеді. Ал жазушының ұлы Ернар Шамкенов әкесінің еңбекқорлығы жайлы әңгімелеп, балалық шақтағы қызықты оқиғаларымен бөлісті.

- Әкем өз ісіне берілген, еңбекқор, қарапайым жан еді. Жұмысқа таңертең ерте кетіп, кеш келетін. Бірден бөлмесіне барып, өзінің жұмыс орнына отырып, өлеңдерін, шығармаларын жазып отыратын. Біз бөлмесіне бара қалсақ, анамыз: «әкелеріңе бөгет жасамаңдар. Ол өзінің кезекті туындысын жазып отыр», - деп бізді сыртқа шығарып жіберетін. Басқа әкелер секілді ол да бізге жақсы тәрбие берді. Өмірінің соңғы жылдарын осы Павлодар қаласында өткізді. Шығармашылықпен айналысты. Бірнеше жыл бұрын біз де әкеміздің туған жері деп, осы Павлодар өлкесіне көшіп келдік. Отбасында 4 ағайындымыз. Төртеуіміз де әкеміздің жолын қумасақ та, өз ісіміздің шебері атандық, - дейді ұлы Е.Шамкенов. Аманжол Шамкенов Қазақ мемлекеттік университетін бітірген соң 1950-1954 жылдары «Әдебиет және өнер» (қазіргі «Жұлдыз») журналында бөлім меңгерушісі, жауап хатшы қызметтерін атқарған. «Студент сыры» атты тұңғыш жинағы 1951 жылы басылып шықты. Ол кезде ақын небары 23 жаста болған. Одан кейін «Жасыл жайлау» дастаны жарық көрді. Оқиға ауыл өміріне, шопан еңбегіне арналды. Ол тек өлең жазып қана қоймай, прозаға да қалам сілтеді. Мәселен, «Шапақ» атты кітабы жазушының әр бағытта жазған әңгімелерінен және әр елге барған сапарларынан тұрады. Әңгімелерінде жазушы қарапайым еңбек адамдарының тұлғасын және олардың күнделікті тыныс-тіршілігін суреттеген. Сондай-ақ, Аманжол ақын көптеген ән мәтіндерінің авторы. Олар «Ұстазым», «Ана туралы баллада», «Кеш қалыппын», «Неге солай?», «Сол бір кез», «Ертіс деген қала бар», «Ағады Ертіс», «Сағыныш» секілді ондаған әндері еліміздің сахналарында шырқалып жүр. Ақын Павлодарға келгеннен кейін, өзінің туған жеріне арнап «Ой-толғам» атты кітабын жарыққа шығарды. Кеш барысында музей қызметкері Сәуле Өтегенқызы ақынның сөзіне жазылған «Ұстазым» әнін шырқады. Ал жас буын өкілдері сазды өлеңдерін оқыды. Сонымен қатар, Ернар Аманжолұлы музей қорына ақынның 85 жылдығына арнап басылып шыққан 5 томдық шығармалар жинағын тарту етті. Ақынның әр мерейтойларында шығармалары жаңа кітап болып шығып отырған. Биыл да ақынның 95 жылдығына орай бес томдық шығармалары жарық көретін болады. Сонымен қатар, шайырдың 95 жылдығы республикалық көлемде аталып өтпек. Ұлының айтуынша, ақынның сөзіне жазылған 100-ге жуық әні жаңа форматта қайта өңделіп, диск түрінде шығады. Сондай-ақ, ақынның өмірі мен шығармашылығына арналған «Жырлары – елге мұра, ұрпаққа аманат» атты көрме ұсынылды. Көрмеде ақынның жеке мұрағатынан алынған фотосуреттері, еңбек-тері және жазу машинасы қойылды. Кеш соңында жиналған қауым Аманжол Шамкеновтің шығармашылығы жайлы өз ойларымен бөлісті.

Айдана БОРАНБАЕВА.

Суреттерді түсірген – Есенжол Исабек.

Количество показов: 742

Возврат к списку