Технология дамыған сайын көздің жауын алатын тәттілердің сан түрі елдің сұранысына ие болуда. Содан болар, бүгінде тәттілердің түр-түрін пісіріп, тапсырыс қабылдайтын қыз-келіншектердің қатары көбейген. Осындай кәсіппен айналысып жүрген ақтоғайлық кондитер Бақытжан Жұмалинованың тәттілері сатып алушылардың көңілінен шығып, әр мерекелік дастарханның сәніне айналып үлгерген.
Бақытжан Қайыргелдіқызының негізгі мамандығы – химия пәнінің мұғалімі. Ақтоғай ауылдық Қ.Сәтбаев атындағы орта мектепте осы мамандық бойынша 2022 жылға дейін еңбек еткен. Кейін бала күтімімен демалысқа шығады. Сол уақыттарда жанұясына шайға тіскебасарға деп бастап, соңы ағайын-туыстың тапсырыс беруіне ұласады. Бүгінде үйден тәттілер пісіріп, әлеуметтік желі арқылы тапсырыс қабылдап жүр.
Кейіпкеріміз ерте жасынан бастап асханаға жақын болғанын айтады. Отбасында ас үй тірлігіне қолғабыс ете жүріп, түрлі тәттілерді пісіруді де, тамақ дайындауды да, дастарқан жасауды да жақсы меңгерген.
— Тәттілерді пісіруге бала күнімнен әуес болдым. Өзге қатарластарым секілді газет-журналдарға шығатын тәттілердің құрамын жазып алып дайындайтынмын. Алайда бұл саламен кәсіби түрде айналысқан емеспін. Отбасылы болған соң жақындарыма аз көлемде тәттілерді пісіріп жүрдім. Сосын «Неге осы іспен шұғылданбасқа?» деген ой келді. Сөйтіп, ұстаздық жолдан осы салаға бет бұрдым. Солай кішігірім қадамдармен кондитер болып кеттім. Қазіргі уақытта өзімнің шағын асханамда бәліш, торт секілді тәттінің сан түрін дайындаймын. Олар тек табиғи өнімдерден әзірленеді. Бағалары да сатып алушыларға қолжетімді. Тапсырыстарды әлеуметтік желі арқылы да қабылдаймын. Тұтынушылардың көңілінен шығуда. Алдағы уақытта кәсібімді дамыту ойда бар, — дейді Бақытжан Қайыргелдіқызы.
Бүгінде жас кондитердің тәттілеріне сұраныс жоғары. Оның сөзінше, тәтті тортқа тапсырыс берген адам үшін бірінші сыртқы безендірілуі, екінші тіл үйірер дәмі маңызды. Ал көздің жауын алардай әдемі әрі дәмі аузыңнан кетпейтін тортты дайындау кезеңі бірінші қамырының құрамын, мөлшерін дәл есептеп салу, екінші күлшелерін пісіріп алу, үшінші тортты жинап сәндеуден тұрады.
— Менің тұтынушыларым көбіне ауыл тұрғындары. Сұранысқа сай тапсырыстарды уақытылы орындап, тұтынушылардың алғысын алғанымда төбем көкке жетеді. Адамдарға қуаныш сыйлау, ақ батасын алу мен үшін зор бақыт және бастаған ісіңнің берекесін арттыруда да осындай алғыстардың септігі көп, — дейді ол.
Иә, қазіргі таңда кәсіптің алуан түрі бар. Әр адам өзінің қабілет-қарымына қарай бейімделіп, сүйікті кәсібін дөңгелетіп отыр. Әсіресе, жастар қауымы. «Жас келсе, іске» демекші, кейіпкеріміз де ойында жүрген арманына біртабан жақындауды ойлап, алдына мақсат қойып, жаны қалаған әрі пайдалы жұмысты бір арнаға тоғыстырған жан.
Айдана БОРАНБАЕВА.