Ертісте Иса ақынға арналған халықаралық айтыс өтеді
Биыл халық ақыны, әнші, әртіс, домбырашы, композитор Иса Байзақовтың туғанына — 125 жыл. Өшпес өнерімен ел аузында аңыз болған суырып салма ақынның мерейтойы қарсаңында облыста «Ертіс аясында» атты халықаралық деңгейде айтыс өткізіледі деп күтілуде.
Заңғар жазушы Мұхтар Әуезов: «Иса — желпініп соққан сары даланың желі сияқты, сол даладай кең, мол ақындықтың иесі» деп талантына бас иген екен.
Облыстық мәдениет, тілдерді дамыту және архив ісі басқармасының басшысы Медет Тауасқанның айтуынша, халықаралық деңгейде ұйымдастырылатын сөз сайысына 14 ақын қатыспақ. Айтысты суырып салма ақын, айтыскер Аманжол Әлтаев жүргізеді.
— Иса Байзақовтың 125 жылдығына орай ұйымдастырылатын халықаралық айтысқа айтыс өнерінің ұйымдастырушысы Жүрсін Ерман құрметті қонақ ретінде шақырылады. Бұдан бөлек, «Тыңдасаң естіледі бір терең сыр…» атты аймақтық әдеби байқау, аламан бәйге және қазақ күресін өткізу жоспарланған, — дейді М.Тауасқан.
Атап өтерлігі, ақынның туған жері – Ертіс ауданында дауылпаз жыршының туған күні ерекше форматта аталып өтуде. Иса Байзақовтың мерейтойын тойлауда мәдени және спорттық шаралардың жоспары әзірленген. Бұл ретте 50-ден астам іс-шара өткізіледі. Жыл басынан бері мәдениет мекемелерінде «Ел таныған Иса» жобасы іске асырылуда. Бұл ретте «Иса еліне саяхат», «Аудандық мекемелер Исаны оқиды» челленджі, «Исаның мұрасы» атты смартфондағы QR-кітапхана, «Дүлдүл ақын» тақырыбында кітап көрмелері, ауылдарда «Өлең-жырдың желмаясы» атты әдеби кештер, аудандық ақындар мүшәйрасы, оқушылар арасында «Поэтикалық сөздің сиқыры» атты оқулар ұйымдастырылуда.
Ертіс аудандық мәдениет, дене шынықтыру және спорт бөлімінің басшысы Гүлдана Сәрсембенованың айтуынша, ақынның мерейтойы қаңтар айынан бастап аталып өтуде. Мәселен, Сілеті ауылында «Жырлаймын сені, Иса ақын!», Қоскөл ауылында «Өнерге айналған өмірі» тақырыптарында дөңгелек үстел өткізілген. Ақпан айында Қызылағаш ауылында «Дауылды жырдың дүлдүлі — Иса ақын» ақпараттық сағат ұйымдастырылып, Панфилов кітапханасында «Иса атамыздың өмірі мен шығармашылығы» тақырыбында өлкетану портрет кеші ұйымдастырылған. Ынтымақ ауылдық клубында «Жырларында найзағай жарқылы бар» тақырыбында дөңгелек үстел өткізілді.
— Наурыз айында ақын мерейтойына арналған іс-шаралар өз деңгейінде өткізілді. Сәуір-шілде айлары аралығында да ауылдарда әдеби кештер өткізу жоспарлануда. Иса Байзақовтың 125 жылдық мерейтойына арналған негізгі іс-шараларды өткізу биылғы тамыз айына жоспарланған. Екі күн қатарынан этноауыл ұйымдастырылып, оған ауданның 30-дан астам ауылы қатысатын болады. Этно-ауылдарда сахна құрылып, киіз үйлер алаңында көрме, спорттық жарыстар ұйымдастырылады. Балалар алаңы құрылады. Аудан орталығындағы Иса Байзақов ескерткішіне гүл шоқтары қойылып, республикалық ақындар айтысы өткізіледі. «Иса Байзақов және қазақ театр өнері» көрмесі, қолөнершілер жәрмеңкесі, «ХХ ғасырдың шекарасындағы қазақ мәдениеті» республикалық ғылыми-практикалық конференциясы өткізіліп, оның қорытындысы бойынша шығармалар жинағының тұсаукесері де жоспар-ланған. Республикалық поэма конкурсы да өткізіледі деп күтілуде. Бұдан бөлек, Ертіс ауданының делегациясы Алматы қаласында орналасқан Иса Байзақовтың зиратына барып, құран бағыштауды жоспарлап отыр. Осы бағытта дайындық жұмыстары жүргізілуде, — дейді Г.Сәрсембенова.
Осылайша, аймақ жұртшы-лығы қазақ әдебиетіне сүбелі үлес қосқан Иса ақынды жан-жақты ұлықтайтын болады.
Айдана ҚУАНЫШЕВА.