Торайғыров университетінде «Таза Қазақстан» экологиялық акциясы аясында «Баянауыл» мемлекеттік ұлттық табиғи паркінің 40 жылдығына орай студенттермен кездесу өтті.
Шара барысында ұлттық қорық қызметкерлері жас экологтарға қараағаш тұқымдарын егу мен күту жолдарын көрсетіп, парк аумағында қоршаған ортаны қорғау жоспары қалай іске асырылып жатқанын баяндап берді.
Кездесуде негізінен қоршаған ортаны қорғау, экология бұзылмауы үшін адамзаттың әрекеті, табиғатты сақтауда жастардың көзқарасы секілді мәселелер ортаға салынды. Табиғат тақырыбын тереңнен қозғаған «Баянауыл» мемлекеттік ұлттық табиғи паркі бас директорының ғылым және туризм бойынша орынбасары Азамат Ақаев аталмыш шараның мақсаты — азаматтардың экологиялық мәдениетін орнықтыру, жалпыадамзаттық құндылықтарды қолдау және табиғатты қорғаудың жаңа идеологиясын қалыптастыру екенін атап, бүгінгі күні экологиялық ахуалды жақсарту бағытында кешенді іс-шаралар жоспары жүзеге асып жатқанын жеткізді.
— Қазіргі таңда ел Президентінің тапсырмасы аясында экология мен қоршаған ортаны жақсарту, қоғамда эко-мәдениетті қалып-тастыру бағытында айтарлықтай ауқымды іс-шаралар өткізілуде. Мәселен, «Таза Қазақстан» акциясы аясында ұлттық парк қызметкерлері мектеп оқушыларымен, студенттермен кездесулер ұйымдастырып, тұқым егуден бастап, оны күтіп-бағу, жерсіндіру әдістерімен таныстыруда, — деді А.Ақаев.
Сонымен қатар, кездесу барысында саябақ қызметкерлері уақытша тәлімбаққа қарағай тұқымын себу бойынша жоспарлы жұмыстар жыл сайын жүргізіліп, қазіргі уақытта орман көлемін ұлғайту жұмыстары қолға алынғанын атап өтті. Мәселен, ұлттық парктің ғылыми қызметкері Алтынбек Құрмановтың сөзінше, ұлттық саябақ аумағына егілген «Қызыл кітапқа» енгізілген өсімдіктер қатаң бақылауда.
— Бүгінгі күні ұлттық табиғи паркінде өсімдіктің 552 түрі бар. Оның ішінде медициналық сараптамадан өткен 240-тан астам түрі дәрі-дәрмектерге қолданылады. «Қызыл кітапқа» енгендері де бар. Қазір парк аумағы жабайы жануарлармен толығуда. Сондай-ақ, паркте өте сирек кездесетін жабысқақ қанды қараағаш өседі. Ғалымдардың сөзіне сүйенсек, бұл ағаштың түрі біздің Баянауыл мен Канада елінде ғана кездеседі екен, — деді ол.
Сонымен қатар, кездесуде ұлттық парк қызметкері Сәния Имантаева өсімдіктердің генетикалық әлеуетін сақтау, сирек кездесетін және жойылып бара жатқан өсімдіктердің тұрақты көбеюін қамтамасыз ету тақырыбында дәріс оқып, жас экологтарға қарағай тұқымдарын егу әдістерімен таныстырды. Айта кетейік, «Баянауыл» мемлекеттік ұлттық табиғи паркі 1985 жылы 12 тамызда құрылды. Бұл — еліміздің аумағында құрылған ең алғашқы ұлттық парк. Жалпы ауданы 68452,8 гектарды құрайды. Оның ішінде орманмен жабылғаны 19076 гектарға тең. Басқа ерекше қорғалатын табиғи аумақтарға қарағанда мұнда табиғи ескерткіштер көптеп кездеседі. Парк аумағында 24 археологиялық табиғи ескерткіштер мен әйгілі 4 көл — Торайғыр, Біржанкөл, Сабындыкөл және Жасыбай көлдері орналасқан. Бұдан бөлек, ұлттық паркте
14 туристік бағыт бар.
Алтынбек МҰҚЫШЕВ.
Суреттерді түсірген – Есенжол Исабек.