Жылқы шаруашылығын субсидия-лаудың үш жаңа бағыты асыл тұқымды мал шаруашылығын дамытуды, мал шаруашылығы өнімінің өнімділігі мен сапасын арттыруды субсидиялау қағидаларына енгізілген.
Ауыл шаруашылығы министрінің тиісті бұйрығы 14 қазанда күшіне енді. Бұл туралы ҚР Ауыл шаруашылығы министрлігінің баспасөз қызметі хабарлады.
Бұл шаралар мініс жылқылардың отандық тұқымдарын сақтау және өсімін молайту үшін жағдай жасау мақсатында қабылданды. Атап айтқанда, ережелерге асыл тұқымды орталықтардың шетелдік селекцияның жылқы шаруашылығы бағытындағы асыл тұқымды айғырларды сатып алуы, мініс жылқылардың отандық тұқымдарының асыл тұқымды малымен селекциялық-асылдандыру жұмыстарын жүргізу, Қазақстан Республикасының аумағында шығарылған мініс жылқы тұқымдарының асыл тұқымды басын ұстауға жұмсалған шығындарды өтеу бағыттары енгізілді. Сондай-ақ, енгізілген өзгерістерге сәйкес, республикалық маңызы бар қалаларға жақын орналасқан тауар өндірушілер ауыл шаруашылығы мақсатындағы елді мекендердің жер санатын көрсете отырып, субсидиялар алуға үміткер бола алады. Бұдан басқа, құрғақшылық аймақтарда орналасқан, жемшөп тапшылығы өткір тұрған барлық шаруашылықтар үшін жемшөпті субсидиялаудың төтенше жағдайларына ерекшелік енгізілуде.
Естеріңізге сала кетейік, жазда Сенат депутаттары мініс және жүйрік жылқылардың отандық тұқымдарын сақтау және көбейту мәселелері бойынша заңнамаға түзетулер қабылдаған болатын. Түзетулер Қазақстан аумағында өсірілетін мініс жылқы тұқымдарының асыл тұқымды басын ұстауға жұмсалған шығындарды өтеуді көздейді
Алтынбек МҰҚЫШЕВ.