Б.Ахметов атындағы жоғары педагогикалық колледжі — Кереку өңірінде ойып тұрып орын алар беделді оқу орындарының бірі, барша ұстаз атаулының қасиетті қара шаңырағы.
Киелі білім ордасынан небір ақын-жазушылар, қоғам қайраткерлері, ғылым-білім, өнер мен шығармашылық шыңын бағындырған белгілі азаматтар, соғыс жылдарында елін, жерін жаудан қорғаған батырлар шыққан.
Қазіргі уақытта да көздерінде ұшқыны бар, үлкен үмітпен арман қуып, алдына мықты маман атануды мақсат етіп келген жас буын үшін барлық жағдай жасалып, сапалы білім алуына ерекше мән берілуде. Олай дейтінім, осында оқуға келген әр студент орта арнайы кәсіби білім мен тәжірибені ұштастыра отырып, педагогика ғылымының қыр-сырын жан-жақты меңгеріп шығады. Жалпы, педагогикалық колледж өміріндегі сәттер алуан түсті бояуларға бай. Яғни, студенттік шақтың әр күні қызыққа, жарқын болашаққа деген үкілі үмітке, үлкен сенімге толы. Осындай сезімді сезіндіре білген колледждегі ұстаздарымызға айтар алғысымыз зор. Әр сәт мағыналы болуымен маңызды. Есімі елге танымал, кезінде осы шаңырақта оқып кеткен дара тұлғалардың ізі мен қолының табы қалған құтты мекенде менің де білім алып жатқанымды мақтан тұтамын. Бұл мен үшін зор мәртебе деп білемін.
Гүлдина ЕРТАЙ, 4-курс студенті.