Қазақстанның ауыл шаруашылығы министрінің бұйрығымен 2024 жылғы 31 тамызға дейін ел аумағынан, оның ішінде Еуразиялық экономи-калық одаққа мүше мемлекеттерге қантты экспорттауға уақытша тыйым салынды.
ҚР Ауыл шаруашылығы министрлігінің баспасөз қызметінің хабарлауынша, бұйрық 2024 жылдың
14 маусымынан бастап күшіне енді.
— Тыйым ҚР аумағы арқылы қанттың халықаралық транзитіне, сондай-ақ, қанттың Еуразиялық экономикалық одаққа мүше бір мемлекеттің аумағынан Еуразиялық экономикалық одаққа мүше екінші мемлекеттің аумағына Қазақстан Республикасының аумағы арқылы өтуіне қатысты қолданылмайды, — делінген хабарламада.
АШМ нақтылағандай, қантты әкетуге уақытша шектеу шараларын белгілеу туралы шешім 2024 жылғы
6 мамырда Сыртқы сауда саясаты және халықаралық экономикалық ұйымдарға қатысу мәселелері жөніндегі ведомствоаралық комиссияның отырысында қабылданды.
— Жазғы кезеңде ішкі нарықта халық тарапынан да, индустриалды тұтынушылар тарапынан да қант тұтынудың өсуі байқалады. Осыған байланысты қантты әкетуге уақытша тыйым салу ішкі нарықты қамтамасыз ету және оның кері экспортын болдырмау мақсатында енгізілді, — деп нақтылады ведомствода.
Ауыл шаруашылығы министрлігі қазіргі уақытта елдегі қант қоры қант қызылшасының жаңа өнімі келгенге дейін қантқа деген сұранысты қамтамасыз ету үшін жеткілікті деп сендірді. Сонымен қатар, отандық қант зауыттары қант өндіру үшін үшінші елдерден қамыс шикізатын әкелуді жүзеге асырады. Министрлік өнеркәсіптік өңдеу үшін шикі қантты бажсыз әкелуге өтінімдерді қабылдауды жалғастыруда. АШМ деректері бойынша, ЕЭК шеңберінде Қазақстан үшін ағымдағы жылға 300 мың тонна көлемінде шикі қантты бажсыз әкелуге квота келісілді.
Алтынбек МҰҚЫШЕВ.