Облыс орталығындағы мектеп оқушыларының жазғы демалысын көңілді өткізуге бағытталған дайындық жұмыстары қызу жүруде. Қалалық білім беру бөлімінің ақпараты бойынша 49 мың шәкірт жазғы лагерьмен және еңбекпен қамтылмақ.
«Балаларға жарқын жаз — 2025» науқаны аясында шаһардағы 33 мектепте лагерь ашылады деп жоспарлануда. Ал күрделі жөндеу жұмыстары жүріп жатқан білім беру мекемелерінің 5 мыңнан астам оқушысы мектептен тыс, яғни сыртқы мекемелерде демалыспен қамтылмақ. Сондай-ақ, әлеуметтік қолдауды қажет ететін балаларға ерекше назар аударылады. Жергілікті бюджет қаражаты есебінен жетім, ата-анасының қамқорлығынсыз қалған балалар 100% және әлеуметтік қорғалмаған отбасылардан шыққан оқушы-ларға 50% жеңілдікпен жолдамалар беріледі. Қала бойынша осындай 2 992 бала бар.
Айта кетерлігі, жазғы сауықтыру науқаны аясында шаһар мектептеріндегі 14-16 аралығындағы жасөспірімдерді уақытша еңбекпен қамту мәселесі де оң шешімін таппақ. Жалпы, биыл 4 575 адам, оның ішінде 582 оқушы жергілікті бюджет қаражаты есебінен еңбекпен қамтылады деп күтілуде.
Нұржайна ШОДЫР.