Өңірімізде Рамазан айының келуін әсем ән, әсерлі әуенмен сүйіншілеп жеткізушілердің қатары көбейіп келеді. Жақында Бұқар жырау атындағы әдебиет және өнер музейінде алғаш рет облыстық «Жарапазаншылар» сайысы өтіп, ұмытылып бара жатқан көне дәстүрімізді қайта жаңғыртты.
Жарапазан сайысын өткізейік деген бастаманы ең әуелі қоғам белсендісі Ертай Қабылқақов көтеріп, әлеуметтік желіде ұсынысын жариялаған болатын. Бастама облыстық мәдениет, тілдерді дамыту және архив ісі басқармасы мен облыстық Мәшһүр Жүсіп мешітінің тарапынан қолдау тауып, барлық ұйымдастыру жұмыстарын бірлесіп жүргізіпті. Сайысқа әр қала және ауданнан қатысушылар келіп, жарапазанның әртүрлі нұсқаларын орындап, өз өнерлерін көрсетті. Шараға облыстық мәдениет, тілдерді дамыту және архив ісі басқар-масының басшысы Медет Тауасқан, ҚМДБ-ның Павлодар облысы бойынша өкіл имамы Жолдас қажы Қоспақұлы қатысып, игі шараның сәтті өтуіне, әр қатысушының сәтті өнер көрсетуіне тілектестік білдірді.
-Жарапазаншыларға «Бәке мен Сәке» дуэтінің әншісі, «Мұрагер» домбра үйірмесінің жетекшісі Батырбек Сәрсебеков, Марғұлан университетінің Музыкалық білім беру бағдарламасының жетекшісі, педагогика ғылымдарының кандидаты Тілеуберді Азаматұлы, Иса Байзақов атындағы облыстық филармониясының әншісі, жарапазаншы, термеші Бауыржан Ерашұлы қазылық қызметін атқарып, үздіктерін анықтады.
Сайыс қорытындысы бойынша Екібастұз қаласының өнерпаздары Біләл Тілеген, Азамат Әсет және Алмас Еділбаевтың триосы бас жүлдеге ие болды. 1-орынды Аққулыдан келген Ғани Нұрсұлтан, Есім Бейбітхан еншіледі. 2-орын ақтоғайлық Махамбет Рамазанға, 3-орын Павлодар қаласынан қатысқан Мизан Жұмәліге бұйырды. Сонымен қатар, Дүйсенбек Қызырбай мен Нұрбек Қуанышбек «Үздік дәстүрлі орындау» номинациясымен, Әміржан Нұрлы «Көрермен көзайымы» номинациясымен марапатталды.
— Қазақтың халықтық мәдениетінде жарапазан айту дәстүрі болғанын барлығымыз білсек те, тұрақты түрде қолданбаймыз. Бұрынғыдай балалар үй-үйді аралап жарапазан айтып, Рамазанды сүйіншілемейді. Сондықтан осындай байқау өткізер болсақ, қазіргі жатсар арасында жарапазан орындаушылар көбейе ме деген ой келді. Ұсынысымды әлеуметтік желі арқылы ортаға салған кезде жергілікті зиялы қауым өкілдері қолдай кетті. Сонымен іске кірістік. Барша қатысушыларға және ұйымдастырушыларға алғысымды білдіремін, — дейді идея авторы Ертай Қабылқақов.
Тілеуберді САХАБА.