Баянауыл ауданында көктемгі су тасқынының алдын алу жұмыстары жүйелі түрде жүргізілуде. Жауапты мамандардың айтуынша, әзірге ешқандай қауіп төніп тұрған жоқ.
Жақында аудан әкімі Ардақ Кісентаев өңірдегі Ащысу, Айдос, Бала-Шідерті, Қарасу өзендерінің алқаптарындағы және Қарағанды облысымен шектесетін аумақтардағы су басу қаупі бар жерлерді әуеден барлау арқылы тексеріп шыққанын мәлімдеді.
— Қарағанды облысының басшысы Ермағанбет Бөлекбаевпен бірлесіп, осы өңірдің Баянауылға қауіп төндіретін «Ақжар» және «Қаратоқа» бөгеттеріне тексеру жүргіздік. Егер су деңгейі аяқ астынан көтерілсе және толып кеткен жағдайда жасалатын бірлескен іс-қимыл алгоритмі келісілді. Бастысы, барлық гидротехникалық құрылыс штаттық режимде жұмыс істейтініне көз жеткіздік, — деді аудан басшысы. Сондай-ақ, ол бұл бағыттағы жұмыстар жалғасын тауып, су тасқыны қаупі бар аймақтарға тұрақты түрде мониторинг жүргізіліп тұратынын атап өтті.
Айта кетерлігі, бүгінде аудан аумағындағы қар толығымен еріп кеткен. Қар шығару жұмыстарына қазынадан 11,3 млн теңге бөлінген. Ал су тасқынының алдын алу жұмыстары үшін 10 мың дана қап, 12 900 литр АИ 92 маркалы бензин мен 7 900 литр дизель отынының қоры және 1 315 тонна инертті материалдар дайындалған. Қосымша 2 100 литр АИ-92 және 7 100 литр дизель отынын дайындау үшін жергілікті әкімдік резервінен 2 млн 517 мың теңге қаражат бөлу туралы қаулы бекітілген. Аудан бойынша жалпы жанар-жағармай қоры жеткілікті.
Көктемгі су тасқыны қаупіне қарсы жергілікті атқарушы органдар мен мердігерлер тарапынан 29 техника, оның ішінде 11 тиегіш, 3 автогрейдер, 5 трактор, 3 жүк көлігі, 7 ассенизаторлық машина, 38 мотопомпа және эвакуациялауға 20 автобус белгіленіп, сақадай сай дайын тұр. Бұдан бөлек, су тасқыны болған жағдайда сол елді мекеннің халқын уақытша жайлы орынға көшіріп, орналастыруға арналған 16 эвакуациялық пункті әзірленген. Аталған эвакуациялық пункттердің басым бөлігі білім мекемелері екенін айта кеткен жөн.
Негізі, ауданда таудан аққан және еріген сулардың қозғалысына байланысты өзендердегі су деңгейінің көтерілу қаупі туындауы мүмкін деген болжам бар. Мамандардың айтуынша, күн сайын су тасқынынан болатын қауіп қатаң қадағаланып, тиісті жұмыстар жоспарға сай жүргізілуде.
Нұржайна ШОДЫР.
Баянауыл ауданы.