Өңірде оқуда озат оқушыларды қолдап, дарынды балалардың білімін шыңдай түсу үшін оларды мамандандырылған мектептерде оқыту үрдісі қалыптасқан. Бірақ мұндай білім ордаларына түсу оңай емес. Ол үшін арнайы сыннан сүрінбей өтуі тиіс.
Бұл ретте үміткерлерге нақты қандай талаптар қойылатыны және құжаттардың қай уақытқа дейін қабылданатыны жайлы облыстық білім беру басқармасының мектепке дейінгі және жалпы орта білім беру бөлімінің басшысы Нұргүл Азанбаева айтып берді.
Павлодар облысында дарынды балаларға арналған 14 мамандандырылған мектеп бар. Атап айтқанда, 10 мектеп Павлодар қаласында, үшеуі Екібастұзда және тағы біреуі Ақсу қаласында оқушыларға білім береді. Бұл мектептерде оқу үшін алдымен өтініш беріп, құжаттарды тапсырып, тестілеуден өту керек. Ақпан айында басталған өтініш қабылдау жұмыстары 15 сәуірге дейін жалғасады. Құжаттарды «Дарын» республикалық ғылыми-тәжірибелік орталығының qabyldau.daryn.kz порталы арқылы жолдауға болады. Сонымен қатар, үміткерлер тарапынан сауалдар туындап жатса, сайтта білім ордаларының байланыс нөмірлері көрсетілген. Сол арқылы хабарласып, қосымша сұрақтар қоюға мүмкіндік бар. Кейін 15 мамыр мен 15 маусым аралығында әр сенбі және жексенбі күндері оффлайн режимде қабылдау емтихандары өтеді. Соңғы үш-төрт жыл дересінде іріктеу, қабылдау жұмыстарын «Дарын» орталығы жүргізіп келеді.
– Ауыл және қала оқушыларына қойылатын талап-тардың айтарлықтай айырмашылығы жоқ. Дегенмен, бірқатар жеңілдіктер қарас-тырылған. Айталық, «Мың бала» ауыл мектептері оқушыларының ұлттық зияткерлік олимпиада жеңімпаздары 7-сыныпқа кезектен және байқаудан тыс қабылданады. Олардың саны білім алушылардың жалпы санының 10 пайызын құрауы керек. Сонымен қатар, әлеуметтік тұрғыдан осал топ өкілдеріне 5, 6, 7, 8 және 10-сыныптарға қабылданатын кезде білім алушылардың жалпы санының 15 пайызы көлемінде квоталар бекітілген, – дейді ол.
Білім беру ұйымдарының сайтындағы деректерге сүйенсек, дарынды балаларға арналған №3 гимназия 5-сынып-тарға 50 оқушыны, «Жас дарын» мамандандырылған мектеп-лицейі 5-сыныпқа 72 баланы қабылдауға дайын. Екібастұз қаласындағы мемлекеттік тілде оқытатын дарынды балаларға арналған «Зерде» мамандандырылған жалпы білім беру мектебі мен дарынды балаларға арналған Абай атындағы мамандандырылған гимназияның әрқайсысында 5-сыныптарға 50 орын бар. Дарынды балаларға арналған № 8 лицей-мектебі 5-сыныптарға 100 баланы, Ы.Алтынсарин атындағы дарынды балаларға арналған облыстық қазақ гимназия-интернаты 5-сыныптарға 48 оқушыны іріктеп алмақ. Абай атындағы мамандандырылған гимназия 7-сыныптарға 22 баланы, дарынды балаларға арналған облыстық көпсалалы лицей-интернатына 7-сыныптарға 68 шәкіртті қабылдауға әзір. Екібастұз қаласының дарынды балаларға арналған мамандандырылған №1 лицей-мектебінің 5-сыныптарында 50 оқушы, Ақсу қаласының Қ.Сәтбаев атындағы дарынды балаларға арналған мамандандырылған гимназиясының 5-сыныптарында 48 бала оқи алады. Қабанбай батыр атындағы «Жас сарбаз» облыстық мамандандырылған лицей-мектеп-интернатына 7-сыныптарға 36 бос орын бар. Сондай-ақ, дарынды қыздар мен ұлдарға арналған «Білім-Инновация» лицей-мектеп-интернатына, облыстық көпсалалы көптілді мектеп-интернатына құжаттарды қабылдау 1 ақпан мен 12 сәуір аралығында аудан орталықтарында жүргізіледі.
Айта кетейік, жыл сайын дарынды балаларға арналған мектепте оқуға ниетті балалардың саны көбейіп келе жатқаны бай-
қалады. Тереңдетілген білім бағдарламасы бойынша оқытылатын ордада ұстаздар қауымы да үнемі біліктілігін жетілдіріп отырады. Ол үшін мамандандырылған мектепке түсуге берілетін бір ғана мүмкіндікті қалт жіберіп алмау керек.
Салтанат ҒАББАС.