Кеше Халықаралық балалар кітабы күні қарсаңында Торайғыров университетінде «BIR TOLQYNDA»: «Кітап — болмыстың рухани негізі» тақырыбында жастармен кездесу өтті. Мазмұнды шарада жергілікті зиялы қауым өкілдері, жас ақындар кітап оқу мәде-ниеті туралы ойларымен бөлісті.
Келелі кездесуге «AMANAT» партиясының хатшысы Шолпан Каринова, Павлодар облысы әкімінің орынбасары Айгүл Мәлікова және облыстық мәслихат төрағасы Илья Теренченко арнайы қатысты. Шолпан Таңатқызы маңызды жиын Мемлекет басшысы Қасым-Жомарт Тоқаевтың Түркістанда өткен Ұлттық құрылтайда айтылған тапсырмасы аясында жүзеге асырылып отырғанын жеткізді.
— 2 сәуір – Халықаралық балалар кітабы күні әлем бойынша кең көлемде аталып өтеді. Балалар әдебиетінің атасы Ыбырай Алтынсариннің «Кел, балалар, оқылық!» атты өлеңі әр мектептің әнұранына айналған десем, қателеспеймін. Ұлы Абай атамыздың еңбектерін оқып өскен жастарымыз көп деп санаймын. Адам өмірінде кітаптың орны бөлек. Әрине, қазір технология қарыштап дамыған заманда ақпаратты кез келген әлеуметтік желіден оқи аламыз. Бірақ кітапты қолмен ұстап, көзбен оқыған білімге ештеңе жетпейді. Торайғыров университетінде «Кітапхана ісі» мамандығы бары қуантады. Оқу орнының кітап қорымен танысып, көне әдебиеттерді көріп, қатты қуандым, — деді Ш.Каринова.
Шолпан Таңатқызы «AMANAT» партиясының қарамағында 23 кітап орталығы жұмыс істейтінін алға тартты. Тағы бір заманауи кітап орталығы Ақсу қаласында ашылып, олардың саны 24-ке жетпек. Мұндай игі іс жастармен қатар ересектер арасында да кітап оқу мәдениетін қалыптастыруға мүмкіндік бермек. Аталған орталықтардың қорында жалпы саны 15 мыңға жуық кітап бар. Өткен жылы кітап оқуға қызығушылықты ояту мақсатында 700-ден астам іс-шара өткізілген.
Айгүл Қайыртасқызы аймақта «Кітапхана ісі» мамандығы 3 оқу орнында барын айтты.
— Рухани, мәдени байлығымызды ұрпақтан-ұрпаққа жеткізуде кітапханашылардың еңбегі орасан. Қазіргі уақытта облыста 225 көпшілік кітапхана жұмыс істейді. Оның ішінде 197-сі ауылда орналасқан. Облыста кітапханашылар үш оқу орнында дайындалады. Торайғыров университетімен қатар, Жаяу Мұса атындағы Ақсу колледжі мен Екібастұз Инновациялық Еуразия колледжінде «Кітапхана ісі» мамандығы бар. Облыстағы кітапханалар жастарды қолдау мақсатында 90-нан астам жобаны жүзеге асыруда. Елімізде алғашқылардың бірі болып ауылдық кітапханаларда көпфункционалды ақпараттық және демалыс орталықтары ашылып, өзге өңірлерге үлгі бола алдық. 2024 жылы ауылдарда коворкинг орталықтары ашылды. Бұл ретте Ертіс, Павлодар, Железин, Май және Тереңкөл аудандарының ауылдық кітапханалары тұрғындарға жаңа форматта қызмет көрсетуде. Биыл Ертіс аудандық балалар кітапханасы мен Тереңкөл ауданы Ивановка ауылындағы кітапханада коворкинг орталығы ашылады деп күтілуде. Бүгінде өлкетану кітаптары 100 пайыз цифрлық форматқа көшірілді. С.Торайғыров атындағы облыстық кітапхана — әзірге республикадағы жалғыз онлайн кітапханасы бар орталық. Оқырманға 4 мыңға жуық өлкетану және сирек кітапты ұсынып отыр, — деді А.Мәлікова.
Шара барысында жазушы, әдебиеттанушы Серік Елікбай, «Қазақ тілі» қоғамы облыстық филиалының басшысы Асылбек Туғанбай кітап оқу мәдениетін қалыптастыруда өз ойларын ортаға салды.
Айдана ҚУАНЫШЕВА.