Биыл Майқоңыр ауылында көптен күткен ауқымды іс қолға алынады. Елді мекенде талай жыл күрделі жөндеу жұмысын көрмеген білім ошағы жаңа кейіпке енеді. Мұндай жаңалықты естіген жергілікті тұрғындар игі істің басталуын асыға күтуде.
2025 жылы Ертіс ауданында қолға алынатын жоба көп. Соның бірі – «Ауыл – ел бесігі» бағдарламасы аясында Майқоңыр орта мектебіне күрделі жөндеу жүргізу.
Ауыл әкімі Асылбек Құсайынов білім ордасы 1981 жылы ашылғанын айтады. Тек былтыр мектепке ағымдағы жөндеу жұмыстары жүргізілген. Бұл ретте 3 қабатты мектептің электр желілері, жылыту жүйесі толығымен ауыстырылған. Сонымен қатар, төбе жабындысы ретке келтірілген.
— Биыл мемлекеттік бағдарлама аясында ата-аналар мен ұстаздар, оқушылар қауымы үшін қуанышты жағдай орын алмақ. Ескі мектеп толығымен күрделі жөндеуден өткізіледі. Білім ошағындағы терезелер, есіктер ауыстырылып, еден де жаңартылады. Нысанның қасбеті жөнделеді. Әр кабинеттің қабырғасы ретке келтіріледі.
Мектепте 1-11-сынып аралы-ғында 53 бала оқиды. Даярлық топта 5 бала білім алады. Шағын орталықта 15 бала тәрбиеленуде. Балабақшаға бармайтын балаларды қосқанда ауылда мектеп жасына дейінгі 26 бала бар. Яғни, мектептің болашағы бар. Маусым айында оқушылардың емтиханы аяқталғаннан кейін ауқымды іс қолға алынады деп жоспарлануда, — дейді А.Құсайынов.
Бүгінде Майқоңыр ауылында 280 адам тұрады. Елді мекенде шекара заставасы бар. Мектеп пен шекара қызметінде жұмыс істейтін жастардың саны көп.
Асылбек Құсайынов «Ауыл – ел бесігі» бағдарламасы аясында елді мекендегі 3 көшеге асфальт төселетінін де айтты. Қазіргі уақытта мердігер «Нұрал» ЖШС-мен келісімшарт жүргізілуде. Бұдан бөлек, жергілікті бюджеттен 6 млн теңге бөлініп, бұл қаражатқа спорт алаңы тұрғызылады. Өткен жылы ауылда балалар ойын алаңы салынған.
Жоғарыда атап өткеніміздей, биыл Ертіс ауданында бірқатар инвестициялық жоба іске асырылады. Оның ішінде бірқатар ауылда жол жөнделеді. Бұл ретте Сілеті-Қызылағаш бағытындағы жолдың 0-22 шақырымы асфальт-талады. Бұдан бөлек, Ынтымақ, Үлгілі, Ленин, Қараағаш, Сілеті, Амангелді ауылдарына кіреберіс жол жөнделеді.
Биыл Майқоңыр ауылынан бөлек, Панфилов ауылындағы орта мектеп те күрделі жөндеуден өткізілмек. Ертіс ауылында бассейн салынып, Қызылағаш ауылында мәдени-сауық орталығы бой көтереді деп күтілуде.
Айдана ҚУАНЫШЕВА, Ертіс ауданы.