Баянауыл ауданында жол жөндеу жұмыстары үздіксіз жалғасуда. Қазіргі таңда тұрғындардың сұранысы бойынша Майкөбе ауылына кіреберіс жол қалпына келтірілуде.
Аудан әкімі Ардақ Кісентав бұл бағыттағы жұмыстарды үнемі өз бақылауында ұстап отырғанын айтады.
— Жұмыс барысын қадағалау үшін ауылға арнайы бардым. Сондай-ақ, тұрғындармен де жүздестім. Бүгінде жол төсемінің бірінші қабаты бітіп, екінші қабатының жабындысы төселуде. Жалпы, асфальт жамылғысының қалыңдығы 10 см болады. Осындай жол жөндеу жұмыстары, абаттандыру шаралары жүргізіліп жатқан сәтте тұрғындардың пікірлеріне де құлақ түреміз. Мәселен, ауыл халқы Майкөбе көмір кенішіне жүк көліктерінің жүруіне тосқауыл қою бойынша өтініш білдірді. Бұл мәселе заң бойынша шешілетін болады. Нақты айтқанда, арнайы арка қойылып, жүк көліктеріне шектеу қойылады, — деп атап өтті аудан басшысы. Оның айтуынша, қатты отын тасымалдайтын жүк көліктері үшін Майкөбе кенішімен технологиялық жол салуға келісім жасалып, жоспары да әзірленіп қойған екен.
Н.ШОДЫР.