Өрт сөндірушінің басты жауы – жалын ғана емес, уақыт. Себебі, әр секунд – бір тағдырдың өлшемі. Сол себепті дабыл қағылған сәттен бастап оларды тек бір ой мазалайды. Ол – адам өмірін құтқару. Тәжірибелі маман Мәрлен Әбенов үшін де бұл — күнделікті міндет.
Мәрлен Әбенов Павлодар қаласындағы №4 өрт сөндіру бөлімінде аға өрт-сөндіруші-құтқарушы болып еңбек етіп келеді. Алғашында 3 айлық тағылымдамадан өтіп, кейін Өскемен қаласында
1 айлық онлайн білім алған.
— Негізі, өрт сөндіруші боламын деп армандаған емеспін. Тіпті, осы салада қызмет атқарамын деген ой да келмепті. Отан алдындағы борышымды өтеп келген соң ғана өзімнің болашақ мамандығым туралы ойлана бастадым. Кейін жақындарымның кеңесімен осы өрт сөндіру саласын таңдадым. Жалпы, бұл мамандықты таңдағаныма еш өкінбеймін. Әрине, жұмыстың оңайы жоқ. Бұл саланың қиын тұстары да жетерлік. Мәселен, алғашқы жылдары оңай болмады. Бір күні Павлодар ауданына қарасты Черноярка ауылында құрғақ шөптің, үлкен аумақтағы ағаштардың жанып жатқандығы туралы хабарлама келіп түсті. Оқиға орнына дереу барып, өртті ауыздықтадық. Осыдан-ақ бұл мамандықтың қиын тұстары баршылық екенін түсіндім. Алайда таңдауыма еш өкінбеймін. Жұмыс барысында бір күнде он шақты шақыртуға дейін түсуі мүмкін. Дабыл қағылған сәтте бір минут ішінде жиналып, төтенше жағдай орнына он минут аралығында жетеміз.
Өрт сөндіруші болу үшін ширақтық қажет. Себебі, оқиға әр жерде болуы мүмкін. Мәселен, 9 қабаттағы үйде өрт шықты делік. Ал сіз сол оқиға орнына көтерілуіңіз тиіс. Сондықтан тез әрекет ету де осы жағдайда аса маңызды. Оған қоса, біздің жауынгерлік киіміздің салмағы 10-12 келі және тыныс алу аппараты 15 келіні құрайды. Екеуін қосқанда сіз 25 келіні көтеріп жүресіз. Бұл да оңай емес. Бірақ біздің мақсат – оқиға орнына дереу жетіп, өртті бірден ауыздықтау, — дейді ол.
Мәрлен үшін жұмыс белгілі бір уақытпен шектелмейді. Себебі, олардың жұмысы тәулігіне 24 сағат бойы дайын болуды талап етеді. Кейде мұндай оқиғалар жұмыстан тыс уақытта да орын алып жатады. Мысалы, жуырда жұмыс ауысымынан кейін үйінде демалып жатқан Мәрлен екінші қабаттағы пәтердің терезесінен түтінді байқап қалады. Жағдайды дереу бағамдаған ол көршілерінен жедел қызметтерді шақыруды өтініп, өзі пәтердің есігін қаққан. Жауап болмаған соң бір минут та жоғалтпай, терезеден ішке кіріп, пеш үстіндегі жанып жатқан тосабы бар ыдысты алып тастап, плитаны өшіріп, бөлмеде адамдардың бар-жоғын тексерген. Кейін өрт сөндірушілер мен пәтер иелері келгенге дейін пәтерді желдетуді бастаған.
— Өрт сөндірушіге әуелі жауапкершілік керек. Біз өлім мен өмірдің арасында тұрған адамдар үшін жауаптымыз. Бұл салаға адамдарға жақсылық жасаймын дегендер ғана келеді. Мұндағылар адал еңбектің абыройға бөлейтінін жақсы біледі. Сондай-ақ, жылдам әрі суыққанды шешім қабылдау маңызды. Өрт сөндіру – ұжымдық жұмыс. Оттың арасында жүргенде бірлігіміз бекем, — дейді ол.
Өзгенің өмірі үшін отқа түсуден тайынбайтын олардың жұмысы – нағыз ерлік. Бүгінгінің батырына айналған еңбек адамдарының мерейі үстем болуға тиіс.
Айдана БОРАНБАЕВА.