Соңғы жылдары өңірлік жастар ұйымдарының жұмыстары қарқынды дамуда. Олар жан-жақты бағытты қамтып, аудандық ұйымдардың да әлеуетін ашуда. Бірі — еріктілер, екіншісі жұмыспен қамту, енді біреуі кәсіпкерлік саланы дамытып келеді. Осы орайда Павлодар қаласының Жастар бастамаларын дамыту орталығының директоры Ризат Рахымжановпен әңгімелесіп, өңірдегі іске асып жатқан маңызы зор жобалар жайлы әңгімелестік.
— Ризат Русланұлы, орта-лықтың негізгі қоғамға әсері зор дәстүрлі өткізілетін жобалары жайлы айтып кетсеңіз…
– «Jastar vibe» жобасы қаламыздағы жастарға арналған шығармашылық және білім беру бастамаларын дамытуды жалғастырып келеді. Бұл жоба жастардың тиімді әрі мазмұнды бос уақытын ұйымдастыруға бағытталған және апта сайын әртүрлі тақырыптар бойынша жүргізіледі.
«SkillBox» жобасы – жастар мен мамандардың кәсіби және жеке құзыреттерін дамытуға бағытталған тұрақты білім беру платформасы. Жоба түрлі сала өкілдерін біріктіріп, қатысушылардың soft skills, көшбасшылық, коммуникация, өзін-өзі реттеу және цифрлық сауаттылық дағдыларын дамытуға мүмкіндік берді. Нәтижесінде өңір жастарының кәсіби әлеуеті артып, еңбек нарығында бәсекеге қабілеттілік деңгейі күшейді.
«Шеберхана» жобасы – жастардың шығармашылық әлеуетін дамытуға бағытталған. Бұл жоба шеберлік сабақтары мен тренингтерді қамтиды, олар жастарға өз мүмкіндіктерін ашып, қабілеттерін жетілдіруге, білімін толықтыруға көмектеседі.
«JJ: Jastarga Jumys» жобасы – жастарды еңбекке орналастыру және жұмыс берушілермен байланысты нығайтуға бағытталған жүйелі бастама. Аталған жоба аясында жыл сайын жұмыс жәрмеңкелері, тренингтер, workshop-тар мен диалогтық алаңдар өткізіліп, жүздеген жас тұрақты немесе уақытша жұмыспен қамтылды. Бұл жоба жастардың еңбек нарығына бейімделуіне, кәсіби бағдар алуына және өз әлеуетін жүзеге асыруына мүмкіндік берді.
«Жас Сарбаз» жобасы аясында жастардың патриоттық, дене шынықтыру және рухани дамуына ерекше мән беріледі. Бұл шара — жастарды өмірі мен денсаулығын сақтау бойынша жауапкершілікті талап ететін маңызды жағдайларға дайындықтың маңызды кезеңі.
«The Trend Academy» жобасы – заманауи цифрлық және креативті индустрияларда сұранысқа ие жаңа дағдыларды меңгертуге арналған бастама. Курстар мен мастер-кластар арқылы жастар SMM, мобилография, жасанды интеллект, кәсіпкерлік және шығармашылық бағыттарда жаңа білім мен тәжірибе жинақтады. Бұл жоба жастардың өзін-өзі дамытуына және еңбек нарығында жаңа бағыттарды игеруіне жол ашты.
«Көшелердің келбеті» жобасы – бұл қала көшелері туралы, олардың тарихы мен қазіргі жағдайы жайлы бейнероликтер түсіруді көздейтін видеожоба. Бұл жоба жергілікті дәстүрлерді сақтау мен танымал етуге септігін тигізеді, қала тұрғындарын өз ортамен жақынырақ таныстырады, мәдени мұраға деген қызығушылықты арттырады және жастардың заманға сай сауаттылығын жоғарылатады. Сонымен қатар, бұл жоба қалалық ортаны және өмір салтын терең түсінуге ықпал етеді.
Ал «PRO Business» жобасы – жастар арасында кәсіпкерлік ойлауды дамыту мен қаржылық сауаттылықты арттыруға арналған тұрақты бағдарлама. Қатысушылар бизнес-идеяларды жүзеге асыру, сатуды ұйымдастыру, қаржы жоспарлау және нарықтағы өзіндік орнын табу сияқты практикалық дағдыларға ие болды. Бұл жоба өңірде жас кәсіпкерлердің қалыптасуына үлкен үлес қосты.
«Өмірді барынша толық өткізу: нашақорлықсыз» стратегиялық сессиясында жастар арасында нашақорлық мәселесі талқыланады. Қатысушылар тәуекел тобындағы адамдарға бағытталған алдын алу және қолдау бағдарламаларын жасауға жұмыс жасайды.
«VolunteerPVL» жобасы – волонтерлерге арналған платформа құруға бағытталған. Бұл платформа арқылы олар түрлі әлеуметтік жобаларға қатысу мүмкіндіктерін тауып, тәжірибе алмасады.
«Жастар ВДЕЛЕ» жобасы жастарды қоғамдағы белсенді азаматтық ұстанымға жұмылдыруды мақсат етеді. Олар әлеуметтік жобалар мен акцияларға қатыса отырып, өздерінің өзекті мәселелерін шешуге қатысады.
«Baspana» жобасы — жастар мен жас отбасыларды тұрғын үй бағдарламалары жөнінде ақпараттандыруға бағытталған маңызды бастама. Жоба аясында Отбасы банк өкілдерімен кездесулер өткізіліп, қатысушылар мемлекеттік тұрғын үй бағдарламаларына қатысу ережелерімен, жинақ жүйесімен және несие алу шарттарымен танысты. Бұл бастама тұрғын үй мәселесін шешу бағытында жастарға нақты қолдау көрсетті.
«Шаңырақ» және «Жеке шекара» жобалары — психологиялық қолдау мен отбасы институтын нығайтуға бағытталған дәстүрлі әлеуметтік бастамалар. Олар жастар мен ата-аналарға арналған тренингтер, арт-терапиялар және мотивациялық кездесулер арқылы қоғамдағы рухани тұрақтылық пен эмоционалды сауаттылықты арттыруға ықпал етті. Бұл жобалар қоғамда өзара түсіністік, сенім және қолдау мәдениетін қалыптастыруға бағытталған.
Осы дәстүрлі жобалардың барлығы өңір жастарының кәсіби, әлеуметтік және тұлғалық әлеуетін дамытып, Павлодар облысындағы жастар саясатының сапалы дамуына тікелей әсер етті.
— Биыл қандай жаңа жобалар іске асты? Олардың маңызы қандай?
– «Тарихтың ізімен» жобасы аясында бір күндік алты экскурсиялық сапар ұйымдастырылды. Бұл іс-шарада қатысушылар Павлодар облысының маңызды тарихи- мәдени орындарын, сонымен қатар табиғи көрікті жерлерін аралады. Оларға Железин және Шарбақты аудандарындағы тарихи-өлкетану мұражайлары, Екібастұз қаласындағы музейлер, Баянауыл ауданында ұлы ақын әрі қоғам қайраткері Мәшһүр Жүсіп Көпейұлының мазары, Май ауданындағы «Қалмаққырылған жері» мемориалдық орны және Аққулы ауданындағы Мерғалым ата мазараты кіреді.
Жобаның басты оқиғаларының бірі – Павлодар қаласының орталық жағалауында өткен «Dala Sound» концерті болды. Бұл шара жастардың шығармашылығының шеруленуіне әрі алдын ала іріктеуден өткен жас орындаушыларды атады. Сонымен қатар, «Арбат» жастар көрмесі өтті, онда қолөнер бұйымдары қойылды, бұл дәстүрлі өнерді насихаттауға ерекше ықпал етті.
Ең маңызды іс-шаралардың бірі – «Baby Start 2025» атты отбасылық чемпионаты болды. Бұл мереке кішкентайларға арналған көңілді жарыс қана емес, сонымен бірге отбасыларды біріктіруге, тәжірибе алмасуға, ата-ана-ерлі-зайыптылық қатынастарын нығайтуға арналған алаң болды. Жүкті әйелдер үшін өткізілген бес кездесуде психологтар мен ден-
саулық сақтау мамандары қорқыныштарды жеңу, саналы ана болу және ішкі тепе-теңдікке жету бойынша кеңестер берді.
Тағы бір айта кететін жайт — «Baby Shower Party» тойы. Бұл шара болашақ аналарға қуаныш сыйлады. Онда олар сыйлықтар алып, кеңес беретін мамандардан қолдау көрді. Сонымен қатар, ата-аналармен өткізілген білім беру және алдын алу кездесулерінде бала тәрбиесі мен отбасы құндылықтары талқыланды.
— Ал «Жұмысшы маман-дықтар жылына» орай қандай шаралар өткізілуде?
– 2025 жыл Қазақстанда «Жұмысшы мамандықтар жылы» болып жариялануына орай, Павлодар облысының Жастарды қолдау орталығы осы бағытта бірқатар мазмұнды іс-шаралар ұйымдастырды. Бұл шаралар жастар арасында еңбек мәдениетін дәріптеуге, техникалық мамандықтардың беделін арттыруға және жұмысшы кәсіптерге қызығушылықты оятуға бағытталды.
«JJ: Jastarga Jumys» жобасы аясында бірқатар кәсіби бағдарлық және еңбекке бейімдеу іс-шаралары өткізілді. «Әр дауыс маңызды» атты диалогтық кездесу «Жұмысшы мамандықтар жылы» аясында ұйымдастырылып, студенттік көшбасшылар мен өндіріс өкілдерін бір алаңда тоғыстырды. Кездесу барысында жастардың еңбек нарығына бейімделуі, техникалық мамандықтардың қоғамдағы маңызы және өндіріс саласындағы мүмкіндіктер талқыланды. Сондай-ақ жастар арасында «Bilim All» атты квиз-ойыны мен еңбек қауіпсіздігі тақырыбындағы дебаттар өткізіліп, қатысушылардың құқықтық және кәсіби сауаттылығы артты.
«BB: Bolashaqga Bagdar» жобасы шеңберінде де жастардың кәсіби бағдарын айқындауға арналған түрлі іс-шаралар ұйымдастырылды. Оқушылар мен студенттерге арналған экскурсиялар, тренингтер мен кәсіби кездесулер арқылы жастар техникалық мамандықтармен жақынырақ танысты. Бұл олардың еңбек нарығына бағыт алуына, нақты кәсіби шешім қабылдауына көмектесті.
«SkillBox» жобасы аясында да өндіріс және техникалық сала қызметкерлеріне арналған оқыту тренингтері өткізілді. Атап айтқанда, «KSP Steel» және «Қазақстан алюминийі» АҚ кәсіпорындарының қызметкерлері үшін командалық жұмыс пен тиімді коммуникация бойынша тренингтер ұйымдастырылып, жастардың кәсіби құзыреттілігі мен көшбасшылық қабілеттері артты.
Жалпы алғанда, «Жұмысшы мамандықтар жылы» аясында өткізілген іс-шаралар өңір жастарының еңбекке деген көзқарасын қалыптастыруға, өндірістік кәсіптердің маңызын арттыруға және техникалық бағыттағы мамандықтардың беделін көтеруге бағытталды. Бұл бастама Павлодар облысы жастарының еңбек нарығында өз орнын табуына және кәсіби тұрғыда дамуына нақты серпін берді.
— Орталықтың алға қойған жоспарлары қандай?
– Орталықтың негізгі жоспарлары алдағы уақытта жастармен жұмыс сапасын арттыруға, жаңа жобалар мен бағдарламаларды іске асыруға бағытталған. Сонымен қатар, жастардың кәсіби және рухани дамуына ерекше көңіл бөлу көзделуде. Бұл шаралар жастардың қоғамға белсенді қатысуына және елдің әлеуметтік-экономикалық дамуына үлес қосуына ықпал етеді.
Сұхбаттасқан – Салтанат ҒАББАС.