Республика күніне орай Жастар бастамаларын дамыту орталығында жастар арасында «JALYN» құрылтайы өтті. Жастардың патриотизм сезімін нығайту, жастар арасында белсенді азаматтық ұстанымды дамыту және қазақ тарихы мен мәдениетін ілгерілету мақсатында ұйымдастырылған шараға әр саланың белсенді жастары қатысып, өзара пікір алмасты.
Шараның негізгі бөлігінде спикерлер республиканың қалыптасуының негізгі кезеңдері, оның тәуелсіздігі мен егемендігі, сондай-ақ Қазақстанның дамуында маңызды рөл атқарған тарихи қайраткерлер мен өз салалары жөнінде баяндама жасады. Солардың бірі — Павлодар қаласындағы химия-биология бағытындағы Назарбаев зияткерлік мектебі басшысының орынбасары Нұрболат Теміров. Жас ұстаз өз баяндамасында педагогика саласы мен ұстаздың мәртебесі және қоғамдағы орны туралы сөз етті.
— Елдің ертеңі – жастар. Олар мықты, білімді, саналы болса, мемлекеттің болашағы жарқын, келешегі кемел болары сөзсіз. Әсіресе, педагогика саласын таңдаған жастарға артылар жүк ауыр. Негізі, тәрбие мен білімді жекелей қарастыра алмаймыз. Себебі, «тәрбиесіз берілген білім — адамзаттың қас жауы». Сондықтан қазіргі уақытта мектептегі ұстаздардың басты миссияларының бірі – оқушының бойына ұлттық құндылықтарды, ұлттық сана мен ұлттық рухты бойына қалыптастыру арқылы білім беру, — деп атап өтті Н.Теміров.
«Кенжекөл жастары» жастар қоғамдық бірлестігінің үйлес-тірушісі Жұлдыз Малдыбаева шара қатысушыларына еліміздің әлеуметтік-экономикалық дамуына және іргетасының нығаюына өз қатысуын сезінуге мүмкіндік бергендігін айтады.
— Тәуелсіздікті нығайтудағы және ұлттық дәстүрлерді жалғастыруда жастардың рөлін талқылау маңызды. Осыған орай ұлттық мереке қарсаңында жастар форумын өткізуді жөн санадық. Форумның спикерлері — өңіріміздің белсенді жастары. Олар — тарих, саясат, мәдениет салаларының өкілдері. Олар жастарды қоғамдық өмірге белсенді қатысуға, елдің болашағын құруға шабыттандыра отырып, өз салалары бойынша баяндама жасады, — деді Ж.Малдыбаева.
Жастар арасында өткен құрылтай әлеуметтік маңызы бар жобаларда, шығармашылықта, спортта және кәсіпкерлікте өзін танытқан облыстың жас көшбасшыларын Республика күніне орай Алғыс хаттармен марапатталуға жалғасып, облыстық эстрада әншілерінің концерттік бағдарламасымен аяқталды.
Айдана БОРАНБАЕВА.
Суреттерді түсірген – Есенжол Исабек.