Ақсу қаласында ең ұйымшыл тұрғындары бар, таза әрі абаттандырылған көпқабатты тұрғын үйді анықтау мақсатында арнайы байқау ұйымдастырылды. Сайыс наурыз айында өткендіктен, баспананың, подъездің ұлттық нақышта безендірілуі де ескерілді.
Атап өтерлігі, 50 мыңнан астам тұрғыны бар Ақсу қаласының азаматтары қатарынан аталмыш байқауда бақ сынауға тек 6 подъезд тұрғындары ниет білдірді. Арнайы құрылған комиссия бұл қатысушыларды түрлі бағытта бағалады. Айталық, подъездің, лифт ішінің, тұтас ауланың тазалығы, кіреберістің көріктендірілуі, Наурыз нақыштарының болуы, спорттық және концерттік шаралардың ұйымдастырылуы, бірлесіп ұлттық тағам әзірлеуі ескерілді.
Бұл ретте Хиуаз Доспанова көшесі, 30-үй мекенжайының тұрғындары ерекшеленді. Олар бір кісідей жұмылып, жауапкершілік танытып, байқау талаптарының барлығын орындады. Жеті қазынаны көрсетуінің өзі айрықша көзге түсті. Аталмыш үйдің тұрғындары бірлесіп, көшеттер отырғызады, подъездерді жөндейді, бос уақытты да бірге өткізеді. Сондықтан бұл үй үздік атанды.
Екінші орын жарты ғасырдан астам уақыт бұрын салынса да, тұрғындардың күтіп-ұстауы нәтижесінде жақсы қалыпта тұрған Астана көшесі, 29-үйінің тұрғындарына бұйырды. Үшінші орын жалғыз өзі Қамзин көшесі, 5 мекенжайындағы баспанасын әрлеп, әдемілеп, мерекелік дастархан дайындаған Айбота есімді тұрғынға берілді. Жүлдегер-лерге ақшалай сыйлық табысталды.
Өз тілшіміз.