Көктем мезгілінде еріген қар суының жиналуы салдарынан өзен-көлдер мен су тоғандарының арнасы көтеріліп, елді мекендерді су шаю қаупі күшейе түседі. Осы орайда Ақтоғай ауданының бірнеше ауылында су тасқынының алдын алу және жою шаралары қарқынды жүргізіліп жатыр.
Өткен жылы еліміздің бірнеше өңірінде орын алған су тасқыны облысымыздың елді мекендерін де айналып өтпеді. Табиғи апаттан, әсіресе Ақтоғай ауданының Жалаулы ауылы қатты зардап шегіп, салдарынан 14 үйді су шайып кетті. Алайда жергілікті басшылық осы жылы мұндай қауіп бұл ауылға төнбейтінін алға тартып отыр. Дегенмен, су басу қаупі бар елді мекендер барын да жасырмады. Әсіресе, мұндай қауіп 260 тұрғыны бар Шолақсор ауылынан күтіліп отыр. Қазіргі уақытта аудан әкімдігі су шайып кетуі мүмкін деген жерлерді нығайтып, сақтық шараларын күшейткен.
— Көктемгі су тасқынының алдын алу шаралары аясында Шолақсор ауылында Сілеті өзенінде мұзды бөлшектеу бойынша жарылыс жұмыстары жүргізілді. Ауыл айналасында бұрынғы бөгеттерді көтеру жұмыстары атқарылды. Төтенше жағдайлар бөлімінің қызметкерлері қаптарға құм толтырып, мониторинг жүргізді. Жұмысқа барлығы 40-қа жуық адам, 5 техника және 1 қайық жұмылдырылды, — дейді Жалаулы ауылдық округі әкімінің көмекшісі Жолдасбай Төлепбергенов.
Бүгінде су басу қаупі аймағына кіретін Шолақсор ауылының айналасында биіктігі 2 метрге дейін жететін 8,3 шақырымдық қорғаныс бөгеті дайындалып, ауылдың кіреберіс жолында 5 су өткізгіш құбыры әзірленді. Ал өткен жылы су тасқынынан зардап шеккен Жалаулы ауылында биіктігі 3 метр болатын 2,3 шақырымдық бөгет тұрғызылды. Сондай-ақ, еріген қар суын жинау үшін жалпы көлемі 200 мың текше метр болатын 3 қазаншұңқыр мен 2 су бұру арығы жабдықталды.
Жуырда аудандағы су тасқынының алдын алу жұмыстарымен облыс әкімі Асайын Байханов та танысқан еді. Аймақ басшысы сапар барысында Ақмола облысының Сілеті су қоймасын, оған жақын жатқан өңіріміздегі Ақтоғай ауданының аумағын тікұшақпен тексерді.
Айдана БОРАНБАЕВА.