Бұрнағы күні Алматыда «Айбоз» ұлттық әдеби сыйлығының жеңімпаздары марапатталды. Қаламгерлер бәйгесінде «Үздік әдеби аударма» номинациясы бойынша халықаралық деңгейдегі аудармашы, жерлес қаламгер, Қазақстан Жазушылар одағының мүшесі Рауза Мұсабаева жеңімпаз атанды.
Биыл «Айбоз» ұлттық әдеби сыйлығына 7 номинация бойынша 176 өтінім түсті. Қазылар алқасының шешімімен «Махамбеттің өлім жазасы» рома-нының авторы Бекет Қарашин «Үздік проза» номинациясының жеңімпазы атанса, «Үздік поэзия» номинациясында – «Айкөркем» балладасының авторы Маралтай Райымбекұлы жеңіс тұғырына көтерілді. «Үздік драматургия» номинациясы бойынша жазушы Думан Рамазан «Әзірет Сұлтан» пьесасымен топ жарса, «Үздік балалар әдебиеті» номинациясында Төкен Әлжантегінің «Қызықтың бәрі ауылда» шығармасы жеңімпаз атанды. Бұдан бөлек, «Үздік әдеби сын» номинациясында Жүсіпбек Қорғасбектің «Сайтанның ойыны» еңбегі марапатқа лайық деп танылса, Жақсылық Сәбитовтің «Жошы хан» жұмысы «Үздік комикс» аталымында топ жарды. Ал, «Үздік әдеби аударма» номинациясы бойынша жерлес қаламгер, білікті аудармашы, Қазақстан Жазушылар одағының мүшесі, ұстаз Рауза Мұсабаева неміс жазушысы Э.Хуммельдің «Таң жұлдызы» романын қазақ тіліне тәржімалап, жеңімпаз атанды. Ұлттық әдеби сыйлықтың жалпы жүлде қоры 35 миллион теңгені құрады.
Айта кетейік, Рауза Мұсабаева – Алматы педагогикалық шет тілдері институты (бүгінгі Абылайхан атындағы Әлем тілдері және халықаралық қатынастар университеті) неміс тілі факультетінің түлегі. Ол бұған дейін неміс жазушысы Э.Хуммельдің «Берлин балықтары» романын, швейцариялық жазушы Франц Холердің «Елең ғұмыр» романын, Германия, Австрия, Швейцария, Франция жазушыларының және ресейлік неміс авторларының көркем шығармаларын, новеллаларын, әзіл әңгімелерін, 20 детектив, «Таңғажайып глобус» ертегілер топтамасын, балаларға арналған 43 суретті ертегі кітапшасын, көптеген танымдық дүниелерді, қанатты сөздерді аударған. Сондай-ақ, «Gold Cinema» компаниясының тапсырысымен 4 деректі фильмді қазақшалады. Қаламгердің аудармалары, мақалалары республикалық басылымдарда жарық көріп, оқырмандардың үлкен сұранысына ие.
Өз тілшіміз.