Барша мұсылман қауым бір айлық парыз оразасын аяқтап, Ораза айт мерекесін де ерекше сән-салтанатпен өткізді. Мәшһүр Жүсіп орталық мешітінің ауласында айтқа жиналған қауымға Наурыз көжесі таратылып, түрлі сайыстар ұйымдастырылды.
30 наурыз – Шәууәл айының бірінші күні. Бұл Ислам күнтізбесі бойынша Рамазан айт мерекесінің басталуы болып саналады. Осы күні таңғы сағат 07.00-де ҚМДБ-ның Павлодар облысы өкілдігіне қарасты барлық мешіттерінде Айт намазы оқылды. Мәшһүр Жүсіп орталық мешітінде әдеттегідей алдымен уағыз айтылып, одан кейін айт намазы оқылды. Ал намаздан кейін мешіттің белсенді жамағаты мешіт ауласында палау және бауырсақ таратып, айттың дастарханынан дәм татқызды. Жалпы осы күні жиналған жамағатқа 14 қазан Наурыз көжесі мен палау таратылды.
Ораза айт мерекесіне арналған негізгі шара түстен кейін, сағат 14.00-де басталды. Облыстың бас имамы Жолдас қажы Қоспақұлы барша мұсылман қауымды қасиетті Рамазан айының аяқталуы, айт мерекесінің басталуымен құттық-тады. Содан кейін мешіт жанындағы «Әйел-қыздар» секторының ұйым-дастыруымен әйелдер жамағаты әсем ән мен сазды күйден шашу шашты. Ал мешіт ауласындағы киіз үйде ҚМДБ-ның 35 жылдығына орай діни кітаптар мен тарихи фотосуреттер көрмесі болды. Оған діни басқарманың сарап-
тамасымен жарық көрген кітаптар қойылды. Сонымен қатар, он саусағынан өнер тамған шебер аналар мен әжелер жасаған ұлттық қолөнер бұйымдарының көрмесі болды. Одан бөлек, асыл дініміздің негізгі шарттары мен Пайғамбарымыздың өмірін қамтыған сұрақ-жауап сайысы өткізіліп, жеңімпаздарға сыйлықтар үлестірілді. Айт мерекесінің қызығына куә болған жамағат та ерекше ризашылықпен тарқасып жатты.
— Біздің отбасымыз үшін ұлттық және діни мерекелердің маңызы зор. Соның ішінде Ораза және Құрбан айт мерекелеріне жыл сайын келіп, немерелеріммен бірге тамашалаймыз. Бүгін де сұрақ-жауап сайысына қатысып, түрлі сыйлықтар алды. Осындай қызықты, той-думанды көргеннен кейін болар, немерелерім менен «Апа, айт мерекесі қашан болады» деп жиі сұрайды. Бір сөзбен айтқанда, біздің отбасымыз өзгені емес, өзіміздің айт мерекесін күтеді. Осындай қуаныш сыйлаған ұйымдастырушыларға алғысым шексіз, — дейді Павлодар қаласының тұрғыны Риза Ахметова.
Жолдас ҚОСПАҚҰЛЫ, ҚМДБ-ның Павлодар облысы бойынша өкіл имамы:
— Қасиетті Рамазан айының аяқталғанын білдіретін Ораза айт – мейірімділік пен игіліктің, бірлік пен берекенің, достық пен татулықтың мерекесі. Ораза айт ұлттар мен ұлыстарды ынтымаққа ұйыстырады, бірлікке шақырады. Иманымызды күшейтіп, қонақжай халқымызды жақсылыққа, қайырлы іс жасауға жетелейді. 30 күн оразада халқымыз ыждаһаттылықпен ауыз бекітті, Алладан жарылқау тіледі. Әрбір мұсылманның үйінде қуаныш лебі сезілді, ағайынға ауызашар беріп, қарым-қатынасын нығайтты. Жоқ-жітік жандарға садақа беріп, жақсылық жасады. Ел игілігі үшін қызмет етіп жүрген азаматтар жақсылыққа үлес қосып, сауабы мол амалдарға атсалысты. Ендеше барлықтарыңызға келесі оразаға бастарыңыз аман, бауырларыңыз бүтін жетуге тілектеспін.
Тілеуберді САХАБА.