М.Катаев атындағы оқушылар сарайында облыстағы белгілі де беделді оқу орындарының бірі – Б.Ахметов атындағы жоғары педагогикалық колледжінің 95 жылдық мерейтойы салтанатты түрде аталып өтті. Игі шараға білім ордасының ардагерлері, түлектері, павлодарлық ұстаздар мен өңірдегі өзге де мекеме басшылары шақырылды.
Мерекелік шараның шымылдығы ғасырға жуық тарихы бар колледждің өткені мен бүгінінен сыр шертетін бейнекөрсетіліммен ашылып, лазерлік шоу көрсетілді. Бұдан соң облыс әкімінің орынбасары Айгүл Мәлікова сөз алып, педагогикалық ұжымды білім ордасының мерейтойымен құттықтады.
— Бұл оқу орны педагог мамандарды даярлауға, техникалық және кәсіптік орта білім беруден кейінгі білім беру саласындағы мемлекеттік саясатты іске асыруға елеулі үлес қосып келеді. Колледж қабырғасында шығармашылық еңбек етіп, толағай табыстарға ие болған ұстаздар жетерлік.
Колледж түлектері, ерен ерліктерімен ерекшеленген батыр тұлғалар — Құдайберген Сұрағанов, Серікбай Мүткенов, Владимир Киян, Қабдеш Нұркиннің өмір жолдары бізге үлгі-өнеге. Белгілі ақын түлектер — Мұзафар Әлімбаев, Қабдыкәрім Ыдырысов, Аманжол Шамкенов, Қажымұрат Смағұлов, ғалымдар — Ғинаят Бекжанов, Қабдырахман Дүйсембин, Амангелді Құсайынов, Қадыршат Шүлембаевты да әрдайым мақтан тұтамыз. Бүгінде ұрпақтар сабақтастығы әлі де жалғасуда. Облысымыздағы қай білім ордасына барсаңыз да алдыңыздан Б.Ахметов атындағы жоғары педагогикалық колледж түлегі шығары сөзсіз. Колледж осындай білікті кадрларды даярлай отырып, кәсіби білім берудің жаңа ұлттық моделін қалыптастыруға айтарлықтай үлес қосуда.
Мерейтойларыңыз құтты болсын! Ұжымның ізгілікті істеріне жетістік, шығармашылық өрлеу тілеймін, — деді Айгүл Қайыртасқызы.
Айтулы шараға арнайы келген облыстық мәслихат төрағасы Илья Теренченко да жүрекжарды тілегін білдіріп, педагогикалық колледждің білікті мамандар даярлауға қосқан үлесі зор екенін атап өтті. Облыстық білім және ғылым қызметкерлері кәсіподақ ұйымының төрағасы Гүлбарам Науразбаева да педагогикалық ұжымды мерейтойымен құттықтап, кәсіподақ атынан 500 мың теңгенің сертификатын сыйға тартты. Түлектер атынан сөз алған облыстың Құрметті азаматы Махмет Демесінов:
— Осы колледжді аяқтағаныма 73 жыл өтіпті. Оқу орны сол кездегі мақсатынан жаңылмай, жылдан-жылға дамып келеді. Жыл сайын көптеген білікті маман тәрбиеленіп шығуда. Олардың арасында батыр да, ақын да, ғалым да бар. Біз солармен мақтанамыз. Бүгінде бұл қасиетті қара шаңырақ жастарға білім берумен қатар, рухани тәлім-тәрбие ордасына айналып отырғаны қуантады. Колледж ұжымын мерейтойымен құттықтап, зор табыс тілеймін, — деді.
Кешке келген өзге де қонақтар байырғы білім шаңырағының шаттығына ортақтасып, жылы лебіздерін жеткізді.
Мерейтой барысында колледждің дамуына сүбелі үлес қосқан бір топ ұлағатты ұстазға сый-құрмет көрсетілді. Атап айтар болсақ, Салтанат Қабышева «Облыс алдында сіңірген еңбегі үшін» төсбелгісімен наградталды. Білікті ұстаздар — Гүлмира Ахметова және Ольга Вычка облыс әкімінің Құрмет грамотасымен, Айгүл Оразалина мен Елена Побережникова облыс әкімінің Алғыс хатымен марапатталды. Сондай-ақ, Сәулет Жанғазинова мен Ульяна Комлеваға облыстық мәслихаттың Құрмет грамотасы, ал Әсем Соғымбаева мен Айжан Есмағамбетоваға облыстық мәслихаттың Алғыс хаты табыс етілді. Бірқатар педагог облыстық білім беру басқармасы мен облыстық білім және ғылым қызметкерлері кәсіподақ ұйымының марапаттарына ие болды. Саналы ғұмырын білім беру саласына арнаған ардагер ұстаздар да назардан тыс қалған жоқ. Оларға педагогикалық колледж ұжымының атынан гүл шоқтары мен естелік сыйлықтар тарту етілді.
Салтанатты шараға қатысқан қонақтарға М.Катаев атындағы оқушылар сарайының «Этно микс» ансамблі, «Блэйз» эстрадалық би студиясы, «Арман-шоу» үлгілі ән театры, «Тұмар» вокалдық студиясы және өзге де талантты ұл-қыздар өз өнерлерін көрсетті.
Бұл күні, сондай-ақ, жоғары педагогикалық колледжге есімі берілген дара тұлға Бейсен Ахметовтің ескерткішіне гүл шоқтарын қою рәсімі өтті. Оқу ордасының «Музыкалық тәрбие әдістемесі» кабинетіне Ертіс-Баян өңіріне танымал педагогикалық еңбек ардагері, ҚР Мәдениет қайраткері, сазгер Қайырбек Сәтиевтің есімі берілді. Бұдан бөлек, колледж ұстаздары әзірлеген жаңа оқу құралдарының тұсауы кесіліп, заманауи «SKILLSBOOST CENTER» кабинеті ашылды.
Нұржайна ШОДЫР.
Суреттерді түсірген – Есенжол Исабек.