Кеше Республика күніне орай облыстағы талантты да білімді 100 оқушы «Тәуелсіздік ұланы» төсбелгісімен марапатталып, ақшалай сыйлыққа ие болды. Олардың қатарында облыстық, республикалық және халықаралық зияткерлік олимпиадалар мен түрлі кәсіби шеберлік сайыстарының жеңімпаздары және жүлдегерлері бар.
Биыл төртінші жыл қатарынан өткізіліп отырған «Тәуелсіздік ұландары» премиясының басты мақсаты – өз қатарластарынан оза шапқан дарынды оқушылар мен қоғамдық маңызы бар батыл іс-әрекет жасаған балаларды қолдау, дейді облыстық білім беру басқармасының «Ертіс дарыны» өңірлік қосымша білім беру оқу-әдістемелік орталығының өкілдері.
Атап өтерлігі, ағымдағы жылы аймақ бойынша айтулы байқауға қатысуға 700-ден астам өтініш түсіп, 258 үміткер облыстық кезеңге өткен. Олардың ішіндегі ең жоғары ұпай алған 100 бала «Тәуелсіздік ұланы» сыйлығының иегері атанды. Облыс әкімі Асайын Байханов бір топ жеңімпазбен бетпе-бет жүздесіп, салтанатты түрде марапаттады. Ал өңірлердегі өзге жас таланттарды бейнеконференция арқылы құттықтап, ізгі тілегін жеткізді.
— Қымбатты оқушылар, баршаңызды Республика күнімен құттықтаймын. Мереке қарсаңында өздеріңмен кездесіп отырғаныма қуаныштымын. Ел Президенті Қасым-Жомарт Тоқаевтың «білімді әрі талантты азаматтарға үлкен үміт артамын!» — деген сөзі бар. Иә, талантты балаларды қолдау мемлекеттің басым бағыттарының бірі саналады. Сендер сабақты жақсы оқумен қатар, қоғам, ғылым мен білімнің дамуына да үлестеріңді қосып жүрсіңдер. Сендердің әр жетістіктерің үшін мақтанмыз, марқаямыз. Рухы биік ұлт мақтанышы болыңдар! Әрқайсыңа жетістік, жақсылық тілеймін, — деді Асайын Байханов.
Жеңімпаз атанған балалар «Ғылыми-техникалық шығармашылық және оқу-зерттеу қызметі», «Шығармашылық шеберлік», «Спорттық шеберлік», «Әлеуметтік маңызы бар және қоғамдық қызмет», сондай-ақ, техникалық және кәсіптік білім беру ұйымдарының жастары үшін «Кәсіби шеберлік» сынды 5 аталым бойынша марапатталды. Олардың әрқайсысына төсбелгіден бөлек 50 айлық есептік көрсеткіш көле-мінде ақшалай сыйақы табыс етілді.
Шара барысында оқушылар дарынды жастарға деген қолдау үшін алғыстарын білдірді. Сондай-ақ, жасөспірімдер облыс әкіміне өздерін қызықтырған сұрақтарын қоюға мүмкіндік алды. Кездесу соңы әсерлі әңгімеге ұласты.
— Еліміздің жарқын болашағы – сендердің қолдарыңда! Сондықтан білімді, талантты болумен қатар адамгершілік асыл қасиеттерін жоғалтпаңдар. «Ерім дейтін ел болмаса, елім дейтін ер қайдан шықсын?» — деген сөз бар. Сол үшін сендер «елім» деп, өз еліміздің жанашыры, патриоты, мықты азаматы болыңдар, — деп түйіндеді кездесу соңын Асайын Байханов.
Ева МОСИЯШ, Павлодар ауданы Мичурин жалпы орта білім беру мектебінің 9-сынып оқушысы:
— Мен республикалық «Зерде» зерттеу жұмыстары мен шығармашылық жобалар сайысында бас жүлде алдым. Басқа да республикалық чемпионаттардың жеңімпазымын. Осынау жетістіктерім үшін облыс әкімінің қолынан марапат алғаныма өте қуаныштымын. Біздің өнер-білімдегі жеткен жетістігімізді бағалап, қолдау көрсетіп жатқан жандарға айтар алғысым шексіз. Мұндай қолдаулар бізге қанат бітіріп, алға қарай ұмтылуға жетелейді. Білім-ғылымға деген құштарлығымызды одан сайын арттыра түседі.
Еркебұлан ТІЛЕНІШ, Ақсу қаласы Ю.Гагарин атындағы жалпы орта білім беру мектебінің 10-сынып оқушысы:
— Біздің биікті бағындыруымызға ата-анамыз бен ұлағатты ұстаздарымыздың қосқан үлесі зор. Сол үшін бұл марапат, жетістіктің бәрі — осы адамдардың еңбегінің жемісі деп білемін. Еліміздің басты мерекесі – Республика күні қарсаңында талантты жастардың басын қосып отырған «Тәуелсіздік ұландары» премиясының ғұмыры ұзақ болсын. Егемен еліміздің абыройын асқақтатып, атағын шығаратын дарынды балалар көбейе берсін!
Нұржайна ШОДЫР.
Суретті түсірген — Есенжол Исабек.