Облыс әкімі Асайын Байхановтың төрағалығымен өткен инвестициялық штабтың кезекті отырысында бірқатар жаңа және іске асырылып жатқан жобалар қаралды.
Екібастұз қаласында 2026 жылдың желтоқсан айында іске қосу жоспарланған ұсталық-бандаж кешенінің құрылыс барысы талқыланды. Цех ғимаратындағы құрылыс жұмыстарының 85 пайызы, әкімшілік-тұрмыстық кешеннің құрылысы 60 пайызға дайын. Құрылыс жұмыстары жалғасуда. Кедендік тұрғыдан рәсімделіп, алаңға 5 бірлік арнайы жабдық жеткізілді.
Облыс басшысы Асайын Байханов жобаны тұрақты бақылауда ұстауды тапсырды.
— Бұл жоба республиканың инвестициялық жобаларының Жалпыұлттық пулына енгізілген. Біздің міндетіміз — оны табысты іске асыру үшін барлық тапсырмаларды жедел шешу, — деді облыс әкімі.
Жаңа жобалар да ұсынылды. Олардың бірі — батареялық сортты жоғары таза марганец өндірісі. Бұған дейін инвестор Степногорск қаласында қуаттылығы жылына 22.500 тонна болатын осындай өндірісті іске қосқан. Қазіргі уақытта оның барлық қажетті технологиялары бар, тәжірибе де жинақталған.
Бүгінгі таңда «Таза Металл Технолоджис» ЖШС Ақсу қаласының өнеркәсіптік аймағында құны 80 млрд теңге болатын жаңа өндіріс салуға дайын. Бұл өндіріс 650 жұмыс орнын ашуға мүмкіндік береді.
Облыс әкімі жер қойнауын пайдалану басқармасына экология департаментімен бірлесіп, жобаның экологиялық жағын пысықтауды және осы жобаны бақылауға алуды тапсырды.
Сондай-ақ, отырыста «Гофротара» ЖШС-нің құны 8 млрд теңге болатын қағаз және картон өндірісінің жаңа жобасы талқыланды. Мұнда жаңа 120 жұмыс орны ашылады. Өңір басшысы кәсіпкерлік және инновациялық-индустриялық даму басқармасына жобаны «Павлодар» АЭА қатысушысы ретінде енгізу мәселесін қарастыруды тапсырды.
«Дәнекер» шаруа қожалығы Аққулы ауданында қуаттылығы 35 000 тонна жоңышқаны кептіру және престеу бойынша жаңа зауыт құрылысының жобасын ұсынды. Жобаның құны — 5,5 млрд теңге. Шаруашылық 2024-2025 жылдары 1 645 га суармалы алқап, 2026-2027 жылдары 295 га суармалы жерді іске қосуды жоспарлап отыр.
Облыс әкімі инвесторлардың барлық ұсыныстарын егжей-тегжейлі зерделеуді, жан-жақты қолдау көрсетуді және бюджетке түсетін салық аударымдарын ұлғайтуға, сондай-ақ, өңірде жаңа жұмыс орындарын ашуға мүмкіндік беретін жобалардың іске асырылуын бақылауға алуды тапсырды.
Облыс әкімінің баспасөз қызметі.