«Жұмысымды жақсы көргендіктен шаршаған емеспін, үйіме қанаттанып қайтамын». Бұл – аймағымыздағы барлық Халыққа қызмет көрсету орталықтарының жұмысын үйлес-тіруге жауапты Айнагүл Саты-балдықызының сөзі. Жүрекке жылы тиді. Осындай қызметкерлер халықпен жұмыс істейтін орындарға көптеп орналасса, қызмет алушылар тарапынан тек алғыс артып, шағым мүлдем жойылар еді.
Иә, біз мақаламызға арқау еткен қызметкер дәл осы халықтың алғысымен алға басып келе жатқанын жасырмайды.
— 2012 жылы С.Торайғыров атындағы университетті әлеуметтік жұмыс мамандығы бойынша бітірдім. Бірден «Жастар практикасы» бағдарламасы арқылы Ақсу қалалық халыққа қызмет көрсету орталығына орналастым. Алғашында кіреберісте орталыққа келген тұрғындарды қабылдап, бағыт беріп тұрдым. Құжаттарды қабылдайтын, оларды беретін, азаматтарды тіркейтін, өз-өзіне қызмет көрсету секторларында да жұмыс істедім. Ақсуда жаңадан келген қызметкердің барлық секторда еңбек етіп шыққанына мән беретін. Бұл өте жақсы тәжірибе деп білемін, — дейді «Азаматтарға арналған үкімет» мемлекеттік корпорациясының облыстық филиалы фронт-кеңселерді үйлестіру басқармасының жетекшісі Айнагүл Қонышева.
Тәжірибелі маман қызмет жолын 2015 жылы Астана қаласында жалғастырады. Елорданың №1 ХҚКО-да, кейін орталық кеңсесінде қызмет еткен. Мұнда фронт-кеңселерді үйлестіру басқармасында сарапшы болып еңбек еткен. Ал 2019 жылы тұрмыс құрып, Павлодар қаласына ауысқан. Павлодар аудандық ХҚКО бөліміне жетекшілік етті. 2020 жылы білікті қызметкерді аймағымыздағы 15 орталықтың жұмысын қашықтықтан қадағалайтын фронт-кеңселерді үйлестіру басқармасының жетекшісі қызметіне тағайындайды.
— Бұған дейін барлық сатыдан өткендіктен еш қиындық туындаған жоқ. Әрі халыққа қызмет көрсету орталықтарындағы әр сектордың жұмысын жақсы білгендіктен дұрыс-бұрысын бірден аңғарып отырамын. Қажет кезде кеңес беріп, қай секторға күш салу керектігін аудандық-қалалық бөлім басшыларына айтып отырамыз. Бейнекамералар арқылы қай орталықта қандай секторға адам қарасы көбейіп кеткенін, қызмет көрсету уақыты созылғанын көріп отырамыз. Мұндайда оның себебін талдап, бұл олқылықты жоюға күш саламыз. Халыққа қызмет көрсету саласында 13 жыл еңбек етіп келемін. Бір сәт кету туралы ой келмеді. Жұмысымды жақсы көремін. Халыққа қызмет көрсеткен ұнайды. Өз басым алты жыл бойы құжат қабылдайтын маман болдым. Күнде адамдардан алғыс еститінмін. Сол алғыс, жылы сөздер қанаттандырып, үйге көтеріңкі көңіл күймен келемін, — дейді Айнагүл Сатыбалдықызы.
Осы ретте, ол адамдармен жұмыс істегенде ең бастысы мейірім, жылы қабақ таныта білу керек деп санайды. Сонымен бірге, клиентті тани алсаң ғана тиісті көмек көрсете аласың, дейді.
— Халыққа қызмет көрсету орта-лығына ешкім еріккеннен келмейді. Барлығы бір көмек, қызмет алу үшін жүгінеді. Бәрі бірдей сала терминін, құжат атауын білмейді. Сондықтан, алдыңызға келген қарапайым адамға терминмен емес, барынша түсінікті тілмен сөйлесіп, түпкі мәселесін анықтай алған абзал. Мәселен, егде жастағы адамдар нотариус сұратқан құжаттың атауын ұмытып қалатын кездер болады. Мұндайда қарияның қандай шаруамен жүргенін қосымша сұрақтар қою арқылы біліп, келесі қадамның қандай және қай құжатты алуға келгенін анықтауға болады. Ал өзі түсінбей тұрған адамға қызметкер де жылы шырай танытпаса, сабылтып тағы бір бұрыс бағыт берсе, орталықтың қызмет сапасына нұқсан келеді,- дейді А.Қонышева.
Фронт-кеңселерді үйлестіру басқар-масының жетекшісі әр орталықта әрбір қызметке жұмсалатын уақыттың шектеулі екенін де атап өтті. Мұны да қадағалайды.
— Бүгінде басты міндетіме келсем, халыққа қызмет көрсету орталықтарында мемлекеттік қызметтің тиісінше көрсетілуін, яғни, бизнес-процестің дұрыс сақталуын қадағалаймын. Қызмет алушыға жайлы жағдай жасалуын бақылаймыз. Бейне және карта мониторинг жүргізіледі. Клиент талон алып, ол талон нөмірінің таблода шыққаны көрініп, хабарланғаны естіліп тұрғанына дейін қадағалаймыз. Баратын үстелде нөмірінің көрініп тұруы да маңызды. Сонымен қатар, әр қызметке белгіленген уақыттың сақталуы да – назарымызда. Себебі, бізде әрбір қызметті күту және рәсімдеудің өз межесі бар. Ең аз уақыт электронды-цифрлық құжат алуға кетсе, ең көбі, шамамен 40 минут зейнетақы рәсімдегенде жұмсалады. Белгіленген уақыттан асып кетсе, оның себебі талданады, — дейді басқарма жетекшісі.
Кейбір қызмет түрлері маусымдық сипатқа ие көрінеді. Әсіресе, жаз мезгілінде көп қызметке сұраныс артатын көрінеді. Мәселен, жазда төлқұжат рәсімдеу, автомобиль тіркеу, көлік жүргізу куәліктерін алу қызметтері күрт көбейеді. Оқу жылы басталарда мектепке анықтамаларды жаңарту қызметі артады.
— Бірінші мақсатымыз — сапалы қызмет көрсету. Соған басымдық береміз. Сапалы қызмет алған адам шағым айтып шапқыламайды. Әлбетте, шағымдар болады. Шыны керек, көбі жүйеде болатын ақауларға байланысты түседі. Мысалы, Ішкі істер министрлігінің базасында ақау туындаса, демек, мамандандырылған ХҚКО-да құжат қабылдау, көлік тіркеу жұмыстарында іркіліс орын алады. Ол біздің қызметкерлердің кінәсінен емес. Мұны да тұрғындарға тиісінше түсіндіре білу керек, — дейді Айнагүл Сатыбалдықызы.
Бүгінде орталықтарда ең көп көрсетілетін қызметтер үштігіне ЭЦҚ беру, жылжымайтын мүліктерді және көліктерді тіркеу кіреді. Жыл сайын онлайн қызмет түрлері көбейіп, қызмет алушыларға оңтайлы жағдай туып жатқанын да атап өтті. Бұрындары бір анықтама үшін орталыққа бару керек болса, қазіргі таңда ұялы телефоны арқылы да алу мүмкіндігі туған. Мұндай жаңашылдықтарға жұмысын ерекше жақсы көретін жан балаша қуанатынын айтты. Ол адамгершілік таныту үшін кейбір шектеулерді бұзған кездері болғанын да жасырмады. Елордада еңбек етіп жүргенде сегізінші сәбиін дүниеге әкелген ананы құжаттарын көшірме жасатуға арлы-берлі сабылтпау үшін басшылықтың тыйымына қарамастан өзі реттей салған екен. Тіпті, әлгі ана өтініш толтырғанша, сәбиін қолына алып, уатып та берген. Осындай сәттерде сәбилі ананың, жас пен кәрінің білдірген алғысына бөленуді біздің кейіпкеріміз бақыт санайды.
Гүлжайна ТҮГЕЛБАЙ.