Ж.Аймауытов атындағы облыстық қазақ музыка-драма театрының құрылғанына биыл 35 жыл толмақ. Осы уақыттан бері кәсіби шеберлігі шыңдалған әртістерден құрылған ұжымның сахналаған әр қойылымы жергілікті көрерменнің ыстық ықыласына бөленіп келеді. Қазіргі уақытта аталмыш театр республикалық өнер ордаларының алдыңғы қатарынан көрініп жүр.
Өнер ордасының репертуарында 90-нан астам әртүрлі жанрдағы қойылым бар. Театр сахнасында әлемдік, орыс және ұлттық драматургиялық бағытындағы үздік қойылымдар ұсынылып, көрермен қауымның сұранысына ие болып жүр. Содан бері бұл өнер ордасында талай талантты жас әртіс өнер көрсетіп, бекзада өнерге алғашқы қадамдарын басты. Аталмыш театрдың сахнасында өнер көрсетіп жұлдызын жаққан әртістердің бір тобы Ақық Таспаева, Медет Садығазин, Құралай Мұсанова және Райхан Жұмақанова облыстық С.Торайғыров атындағы кітапханада оқырман қауыммен жүздесті.
Кездесуді театрдың негізін қалаушылардың бірі, Қазақстан Республикасының мәдениет қайраткері, «Ерен еңбегі үшін» медалінің иегері Ақық Таспаева театрдың тарихынан бастады. Сөзінше, облыстық театр осы кітапхана қабырғасында құрылып, 1990 жылы 6 желтоқсанда М.Әуезовтің «Айман-Шолпан» музыкалық комедиясымен ашылған. Ұжымның тұсаукесер қойылымының қоюшы режиссері – ҚР еңбек сіңірген мәдениет қайраткері, Мемлекеттік сыйлықтың лауреаты, театрдың қалыптасуында Ерсайын Тәпенов жетекші рөл атқарған.
— Бала кезім. Бір күні теледидарды тамашалап отырсам, белгілі әнші Роза Рымбаеваның «Әлия» әнін ерекше құлшыныспен орындап жатқанын байқадым. Содан шабыт алдым ба екен, болашақта әнші боламын деген арман пайда болды. Сол арманның жетегімен Алматыдағы консерваторияға оқуға түстім. Дегенмен, оқу ордасының басшылығы дауыстың уақыт өте келе жоғалатынын, одан да театр бағытын таңдауыма кеңес берді. Ол уақытта театр саласынан хабарсызбын. Содан бағыма қарай театр институтына оқуға түстім. Жетекшім белгілі актер, Халық әртісі Кәукен Кенжетаев болды. Ол кісіден көп нәрсе үйрендім. Кейін Павлодар қаласына театр ашуға келдік. Содан бері 35 жылдай уақыт өтіпті. Осы уақыт аралығында «Қарагөз», «Айман-Шолпан» секілді әртүрлі жанрдағы қойылымдарда зұлымның да, жағымды кейіпкердің де рөлін сомдадым. Сондықтан өзімді бақытты актрисамын деп айта аламын, — дейді театр әртісі.
Ал театрдың белді әртістерінің бірі Медет Садығазин өзі сомдаған кейіпкерлерінің ешқайсысын бөліп-жарғысы келмейтінін және әрқайсысының өзі үшін орны бөлек екендігін айтады.
— Актерге рөлдің қиыны немесе оңайы болмайды. Қай кейіпкерді болса да сомдап шығуға тырысады. Мен комедия жанрындағы рөлдерді де, драма жанрындағы кейіпкерлерді де ойнадым. Менің жаныма бәрі жақын. Біз көрерменнің ыстық ықыласын көргенде шынайы қуанамыз, іштей риза боламыз. Себебі сахнада тұрған бізге алдымен көрерменнің шынайы эмоциясы сезіледі. Сол кезде көрерменмен бір толқында боламыз. Бұл бізге бақыт сыйлайды. Ал қойылым біткеннен кейінгі бес минуттық қошемет ары қарай шабыттандырады. Шабыт еңбекке жетелейді, — деді ол.
Кездесу барысында театр әртістері мамандықтың қыр-сырымен, өз тәжірибелерімен бөлісіп, театрдың тарихы туралы баяндады. Шара соңында студенттер мен әскери бөлім сарбаздарының сұрақтарына жауап берді. Кеште, сондай-ақ, облыстық кітапхананың ұйымдастыруымен «Сахна өнері» атты көрме ұсынылды.
Театр сахнасында осы уақыт аралығында 600-ден аса пьеса қойылып, 30 мыңнан аса спектакль ойналған. Оны шамамен 20 млн адам тамашалаған. Қазіргі уақытта бүгінгі ұжым театр репертуарын ерекше қойылымдармен, ауқымды театр жобаларымен, жаңа жұмыс әдістерімен байытуда.
Суреттерді түсірген – Есенжол Исабек.
Айдана БОРАНБАЕВА.