Дубайда өткен «Тhe UAE SWAT Challenge» халықаралық жарысының жеңімпаздары елге оралды. Бес күнге созылған арнайы жасақ олимпиадасына әлемнің түкпір-түкпірінен 100-ден астам команда қатысты. Қазақстанның күштік құрылымдарының атынан 12 команда бақ сынап, халықаралық жарыстың күміс жүлдегері атанды. Көк байрақты желбіреткен жеңімпаз команданың құрамында жерлес жауынгеріміз бар.
Мемлекет басшысы Қасым-Жомарт Тоқаев аталмыш халықаралық сайыста топ жарған күштік құрылым қызметкерлерін марапаттап, кезектен тыс наградаларын табыс еткен болатын. Ел Президенті қазақтың көк байрағын биік көтерген әрбір жауынгердің жеңісін жоғары бағалап, бұл табыс тиянақты дайындық пен қажырлы еңбектің нәтижесі екенін атап өтті.
— «Елдің атын ер шығарар» деген. Сайыпқыран сарбаздарымыз көк туымызды асқақ желбіретті. Төрткіл дүние жауынгерлеріміздің мықтылығына куә болды. Біз сіздерді мақтан тұтамыз. Осындай жеңісті сәттер барша халқымыздың, әсіресе, өскелең ұрпақтың рухын көтереді. Ел қорғаны мықты болса, Қазақстанның еңсесі әрдайым биік болмақ, – деді Қасым-Жомарт Тоқаев.
Сонымен қатар, ел Президенті халқымыздың ерлік дәстүрі тереңде жатқанына назар аударып, халықаралық жарыста қырағылық танытып, әскери машықтарының мықты екенін мойындатқан әрбір қазақ жауынгеріне алғыс білдірді.
– Биыл Ұлы Жеңістің 80 жылдығын атап өтеміз. Бұл – бостандық пен әділдік ұғымдарын ту етіп, майданда жанқиярлықпен шайқасқан, тылда еңбек еткен барша қазақстандықтарға көрсетілген құрмет. Батырларымыздың теңдессіз ерлігін ұрпақ жадында сақтау – парызымыз. Бүгінде сіздер жауынгер халықтың ұрпағы ретінде Отан алдындағы қасиетті парызды терең түсініп, адал қызмет етіп жүрсіздер. Бәріңіз де еліміздегі бейбіт өмірді сақтау үшін табанды еңбек етіп келесіздер. Сіздерді заң мен тәртіп сақшысы деуге толық негіз бар. Заң мен тәртіп – әділетті әрі қауіпсіз мемлекеттің өзегі, – деді Президент.
Мемлекет басшысының қабылдауында болып, марапатқа ие болған қазақ жауынгерлерінің арасында жерлесіміз, Ұлттық ұланның «Шығыс» өңірлік қолбасшылығына қарасты № 5512 әскери бөлімінің қызметкері, лейтенант Ислам Зейнуллин де бар. Аталған әскери бөлім командирі, подполковник Арман Пернеқұлов халықаралық аренада еліміздің абыройын асқақтатып, көк байрағымызды желбіреткен қазақ жауынгерлерінің жеңісі — бұл, ең алдымен, қажырлы еңбектің, үйлесімді іс-әрекеттің және адал қызметтің нәтижесі екенін жеткізді.
— Бұл жеңіс — жас жауынгерлердің бойына патриоттық рух қалыптастырып, күш-жігерлерін жани түспек. Әлемнің 80 елінен 100-ден астам үздік арнайы жасақ командалары қатысқан жарыста әскерилер бес күн бойы сайыс сынақтарынан өтті. Қатысушылар тактикалық, шабуылдау және құтқару операцияларын орындап, тұтқындарды босату және кедергілер жолағынан өту сияқты тапсырмаларды орындады, — деді әскери бөлім командирі. Жеңімпаз жауынгеріміз Ислам қазақстандық құрама үшін тақым қысып, қолдау білдірген барша қазақстандыққа алғыс айтып, ақжарма тілегін ақтарды. Айтуынша, қандай құрылымда қызмет етсе де жаһандық жарыста әр жауынгердің міндеті ортақ болды. Бұл — елдің қорғаны болып, қауіпсіздікті сақтау, заң мен тәртіпті орнатуға күш салу, ел абыройын асқақтату.
— Әскери бөлімде қызмет етіп жүргеніме 10 жылдан астам уақыт болды. Ұлттық құрамаға іріктеуден өтіп, халықаралық жарыста бақ сынауыма мүмкіндік туды. Мұндай сайысқа алғаш рет қатысып отырғаныммен үздік нәтиже көрсете білдік. Жарыс барысында әлемнің үздік жауынгерлері шынайы операциялар негізінде жасалған бес күрделі кезеңнен өтті. Оның бәрі бізге мол тәжірибе берді, өйткені жарыста практика, тактика бәрі бірге жүрді. Бұл арнайы жасақта жүрген қызметші үшін аса маңызды. Келесі жылға дайындалып, жүлдегер атануымызға бар күш-жігерімізді саламыз, — дейді ол.
А.МҰҚЫШЕВ.