Облыс орталығындағы Мамандандырылған халыққа қызмет көрсету орталығында күніне 50-60 мопед тіркеуден өткізілуде. Қос дөңгелекті көліктің маусымы ашылғалы бері ХҚКО-ға ағылып жатқан халықтың қарасы қалың. Мопед тізгіндегісі келетін тұрғындар 5 сәуірге дейін мемлекеттік нөмір алуға міндетті.
Осы аптаның сенбісінен кеш қалғандар әкімшілік жазаға тартылады. Апта басында Мамандандырылған халыққа қызмет көрсету орталығына барып, мопедті тіркеу барысын өз көзімізбен көріп қайтқан болатынбыз. Қос дөңгелекті көлікке мемлекеттік нөмір алуға келген жүргізушілердің санында шек болмады. Ұзын-сонар кезекте тұрып, алғаш рет қолына құжат алған Павлодар қаласының тұрғыны Мейрам Мұхаметжанмен тілдестік. 21 жастағы жас жігіт тиісті құжатты қолына тигізу үшін 4 сағат жұмсағанын жасырмады.
— Мопедті өткен жылы сатып алған болатынмын. Өзім тамақты жеткізу қызметімен айналысатындықтан бұл көліктің көмегі зор. Биыл заңға өзгертулер енгізілгеннен кейін екі аяқты көлігіме мемлекеттік нөмір алуға келдім. Жұмысым 4 сағаттың ішінде бітті. Тіркеу барысы көп уақыт алмайды. Мопед маусымы басталғандықтан, ХҚКО-ға келген халық саны көп. Сондықтан менің 4 сағат күтуіме тура келді. Мамандардың көмегімен көлігімді тіркедім. Жуырда автомектепте А1 категориясын меңгеру үшін арнайы білім алған болатынмын. Мамыр айында емтихан тапсырамын, — дейді қала тұрғыны.
Мамандандырылған халыққа қызмет көрсету орталығының мемлекеттік автоинспекторы Фархат Нұралин жыл басынан бері облыс бойынша 603 адам мопед тіркегенін айтады. Күніне ХҚКО-да 50-ден астам мопедке мемлекеттік нөмір беріледі екен.
— Мопед тіркеуге келетін адамдардың саны күннен-күнге көбейіп келеді. Жалпы, жаңа ереже биыл қаңтар айында енгізілген болатын. Бірақ тұрғындардың басым көпшілігі тіркеу уақыты аяқталатын кезде іске кірісуді қолға алған. Сондықтан кезек саны көп болып отыр. 5 сәуірден кейін мемлекеттік нөмірі жоқ мопед иелері әкімшілік жауапкершілікке тартылатын болады. Оларға ҚР Әкімшілік құқықбұзушылық Кодексінің 590-бабының 2-тармағы бойынша 10 айлық есептік көрсеткіш көлемінде айыппұл салынады, — дейді Ф.Нұралин.
Фархат Жанатұлы мопедті тіркеу үшін жүргізуші жеке куәлік пен көліктің техникалық құжатын әкелуі тиіс екенін айтады. ХҚКО-да мемлекеттік баж салығы төленіп, мопед жағдайы тексерілгеннен кейін мемлекеттік нөмір беріледі.
Мопед жүргізушісінде А1 категориясы міндетті түрде болуы тиіс. Автомектепте оқу мерзімі 2 ай уақытты алады. Одан кейін теория мен жүргізу емтиханы тапсырылады. Мопедті тіркегісі келетін адамдардың жасы 18 жастан кем болмауы тиіс.
Естеріңізге сала кетейік, мұндай жаңашылдық мопедшілердің қатысуымен тіркелетін апат саны артқаннан кейін енгізілген болатын. Өткен жылы мопедтердің қатысуымен орын алған жол апатының саны 1724-ке жеткен. Өкінішке қарай, қаза болғандардың саны екі есе көбейген. Мопед мінгендер 10 мыңға жуық құқық бұзушылыққа жол берген.
Жағаұстатарлық статистикадан кейін заңның жаңа талабына сәйкес, мопед жүргізушілері жол қозғалысының толыққанды қатысушыларына теңестірілді.
— Күн жылынды, енді мопед мініп, көшеге шығатындар көбейеді. Жолдағы кептеліс, келеңсіз жағдайлар көбіне осы көлік тізгіндегендердің қатысуымен болып жатыр. Енді олар да басқа автокөліктер сияқты бірдей тәртіпке бағынуы керек, азаматтар жауапкершілікті сезінуі тиіс, — дейді Ф.Нұралин.
Айдана ҚУАНЫШЕВА.