Қазіргі су қоймаларынан мол көлемде су босатылып, қар еріген шақта жекелеген елді мекендерге су кіру қаупі туындайтыны жасырын емес. Өткен жылы Ақтоғай ауданына қарасты Жалаулы ауылының тұрғындары қарғын судан зардап шексе, биыл осы аудандағы Шолақсор елді мекеніндегі жағдай алаңдатып отыр. Жалпы, өңірдің өзге аудандарындағы жағдай қандай? Су тасқынының алдын алу үшін қандай шаралар атқарылуда? Бұл сауалдарға жауап алу мақсатында бірнеше аудан басшылығына арнайы хабарласып, мән-жайды білген едік.
Жыл сайын Екібастұз қаласының ауылдық аймағы мен Ақтоғай ауданына қарасты бірнеше елді мекен аумағындағы жайылымдарды суға толтыру үшін лимандық жүйелерден шаруашылық мақсатындағы жерлерге көп көлемдегі су босатылады.
Табиғатты қорғау мақсатында атқарылатын бұл шара кейін шөптің бітік шығып, шабындықтан мол өнім жинауға оң әсерін тигізуі тиіс. Алдағы бір апта аралығында өңірдегі «ҚазСуШар» мемлекеттік мекемесіне қарасты Қолыбаев және Шідерті лимандық жүйелерінен Екібастұз қаласы мен Ақтоғай ауданындағы бірқатар ауылдың жерлеріне су жіберу басталады. Мұндай шара жыл сайын шабындықтарды суға молайту мақсатында жүргізіледі. «ҚазСуШар» облыстық филиалының басшысы Арман Оспанов Өңірлік коммуникациялар қызметінде өткен брифинг барысында атап өткендей, соның барысында 21 мың гектар жерді су басады.
— Табиғатты қорғау мақсатында атқарылатын мұндай жұмыстың басты мақсаты – Әулиекөл, Бозайғыр, Шығанақ көлдерінің аумағын қамту. Сол арқылы су шаруа қожалықтарына қарасты шабындықтарды басып, кейін сол жерде шөптің бітік шығуына ықпал етеді. Бұл өз кезегінде шаруашылықтарды мал азығымен қамтуға көмектеседі. Сонымен қатар, канал арқылы Екібастұз ГРЭС-2-нің қажеттілігіне су жеткізіледі. Биыл Шідерті су құбыры трассасы мен Шідерті магистральдық каналы бойынша жоспарлы су жіберу көлемі шамамен 120 млн текше метрді, электр станциясы бойынша су жіберу көлемі 66,5 млн текше метрді құрады. Ертіс өзені бойында орналасқан Қолыбаев лимандық массивін толтыру үшін шамамен 60 млн текше метр су қажет, — деді А.Оспанов.
Бұл бағыттағы жұмыстардың кедергісіз жүргізілуі үшін былтыр Шідерті су арнасы бойында жекелеген құрылыс жұмыстары жүргізіліп, арнаның түбі тегістелді. Сонымен қатар, 236 метрлік дамбыны жоспарлау, таспен нығайту ісі атқарылды. Жалпы, 1967 жылы салынған Шідерті жүйесінде 135 шақырым тракт пен 67 шақырымға жалғасқан су арнасы бар.
Арман Оспановтың айтуынша, қазіргі уақытта елді мекендерді су басу қаупі жоқ. Тасқын судың қауіпсіз өтуін қамтамасыз ету мақсатында Ертіс бассейндік инспекциясы, төтенше жағдайларды жою органдары қызметкерлерімен бірлесіп, Шідерті су өткізгіш тракты, Шідерті магистральды арнасы, Қолыбаев лиман массиві және Беловод топтық су құбыры гидротехникалық құрылыстарына комиссиялық тексеру жүргізді. Гидравликалық жүйенің жағдайы қанағаттанарлық.
Айдана ҚУАНЫШЕВА.
Сурет газет мұрағатынан алынды.