Егемен ел ертеңі – жастар десек, оларды отансүйгіштік, патриоттық рухта тәрбиелеудің маңызы зор. Аталмыш мәселеге мемлекет тарапынан да ерекше мән беріліп, бірқатар жауапты мекемелерге межелі міндеттер жүктелуде. Яғни, балалардың саналы тәлім-тәрбие алып, ұлттық құндылықтарды бойына сіңіріп өсуіне ата-анамен қатар, қоғам да тікелей жауапты екенін атап өткен жөн. Бұл ретте, павлодарлық жас буынға патриотизмді насихаттауға бағытталған қандай іс-шаралар қолға алынуда? Дәл осы сұрақ «Достық үйінде» өткен облыстық қоғамдық кеңес отырысында талқыланды.
Басты бағыт — үшеу
Алқалы жиында алғаш болып баяндама жасаған облыстық ақпарат және қоғамдық даму басқармасының басшысы Әлнұр Сейдуманов өзі жетекшілік етіп отырған мекеме тарапынан жас ұрпаққа патриоттық тәрбие беру, отбасылық құндылықтарды дәріптеу мақсатында үш бағыт бойынша жұмыс жүргізіліп жатқанын атап өтті.
— Бірінші — мемлекеттік әлеуметтік тапсырыс шеңберінде, екінші — жастарға әскери-патриоттық тәрбие берудің 2030 жылға дейінгі тұжырымдамасы аясында және үшінші – бұқаралық ақпарат құралдары арқылы үгіт-насихат шараларын қолға алудамыз. Енді әрқайсысына жеке тоқталар болсам, біріншіден, былтыр мемлекеттік әлеуметтік тапсырысты іске асыру бойынша басқарма жастардың бойында патриоттық сезімді дамытуға, Қазақстанның тарихын, мәдениеті мен дәстүрлерін құрметтеуге бағытталған 20-ға жуық іс-шара өткізді. Бұл мақсатқа 11 миллион теңге қарастырылды. Сондай-ақ, патриоттық тәрбиені дамыту мақсатында «Ел рәміздері –
жастардың мақтанышы» фотобай-қауы, «Садақ ату – мергендік өнер» сайысы, «Патриоттың келбеті» сауалнамасы, жастардың үздік патриоттық видеоролигі сынды конкурстар ұйымдастырылып, жеңімпаздар мен жүлдегерлерге бағалы сыйлықтар табысталды. Тізбектеп айта берсек, өңірімізде патриоттық іс-шара көп өтті, — деді басқарма басшысы.
Ағымдағы жылы да бұл бағыт-тағы жұмыстар өз деңгейінде жалғасын табуда. Яғни, осы жылы Отан қорғаушылар күніне, Жеңістің 80 жылдығына, ҚР Конституциясының 30 жылдығына, Республика күніне орайластырылған патриоттық іс-шаралар циклын өткізу жоспарлануда.
— Соларға тоқталар болсам, «Батыл жүрек» әскери-патриоттық ән фестивалін өткізу, «Қазақ даласы» командалық ойындарына техникалық-тактикалық дайындық, Ұлы Отан соғысының ардагерлеріне құрмет көрсету, жастардың қатысуымен аймақтық патриоттар форумы ұйымдастырылатын болады. Мектептер мен колледждердің оқушыларын кеңінен қамту мақсатында оқу орындарында олимпиадалар, викториналар, әскери-патриоттық әндер, балалар суреттері мен әскери-патриоттық ойындар сайыстары, спорт түрлері бойынша жарыстар өткізу жоспарланған. Отбасылық құндылықтарды сақтау, өнегелі шаңырақтарды өзгелерге үлгі етуге бағытталған «Мерейлі отбасы» ұлттық байқауы да өткізілетін болады, —
деді Әлнұр Серікұлы. Сонымен қатар, барлық аудан мен қаладағы жас отбасыларына кеңес беру үшін кәсіби психолог, заңгер, репродуктолог дәрігерлерден құралған консультациялық-ресурстық мобильді фронт-офис қызмет көрсетеді деп жоспарлануда.
Басқарма басшысы екінші бағыт бойынша, яғни жастарға әскери-патриоттық тәрбие берудің 2030 жылға дейінгі тұжырымдамасын іске асыру мақсатында облыстық жастар бастамаларын дамыту орталығы базасында әскери-патриоттық клуб ашылып, табысты жұмыс істеп жатқанын жеткізді. Оның сөзіне қарағанда аталмыш клубта «Жас сарбаз» жобасы іске қосылып, жастардың патриоттық тәрбиемен сусындауына, рухани дамуына зор ықпал етуде екен.
— Биыл аталмыш жоба шеңбе-рінде жастармен өзара іс-қимылдың жаңа білім беру форматтарын енгізу бойынша жұмыс жүргізілуде. Онда әртүрлі кәсіптердегі жастардың, оның ішінде өздерінің кіші Отанының дамуына үлес қосатын жұмысшылардың тарихын көрсете отырып, қатысушыларды көбірек тартуға назар аударылатын болады. Сөйтіп, «Жас сарбаз» жобасының іс-шаралары қатысушылардың білімін байытып қана қоймай, олардың белсенді азаматтық ұстанымын қалыптастырады. Жалпы, жастар бастамаларын дамыту орталығы жастарға арналған отбасылық құндылықтарды насихаттау, отбасы және неке институтын қалыптастыруға бағытталған бірқатар іс-шараларды өткізуге мұрындық болады. Сол арқылы ажырасу санын азайту, ата-ана тәрбиесінің сапасын арттыру және дәстүрлі отбасылық байланыстарды нығайту көзделуде, — деді баяндамашы. Сондай-ақ, ол үшінші бағыт – бұқаралық ақпарат құралдарындағы насихат жұмыстарына да тоқталды. Патриоттық іс-шаралар аймақтық БАҚ-та үздіксіз жарияланып, сол арқылы да көпшілік патриоттық тәрбиемен сусындауда.
— Негізгі ақпараттық жұмысты «Saryarqa samaly», «Звезда прииртышья» облыстық газеттері, «Pavlodarnews» агенттігі және «Ертіс», «Ирбис» телеарналары жүргізеді. Мәселен, былтыр БАҚ-та 250-ге жуық материал жарық көрді. Оның ішінде телеарналардың эфирінде
43 сюжет шықты, баспасөз беттерінде 106 мақала, интернет-ресурстарда 97 материал жария етілді. Ал ағымдағы жылдың 1 қаңтарынан 27 наурызға дейінгі аралықта 79 материал жарияланды. Жұмыстар әлі де жалғаса береді, — деп атап өтті басқарма басшысы.
Мәдениет мекемелері мән береді
Қоғамдық кеңесте облыстық мәдениет, тілдерді дамыту және архив ісі басқармасының басшысы Медет Тауасқан да сөз алып, әскери-патриоттық тәрбие беру ісіне қатысты мекеме тарапынан атқарылып жатқан жұмыс барысын баяндады.
— Жас буынның бойында патриоттық сезімді қалыптастыру өскелең өмір талабынан туындап отыр. Қазіргі таңда біздің қоғамда «қазақстандық отансүйгіштік» ұғымына зор мән берілуде. Осыған байланысты облыстағы мәдениет мекемелерінде Қазақстан туралы кітаптарды, еліміздің мемлекеттік мерекелерін, мерейтойлық оқиғаларды насихаттауға көп көңіл бөлінеді. Тарихи өлкетану бойынша танымдық және ақпараттық іс-шаралар өткізу, театралдық қойылымдар, тақырыптық кештер мен дәрістер, сабақтар, дөңгелек үстелдер, көрмелер, байқаулар, концерттік бағдарламалар да үздіксіз ұйымдастырылып тұрады. Аталған іс-шараларға колледждер мен жоғары оқу орындарының студенттері, мектеп оқушылары, әскери бөлім сарбаздары, қала жастары белсенді қатысады, — деген басқарма басшысы өткен жылы атқарылған жұмыстарды жіпке тізіп берді. Сонымен қатар, ол жас ұрпапққа әскери-патриоттық тәлім-тәрбие беруге бағытталған шаралар осы жылы да жүзеге асып жатқанын мәлімдеді. Айтуынша, биыл қаңтар айында Әскери Даңқ музейінде 55/12 әскери бөлім сарбаздарының қатысуымен Ұлттық ұлан күніне орай «Туған жерді қорғау қасиетті борыш» атты ерлік сабағы, Кеңес Одағының батыры Махмет Қайырбаевтың 100 жылдығына орай «Өшпес ерлік ұрпаққа мұра» атты тақырыптық кеш ұйымдастырылған. Сондай-ақ, Жеңістің 80 жылдығына орай және Кеңес Одағының батырлары Б.Момышұлының 115 жылдығы, М.Ғабдуллиннің 110 жылдығы, сондай-ақ Ә.Молдағұлова, М.Қайырбаев, И.Кривенко, В.Христенконың 100 жылдық мерейтойларына арналған іс-шаралар жоспары жасалғанын жеткізді. Сол бойынша Ж.Аймауытов атындағы қазақ музыка-драма театры мен А.П.Чехов атындағы театрда түрлі жанрдағы, соның ішінде әскери – патриоттық тақырыптағы қойылымдар сахналанатын болады. Сәуір-мамыр айында Жеңістің 80 жылдығына арналған «Мәңгілік естелік» гала концерті көрермен назарына ұсынылмақ.
Басқарма басшысы сөз соңында өңірдегі барлық мәдениет мекемелерінде патриоттық тақы-рыптағы іс-шаралар үнемі көрініс табатынын тілге тиек етті.
Отанды сүю — ортақ мақсат
Жиында павлодарлық оқушы-лардың патриоттық сезімдерін қалып-тастыруға бағытталған іс-шаралар барысы да талқыланды. Бұл жөнінде баяндаған облыстық білім беру басқармасының басшысы Самал Айтқазина өңірімізде әскери-патриоттық тәрбие бойынша арнайы жоба әзірленгенін атап өтті. Сол бойынша балалар үшін Ұлы Отан соғысының қатысушыларымен, Қазақстан Қарулы Күштерінің жауынгерлерімен кездесулер ұйымдастырылуда. Қуантарлығы, білім беру мекемелерінде әскери-патриоттық бағыттағы бұқаралық іс-шаралар саны жылдан-жылға артып келеді. Сонымен қатар, әскери-қолданбалы спорт түрлері бойынша облыстық жарыстар өткізу дәстүрге айналған. Мәселен, оқушылар арасында «Жас ұлан», «Сарбаз», дарынды балаларға арналған облыстық мектептер арасында «Алау», колледж студенттері үшін «Қыран», «Айбын» және басқа да байқаулар ұйымдастырылуда.
— Жыл сайын мамыр айында білім беру басқармасы Ұлы Отан соғысы батырларына арнап облыстық сап және ән байқауын өткізеді. Биыл болатын барлық әскери-патриоттық іс-шара Жеңістің 80 жылдығына және батыр жерлесіміз Махмет Қайырбаевтың 100 жылдығына арналмақ. Облыс бойынша әскери-патриоттық шараларға барлығы 24,8 мыңнан астам оқушы қатыспақ, — деді Самал Оспанқызы.
Басқарма басшысының сөзіне қарағанда жоғарыда аталған іс-шараларды өткізуге соңғы
5 жылда 18 миллион теңгеден астам қаражат қарастырылған.
Атап өтерлігі, бүгінде облысқа қарасты білім беру ұйымдарында 5 238 оқушы қатысатын
272 әскери-патриоттық клуб жұмыс істеуде. Олардың ортақ мақсаты – Отанын сүйетін, рухы мықты ұл-қыз тәрбиелеп шығару.
Қоғамдық кеңесте облыстық қорғаныс істері департаментінің ардагерлермен жұмыс жөніндегі қызметінің бастығы Тимур Жағыпаров та сөз алып, оқушылар мен жастарға әскери-патриоттық тәрбие берудің маңыздылығына тоқталды. Ол сондай-ақ, мекеме бірқатар облыстық басқармалармен бірлесіп, осы бағытта қоян-қолтық жұмыс жүргізіп жатқанын жеткізді.
Шара соңында қоғамдық кеңес қатысушылары бүгінгідей аумалы-төкпелі заманда жас ұрпақтың тәрбиесіне баса мән беріп, патриоттық бағыттағы жұмыстарды бұдан да ширата түсу керектігі жайлы ой-пікірлерімен бөлісті.
Нұржайна ШОДЫР.